Apoc 14 - Chuj San Sebastian Bible

A eb' tzb'itnan jun 'ac' b'it

¹ Xlajw cha, xwilni, a jun tzcuch Calnelu, lin̈n 'ec' 'a sjolm lum tzaln Sión. 'Ay pax 144 mil eb' 'ayc' yet'oc. Ax 'a snan̈l sat junjn eb', ata tz'ib'b'il 'och sb'i jun tzcuch Calnelu cha, tz'ib'b'il pax 'och sb'i Smam.

² Ax xwab'ni, x'och jun 'aw 'a satcha'an̈. Caw tzn̈il-li sjaj 'icha sn̈il-li jun tzo'n̈ niwc a'. An̈jtona', 'icha sn̈il-li pax c'u sc'an̈i. A jun cha, 'icha to caw niwn 'anma wan sonn yet' jun tzo'n̈ arpa.

³ 'Ay eb' tzb'itnan jun 'ac' b'it 'a yojltac sdespacho Dios, yet' 'a yojltac eb' querubín schan̈wn̈il, yet' pax 'a yojltac eb' 24 'ichmtac winac. May junc mach tztac' sc'ay jun b'it chi yu'uj. Cojxn eb' 144 mil colchjnac 'el 'a scal eb' 'anma 'a yolyib'n̈q'uinal, cojxn eb' tztac' sb'itnani.

⁴ A eb' cha, may xon jun 'ejmoc sayjnac eb' yix. May xon 'aj 'ochnc smul eb'. Tza'nn̈ej 'och eb' yuj jun tzcuch Calnelu 'a 'ajtc tz'eq'ui. 'Ix colchj 'el eb' 'a scal eb' 'anma'. Yuj cha, lajn eb' 'icha junc sb'ab'l sat 'awb'en tz'ajx 'a Dios, yet' 'a jun tzcuch Calnelu cha.

⁵ May jun 'ejmoc ya'jnac eb' 'es. May junc smul eb' x'ilchji ['a yojltac sdespacho Dios.]

A tas tzyal-l 'oxwn̈ ángel

⁶ Xlajw cha, xwiln sjen̈n̈ 'ec' junx ángel 'a snan̈l satcha'an̈. A tas yet'i, atn jun wach' 'ab'x 'ay 'a jun 'ejmn̈ej. 'Ix yaln 'el 'a eb' 'anma 'a junjn nacion̈, 'a junjn chon̈b' 'a yolyib'n̈q'uinal. Toxn̈ej chucchc yin̈tl eb', toxn̈ej chucchc sti eb', c'uxn xlaj yab' eb'.

⁷ Caw 'ip yaln 'a eb' 'ixtic: —Xiwn̈ec 'a Dios. Alc wach' paxti 'a 'a, yujto tox xjaw stiempoal ex sb'eyc'ojlani. Alc e b'a 'a 'a, yujto a b'ojnac satcha'an̈, sat lu'um, a mar, yet' jun tzo'n̈ spac'b'a', xchi.

⁸ 'Ay pax junx ángel tza'n yu'uj, 'ix yaln 'ixtic: —Caw 'ix lan̈chj chon̈b' Babilonia. Niwn ton yel'chi, palta caw xlan̈chji. A jun chi x'a'n juwc 'el smasnil nacion̈ yuj yajmulal. 'Icha to xcaw 'och 'u'm 'an̈il junjn nacion̈ yu'uj, xchi.

⁹ Xlajwn̈ej cha, 'ay pax junx yoxl ángel tza'n yu'uj, caw 'ip yaln pax 'ixtic: —A wal eb' tzlaj yal sb'a 'a jun noc' sb'i, yet' 'a jun yechel, atn eb' xlaj schaj 'och senya 'a snan̈l sat, mto 'a sc'ab',

¹⁰ a eb' cha, yowlal 'oj jawc jun niwn yailal 'a yib'n̈ eb' yuj Dios. 'Icha junc yal uva tzjaw sti', caw ow, may jac a 'ay't 'a scal, 'ixta wal yowl sc'ojl Dios 'oj yac' 'a eb'. Caw wal ow si'mb'il. 'Oj yab' eb' syal 'a scal c'ac' yet' azufre 'a yojltac eb' yángel Dios, yet' 'a yojltac jun tzcuch Calnelu.

