Apoc 15 - Chuj San Sebastian Bible

A ucwn̈ ángel yet' uque yailal

¹ Xlajw cha, xwiln junx senya 'a satcha'an̈, caw niwn yel'chi. Xcaw sat in c'ojl wilni. 'Ay ucwn̈ ángel yet' eb' uque slajb' yailal. Yuj uque yailal cha, 'oj tz'acwc 'el'ch smasnil yowl sc'ojl Dios.

² 'Ix wiln pax jun 'icha mar, lajn yilx 'icha nen caln yaj yet' c'ac'. Ax 'a stz'ey jun cha, 'ay jun tzo'n̈ eb' lin̈n 'eq'ui. Atn eb' x'a'n ganar 'a yib'n̈ jun noc' sb'i, yet' 'a jun yechel. 'Ix ya'n pax ganar eb' 'a yib'n̈ jun número yic sb'i jun noc' cha. Wan syucn eb' junjn yarpa xyac' Dios 'a 'a.

³ 'Ix sb'itnan eb' sb'it Moisés, atn jun schecb' Dios. 'Ix sb'itnan pax eb' sb'it jun tzcuch Calnelu. Xchi jun b'it chi 'ixtic: Mamin, ach qui Diosal, smasnil tas tztac' o'oj. Caw niwn yel'ch jantcn̈ej tas xa b'o'o, xcaw sat qui c'ojl quiln on̈. Caw yel, tojln̈ej a b'eyb'al, sReyl ach junjn nacion̈.

⁴ Toc 'ay junc mach ma'oj xiw 'aych Mamin. Toc 'ay junc ma'oj alnoc wach' paxti 'ayach. Yujto cojxn ach caw wach'chn̈ej. 'Oj cot eb' 'anma 'a junjn nacion̈, 'oj wul yal sb'a eb' 'ayach. Yujto xlaj yil eb', chajtlto caw tojl tzotj a b'eyc'ojlwi, xchi eb'.

⁵ Xlajwn̈ej cha, xwilni, a 'a jun scajnub' Dios 'a satcha'an̈, 'ix jacw jun Lugar yicn̈ej Dios yaj sch'ocoj, atn jun 'aj molb'il sley.

⁶ Ata x'elt ucwn̈ ángel. Yet' eb' uque yailal, junjn yet' junjn eb'. 'Aych junjn sac pichl yuj junjn eb', caw tzictzni yilxi. 'Aych junjn cincha nab'a oro 'a sn̈i sc'ojl junjn eb'.

⁷ 'Ay jun 'a eb' querubín schan̈wn̈il, a 'ix 'a'n junjn vaso nab'a oro 'a junjn eb' ángel cha. A junjn svaso eb' cha, b'ut'n yet' yowl sc'ojl Dios. Atn Dios 'ayc' 'a jun 'ejmn̈ej.

⁸ Ax jun Lugar cha, caw q'uic' x'aj 'ejm tab' 'a yojl yuj stzictznil Dios yet' spoder. May junc mach 'ix stac' scomn 'och ta', masnto xlajw uque yailal xyij 'at eb' ángel chi yucwn̈il.