Apoc 12 - Chuj San Sebastian Bible

A jun 'ix 'ix yet' jun dragón

¹ Xlajw cha, 'ix checlj jun senya 'a satcha'an̈, caw niwn yel'chi. 'Ay jun 'ix, a c'u a 'aych spichloc. Ax 'uj a 'aych ste'nub'oc yoc, ax pax lajchwe c'anal, a 'ay q'ue scoronaoc.

² 'Ayx tz'i'n 'ix, 'ayx cot spenail yune 'ix. Caw tz'el yaw, yujto tznib'j 'ix scol sb'a.

³ Yajn̈j wal cha, xcheclj junx senya 'a satcha'an̈. 'Ay jun niwquil dragón caw chac yilxi. Uque sjolom, lajn̈e sch'a'ac. Ax 'a junjn sjolm cha, 'ay q'ue scorona.

⁴ Ax yet' sn̈e, 'ix sloc cot jun tzo'n̈ c'anal 'a satcha'an̈. Jab'xoj man̈ spacloc x'aj syamchj jun tzo'n̈ c'anal chi yu'uj, sjuln 'ejm 'a yolyib'n̈q'uinal. Xlajw cha, xc'och 'a yojltac jun 'ix 'ayx tz'i'n cha, yujto tznib'j schi jun 'unn wan yalj cha.

⁵ Ax yic x'alj yune 'ix cha, winc 'unin. Atn jun chi 'oj 'a'nc Yajlil 'a yib'n̈ smasnil nacion̈ yet' jun sq'uen c'ococh. Xlajwn̈ej wal yalj muc'uc, x'ijx 'at 'a Dios 'a 'aj 'ay sdespacho.

⁶ Ax jun 'ix cha, x'at 'elc 'a cusltac lu'um. Ata 'ay jun yet'l b'ob'ilx yuj Dios, 1,260 c'u 'ix 'ajx wa ta'.

⁷ An̈jtona', 'ix 'och jun niwquil owl 'a satcha'an̈. A jun sat ángel Miguel sb'i, yet' eb' yit ángelal, 'ix yac' eb' owl yet' jun dragón cha. Ax jun dragón cha, yet' eb' yángel, xyac' pax eb' owl yet' eb'.

⁸ Palta ma'ix yac' ganar jun dragón chi yet' eb' yángel cha. Yuj cha, man̈x 'a yet'l eb' 'a satcha'an̈.

⁹ 'Ixta x'aj sjulx can 'elt jun niwquil dragón cha. Atn jun ya'jnac 'och sb'a chanl pecti'. Atn win diablo, win Satanás. Atn win tz'ixtn paxti smasnil 'anma 'a yolyib'n̈q'uinal. A win cha, xjulx can 'ejm 'a yolyib'n̈q'uinl yet' eb' yángel.

¹⁰ Xlajw cha, xwab'n yoch jun paxti 'a satcha'an̈, caw 'ip yaln 'ixtic: —A ticnec, 'ix checlj 'el jun colnb'il tzyac' qui Diosal. A ticnec, 'ix sch'oxo, to caw 'ay spoder, Yajl yaji. Ax Cristo 'ix sch'oxni, to a Yajl yaj 'a smasnil. Yujto a win Satanás, atn win 'a'm queja 'a spatc eb' quit creyenteal, 'ix julx can 'el winac. A win cha, sc'ual yac'wlil ya'n queja win eb' 'a qui Diosal.

¹¹ A eb' cha, xyac' ganar eb' ya'n techjoc, yujto chamnc jun tzcuch Calnelu yuj eb', 'elnc can schiq'uil. 'Ix yac' ganar eb', yujto te'n xyutj eb' ya'n testigoal sb'a yu'uj. Ma'ix xiw eb' schami, caw xyaln̈j sc'ojl eb' ya'n cham sb'a yu'uj.

¹² Yuj cha, 'ay cab' tzaljc'ojlal 'a satchan̈ tic. Tzalj coyc qui masnil an̈ 'ayn̈ec 'ec' 'a tic. Palta 'oltacx wal ex 'ayx 'ec' 'a sat lu'um, yet' ex tzex b'eyc' 'a yib'n̈ a mar. Yujto a win diablo x'emch 'aj 'ayx 'eq'ui. Caw ow win si'mb'il, yujto yojc winac, to caw jab'xoj tiempo, xchi jun paxti cha.

¹³ Ax yic xyiln win dragón cha, chajtlto xjulx can 'ejm 'a sat lu'um, 'ix 'at ya'nc 'och yailal 'a yib'n̈ jun 'ix 'ajnc yune cha.

¹⁴ Palta x'ajx 'och sc'axl 'ix caw niwac, lajn 'icha sc'axl no salt'iw. Yuj cha, x'at jen̈n̈oc 'ix 'a jun yet'l 'a cusltac lu'um, sec matz yamchj yuj jun chan cha. Ata x'ajx wa 'ix nan̈l schan̈l ab'il.

¹⁵ Ax jun chan cha, 'ay wal jun niwquil a xpitzw chan̈ yu'uj. A 'a yol sti tz'el-li. Yujto tznib'j a jun a chi tz'ec' 'i'nc 'at 'ix.

¹⁶ Palta a lum lum xcolwj 'a 'ix. 'Ix jacw jun niwquil xab' oln 'a lu'um. An̈jta 'ix satcn 'ejm jun niwquil a chi x'elt 'a yol sti cha.

¹⁷ Yuj cha, xwach' cot wal yowl win dragón chi 'a 'ix, x'at ya'nc win owl yet' jun tzo'n̈ xo eb' yin̈tl 'ix. Atn eb' tzyiclni tas tzyal schecnb'il Dios, eb' te'n tzyutj ya'n 'och snab'en 'a spaxti Jesucristo.

¹⁸ Xlajw cha, xcan lin̈n win dragón chi 'a scal yarenail sti a mar.