¹¹ A wal jun 'aj 'oj yab' eb' syal cha, 'oj q'ue stab'l 'a smasnil tiempo. Wach'xam c'ual, wach'xam 'ac'wal, man̈x b'a'n̈ 'oj 'iljoc jac eb'. A eb' 'oj 'aj ta', atn eb' tzlaj yal sb'a 'a jun noc' sb'i, yet' 'a yechel, atn eb' xlaj schaj 'och senyail sb'i jun noc' chi 'a 'a, xchi jun ángel cha.

¹² An̈ec yel yic on̈c xo Dios, an̈ec yiclum on̈c 'a tas tzyal schecnb'il, ca'c 'och qui c'ojl 'a Jesús. Yuj cha, yowlal caw te'n tzcutjec qui b'a cab'n syail.

¹³ Xlajw cha, xwab'n yoch jun paxti 'a satcha'an̈, 'ix yaln 'ixtc 'ayin: —Tz'ib'j junx 'oj wal tic: A ticnec, caw wach' yic eb' an̈ja 'aych 'a yol sc'ab' sYajlil yic tzchami, xchi jun paxti cha. Xyaln Yespíritu Dios 'ixtic: Caw yel yujto 'oj 'iljc eb' 'a smunljel. Ax jun ch'an̈ un̈ 'aj tz'ib'b'il can tastc wach' tzb'o eb', 'oj c'och yet' eb' 'a satcha'an̈, xchi.

'Oj molb'tzaxc eb' 'anma'

¹⁴ Xlajw cha, xwilni, 'ay jun sac 'asun. Ax 'a yib'an̈, ata wocn q'ue jun 'icha 'anma yilxi. 'Ay q'ue jun corona nab'a oro 'a sjolom. Yamb'il jun jos yu'uj, caw jay ye.

¹⁵ Ax 'a yol yatut Dios x'elt junx ángel. Caw 'ip yaln 'at 'ixtc 'a jun wocn q'ue 'a yib'n̈ jun 'asn cha: —Polch a jos cha, tox xjaw stiempoal. Yujto 'icha 'ixm trigo caw taquin̈, 'ixta eb' 'anma 'a yolyib'n̈q'uinal, xchi.

¹⁶ Yajn̈j wal cha, a jun wocn q'ue 'a yib'n̈ jun 'asn cha, 'ix spoln 'och sjos chi 'a yolyib'n̈q'uinal. 'Ix laj si'noc q'ue wan eb'.

¹⁷ Xlajw cha, 'ay junx ángel x'elt 'a yol yatut Dios 'ay 'a satcha'an̈. Yamb'il pax junx jos yu'uj, caw jay ye.

¹⁸ 'Ix 'elt pax junx ángel 'a 'aj 'ay jun yet'l xajmb'al, atn jun chi 'ay yopiso sc'anlb'an te c'ac'. Caw 'ip yaln 'at 'ixtc 'a jun ángel yamb'il sjos chi yu'uj: —Polch a jos chi caw jay ye cha. Yujto a jun tzo'n̈ uva a yolyib'n̈q'uinal, caw 'ec'm xo, xchi.

¹⁹ Yuj cha, 'ix spoln 'och jun ángel chi sjos 'a yolyib'n̈q'uinal. 'Ix yi'n q'ue wan jun tzo'n̈ uva chi smasnil. 'Ix ya'n 'ejm 'a yojl jun niwquil te'lab' 'el yal uva. A jun cha, tzyal 'el'chi, atn yowl sc'ojl Dios.

²⁰ A jun te'lab' 'el yal uva cha, a 'a sti 'el chon̈b' 'ay. 'Icha tzte'x te uva si'mb'il, 'ixta wal x'aj eb' 'anma cha. Ax schic'l eb' x'eli, caw pim x'aji. 'Icha schan̈il 'aj 'aych sfreno e no chej 'a sti', 'ixta xq'ue'ch spimal. Ax 'aj xlajw c'och suyn schic'l eb' cha, 'aym 'oxe'oc ciente kilómetro x'aj't snajtil, 'icha wal junc niwquil pama'.