Am 9 - Chuj San Sebastian Bible

May junc mach 'oj stac' s'at 'elc*r* 'a sb'eyc'ojlal Jehová

¹ Ax xwilni 'ayc' Jehová 'a stz'ey jun yet'l xajmb'al, 'ix yaln 'ayn 'ixtic: Mac' wecchjoc jun tzo'n̈ yoyl watut tic, masnto tz'ib'x sjolm yoyl cha, ax yem lan̈njoc 'a yib'n̈ eb' 'anma'. Toto 'ayt eb' ma'oj chamoc, ax yet' q'uen espada 'oj wac' milxoc cham eb', wach'xam 'oj 'at eb' 'elc yalni, palta may junc mach 'oj colchjoc can 'eli.

² Wach'xam cob' 'oj 'at sc'ub'c 'el sb'a eb' 'a xab'l yich lum lu'um, palta 'oj 'at wic' q'uet eb' ta', wach'xam cob' 'oj q'ue eb' 'a satcha'an̈, palta 'oj wic' 'emt eb' ta'.

³ Toto 'oj cob' 'at sc'ub'c 'el sb'a eb' 'a sjolm lum witz Carmelo, palta 'oj 'at in yam cot eb' ta'. Toto 'oj cob' 'at sc'ub'c 'el sb'a eb' 'a yich a mar, 'oj in checb't junc no niwc noc' 'ay 'a yojl a mar cha, ax no 'oj 'at chinc eb' ta'.

⁴ Wach'xam 'oj 'ijxoc 'at eb' 'icha presoal yuj eb' 'ajc'ojol, palta 'oj 'at wac' tzu'xoc cham eb' yet' q'uen espada. 'Oj wa'n̈j 'och syailal eb', man̈oc wach'l 'oj wac' 'a eb', xchi Dios.

⁵ A Jehová Cajlil tztac' yuj smasnil, a yic tz'och yamn 'a lum lum tic, yajn̈ej tz'ulb'x 'ejm lu'um, ax eb' cajn 'a sat lu'um, caw tz'oc' eb'. Tzq'ue wan lum 'a cha'an̈, tz'ejm paxi, 'icha tzyac' a Nilo, tzq'ue wa'an, tz'ejm pax a'.

⁶ A Jehová xb'on satcha'an̈, a x'a'n 'ec' jen̈n 'a yib'n̈ lum lum tic. A tz'awtn cot eb' a cotc a 'a a mar, tzya'n 'ejm secnjoc a 'a yib'n̈ lum lum tic. Jehová ton wal sb'i.

⁷ A Jehová chi tzaln 'ixtic: Ex israel, lajn ex 'a in sat 'icha eb' 'aj Etiopía. 'Icha wal wutjnac wi'n cot eb' e mam eyichm 'a Egipto, 'ixta pax xwutj wi'n cot eb' filisteo 'a Creta, yet' eb' arameo 'a Kir, xchi.

⁸ A Jehová tz'iln jun nacion̈ tic yet' sreyal, to caw maysch'olnil eb', yuj cha, tzyaln 'ixtic: 'Oj in satl jun nacion̈ tic, palta an Jehová in, an tzwala, to ma'oj in satl smasnil eb' yin̈tl Jacob tic 'a jun 'ejmn̈ej.

⁹ 'Oj wac' chayxoc eb' yin̈tl Israel tic 'a scal smasnil nacion̈, 'icha wal tz'aj schayx 'ixm trigo 'a junc chaylab', may junc yol sat 'ixm tzcan 'a sat lu'um.

¹⁰ Palta smasnil eb' maysch'olnil 'a scal eb' in chon̈b' tic, 'oj tzu'xoc cham eb' yet' q'uen espada, atn smasnil eb' tzaln 'ixtic: A jun tzo'n̈ yailal cha, ma'oj jawc 'a quib'n̈ec, ma'oj qui yamchj yu'uj, xchi cob' eb', xchi Dios.

A sb'omb'il pax chon̈b' Israel

¹¹ 'Ix yaln pax Jehová 'ixtic: A yopiso David, satnc 'ejmi, 'icha junc n̈a lan̈chjnac 'ejmi, palta 'ay jun c'ual 'oj in b'ox chan̈ jun 'ejm xo, ax wa'n pax jun 'opiso chi 'a yin̈til, 'icha xon 'a yic yaln̈taxi.

¹² 'Ixta to b'i'an, a jantcto eb' 'aj Edom 'oj to canoc, yet' smasnil jun tzo'n̈ nacion̈ to wic xon yaji, 'oj 'ochcn eb' 'a yol sc'ab' yin̈tl Israel, xchi Dios. A Jehová aljnac jun tic, yowlal 'oj 'el'choc.

¹³ Tzyaln pax Jehová 'ixtic: 'Ay jun tiempoal 'oj jawoc, mantzac lajw spolx chan̈ 'ixm trigo ax sjaw pax stiempoal yawx 'ixm jun 'ejm xo. Mantzac lajw ste'x 'el yalil te uva, ax yawx pax 'ixm trigo. Ax 'a eb' lum jolmctac witz, yet' 'a eb' lum tzalctac, man̈x jantcoc yal uva 'oj yac'a', 'oj b'ey yoctc 'icha a a',

¹⁴ yujto 'oj wi'x cot eb' in chon̈b' 'a 'aj 'aycn 'at 'icha presoal, ax sb'on pax chan̈ eb' schon̈b' lan̈chjnac 'ejmi. 'Oj canx cajn eb' 'a 'a, 'oj yawc eb' te uva, ax yu'n eb' yalil te'. 'Oj yawc eb' yawb'ente', ax slon eb' sat te'.

¹⁵ An Jehová Dios in, an tzwala, to 'oj wac' scajx eb' slu'um. A slum eb' 'oj wac' cha, man̈x 'a b'a'n̈ 'oj 'ijxoc 'el eb' 'a sat jun 'ejm xo, xchi Dios.