Apoc 11 - Chuj San Sebastian Bible

A chawn̈ eb' testigo

¹ 'Ix 'ajx jun 'echtab' 'ayin, lajn 'icha te 'aj. Xlajw cha, 'ix alx 'ayn 'xtic: —'Ixc muc'uc, 'at 'echtej yatut Dios yet' jun yet'l xajmb'al. Tza b'isn pax eb' tzyal sb'a 'a Dios 'a yojl cha.

² Ax yamq'uil sti', man̈ echtoc. Yujto a jun cha, 'ac'b'ilx 'a eb' man̈ israeloc. A eb' cha, 42 'ujl 'oj stec' 'ejm eb' jun chon̈b' yic Dios cha.

³ 'Oj wa'ch yopiso chawn̈ mach tz'a'n testigoal sb'a wu'uj, 1,260 c'u 'oj 'ec' yal-l eb' in paxti'. 'Oj ya'ch eb' jun pichl n̈achtac sat, sec chequel to cusc'ojlal yaj eb', yic tz'ec' eb', xchi.

⁴ A chawn̈ testigo cha, a chab' snun te olivo alb'il yuj Zacarías, a tzch'ox coti. An̈jtona', tzch'ox cot chab' yet'l cantil 'ayc' 'a yojltac Cajlil 'a yolyib'n̈q'uinal.

⁵ Toto 'ay mach tznib'n 'ixtnoc eb' chawn̈ cha, 'oj 'eltoc c'ac' 'a sti eb'. Ax eb' 'ajc'ojl 'oj 'ajch 'a eb' cha, 'oj tz'a eb' yuj 'a jun 'ejmn̈ej. 'Ixta 'oj 'aj scham jantcn̈ej eb' tznib'n 'ixtnoc eb'.

⁶ A eb' testigo cha, 'ay spoder eb' smacn 'och wan n̈ab', sec man̈xtzac yac' n̈ab' yic tz'ec' yalnc 'el eb' spaxti Dios. 'Ay pax spoder eb' ya'n 'och a a chic'al. Tzta'n̈j ya'n 'och eb' tzann̈j yailal 'a yolyib'n̈q'uinal, a tzyala 'aj tznib'j eb'.

⁷ Palta ax 'a yic 'oj lajwc yaln 'el eb' spaxti Dios, 'ay jun noc' sb'i caw ow, q'uenc wul 'a yol jun xab' olan. 'Oj 'at jucn̈joc yac' owl yet' eb'. Ax ya'n ganar smiln cham eb'.

⁸ Ax sniwnal eb' schawn̈il, ton̈j 'oj can t'ocn 'a yol scayeal jun niwquil chon̈ab', atn 'ajtil 'ac'b'il q'ue Cajlilc 'a spenc te culus. A jun chon̈b' cha, tzcuch Sodoma, tzcuchn pax Egipto, a sch'oxni tas yaji.

⁹ Nan̈l schan̈l c'u 'oj can t'ocn eb' ta'. Til wal 'anma 'oj 'ec' 'ilnoc sniwnal eb' chamnc cha. Til wal chon̈ab', til wal nacion̈ 'aj 'oj laj cot eb'. Chucchc sti junjn c'aj eb'. A eb' 'anma cha, ma'oj scha eb' mucxoc sniwnal eb' chamnc cha.

¹⁰ C'uxn 'oj laj tzaljc eb' 'anma 'a yolyib'n̈q'uinal, yujto 'ix cham eb'. 'Oj laj ya'lac eb' siylab' 'a scal. Caw 'oj tzaljc eb', yujto caw tzyab' eb' syal yuj chawn̈ eb' schecb' Dios cha.

¹¹ Palta ax 'a yic 'oj lajw nan̈l schan̈l c'u xcham eb', ax Dios 'oj 'a'nc pitzwc pax eb', 'oj sq'uex wan eb'. Ax jantcn̈ej eb' 'oj 'ilnc eb', caw 'oj xiw eb' si'mb'il.

¹² 'Oj lajwc cha, ax yoch jun paxti 'a satcha'an̈, caw 'ip 'oj yal 'a eb' chawn̈ chi 'ixtic: —Q'uen̈ect 'a satchan̈ tic, xchi. Yuj cha, 'oj q'ue eb' 'a scal jun 'asn 'a satcha'an̈. Ax eb' 'ajc'ojl yajch 'a eb', toxn̈ej 'oj q'ue q'ueln eb'.

¹³ At wal cha, ax yec' jun quixcab'. Caw ow 'oj 'ec'oc. Til wal n̈a 'oj laj lan̈chjoc 'ejm 'a jun niwquil chon̈b' cha. A 'a junjn lajlajn̈e n̈ail, junjn 'oj laj lan̈chjoc 'a 'a. Uque mil 'anma 'oj cham yu'uj. Ax jun tzo'n̈ xo eb' 'anma', caw 'oj xiw chan̈ eb'. Ax laj yalnc eb', chajtlto caw niwn yel'ch Dios 'a satcha'an̈.

¹⁴ 'Ixta 'oj 'aj yec' jun schab'l yailal. Palta 'ayt wal junx 'oj jawc muc'uc.

A jun yucl trompeta tz'utz'xi

¹⁵ 'Ix yutz'n jun yucl ángel pax strompeta. Xlajw cha, x'och jun tzo'n̈ paxti 'a satcha'an̈. Caw 'ip 'ix yal 'ixtic: A eb' yajl yaj 'a yolyib'n̈q'uinal, wal ticnec tzcan yopiso eb' yico'oc Dios Cajlil, tzcan pax yico'oc Cristo. A 'oj 'a'nc Yajlil 'a jun 'ejmn̈ej, xchi eb'.

¹⁶ Ax eb' 24 'ichm winac, wocn 'ejm eb' 'a junjn despacho 'a yojltac Dios. 'Ix 'em n̈ojn eb' 'a sat lu'um, xyaln sb'a eb' 'a Dios.

¹⁷ 'Ix yaln eb' 'ixtic: Ach tic Dios ach, smasnil tas tztac' o'oj. 'Aych 'ec' ticnec, 'aych 'ec'n̈ej yictax pecti'. Tzcac' yuj diosal 'aych ach Cajlil on̈. Yujto xa ch'oxo, to caw niwn a poder, yic xa chan 'el yich a'n Yajlil.

¹⁸ A jun tzo'n̈ nacion̈ xlaj cot yowal, caw xjaw sc'ul a'n syailal eb'. 'Ix jaw pax stiempoal a b'eyc'ojlan eb' chamnac. 'Oj ac' spac 'a junjn eb' tzach 'a'n servil, atn eb' a checab'. A eb' cha, ec xo yaj eb', tzch'oxn 'el eb', to caw niwn el'chi. Toxn̈ej eb' niwn yel'chi, toxn̈ej eb' may yel'chi, 'oj a'n̈j spac 'a eb'. An̈jtona', 'ix jaw pax stiempoal a'n lajwc 'el eb' tz'a'n lajwc yolyib'n̈q'uinal, xchi eb'.

¹⁹ Xlajw cha, 'ix jacw yatut Dios 'a satcha'an̈, caw checl 'elt scaxail strato Dios 'a 'a. Yajn̈j wal cha, til wal xc'an̈ c'u, 'ix laj 'ec' raya. 'Ay jun tzo'n̈ xo tas xlaj c'an̈i. 'Ix 'ec' pax jun niwquil quixcab'. 'Ix jaw pax jun tzon̈ niwc sacb'at.