Apoc 10 - Chuj San Sebastian Bible

A ch'an̈ un̈ yet' jun ángel

¹ Xlajw cha, xwiln pax junx ángel 'a satcha'an̈, caw niwn spoder. 'Ix 'ejm 'a yolyib'n̈q'uinal. Oyn 'och 'asn 'a 'a, 'icha to a 'aych spichloc. A 'a sjolom, 'ay q'ue jun chacpan. A sat, caw tzictzni 'icha c'u. Ax yoc, 'icha snich c'ac' 'ixta yilxi.

² 'Ayc' jun ch'an̈ yune un̈ 'a yol sc'ab', jacn ch'an̈. A yoc 'a swach', stec' 'ejm 'a yib'n̈ a mar. Ax yoc 'a surito, stec' 'ejm 'a sat lu'um.

³ Xlajw cha, 'ix 'awji. Caw 'ip x'awj 'icha yel yaw no león. Ax yic xlajw yawji, 'ay pax uque tzc'an̈ c'u 'ix paxtini.

⁴ Xlajwn̈ej spaxtin uque tzc'an̈ c'u cha, 'ijn xin tz'ib'j tas xwab'i, palta 'ay jun 'a satchan̈ 'ix aln 'ayn 'ixtic: —A tas xyal uque tzc'an̈ c'u cha, ton̈j tza mol 'a a nab'en. Man̈ a tz'ib'oc, xchi 'ayin.

⁵ Ax jun ángel te'n 'ejm yoc 'a yib'n̈ a mar yet' 'a sat lum cha, 'ix ya'n q'ue swach' c'ab' 'a satcha'an̈.

⁶ Ax yic xpaxtini, 'ix slocn sb'i Dios pitzn 'a jun 'ejmn̈ej, atn jun b'ojnac satcha'an̈, sat lu'um, a mar, yet' jantcn̈ej tas 'ay 'a jun tzo'n̈ cha. 'Ix yaln jun ángel chi 'ixtic:

⁷ —Man̈x 'oj 'ec' tiempo yel'ch tas nab'il yuj Dios. A yic 'oj syamn 'och jun yucl ángel yutz'n strompeta, ax yel'chi tas snajnac cha. A jun snajnac can cha, alb'il 'a eb' ya'mal servil, atn eb' schecab', xchi jun ángel cha.

⁸ Ax jun 'ix aln 'ayn 'a satcha'an̈, xyaln jun 'ejm xo 'ayn 'ixtic: —'Ixic, 'at chaj jun ch'an̈ yune un̈ jacan, atn jun 'ayc' 'a yol sc'ab' jun ángel te'n 'ejm yoc 'a yib'n̈ a mar, yet' 'a sat lu'um, xchi.

⁹ Yuj cha, in 'at 'a jun ángel cha, xin c'ann ch'an̈ un̈ chi 'a 'a. 'Ix yaln 'ixtc 'ayin: —Cha'aj, c'uxu. Caw chi 'oj 'och 'a yol a ti 'icha yalchab'. Ax 'a yol a c'ojol, caw c'a 'oj 'ajoc, xchi 'ayin.

¹⁰ Xlajw cha, xin chan ch'an̈ un̈ chi 'a jun ángel cha. Xin c'uxni, caw chi x'och 'a yol in ti 'icha yalchab'. Ax 'a yol in c'ojol, caw c'a x'aji.

¹¹ Xlajw cha, 'ix alx pax 'ixtc 'ayin: —Yowlal 'oj al jun 'ejm xo, tastc 'oj 'aj junjn c'aj 'anma', junjn nacion̈, junjn ti'al, yet' jun tzo'n̈ eb' rey, xchi 'ayin.