Am 8 - Chuj San Sebastian Bible

A jun xuc sat 'awb'ente 'ec'um

¹ Atn jun tic sch'ox Jehová 'ayin: 'Ay jun xuc sat 'awb'ente caw 'e'm xo.

² 'Ix sc'anb'n 'ayn 'ixtic: —¿Tas tzel Amós? xchi. —Tzwil jun xuc sat 'awb'ente caw 'e'm xo, xin chi 'a 'a. Xlajw cha, xyaln Jehová 'ayn 'ixtic: —A chon̈b' Israel, caw x'e'max yet' smul, yuj cha, man̈x 'oj wac' niwnc'ojlal jun 'ejm xo.

³ A wal yic 'oj wa'nc 'och syailal 'a jun c'ul cha, a b'it tz'och xon 'a yol yatut Dios, a 'oj meltzjoc 'och 'a 'o'lal. Caw niwn 'anma 'oj chamoc. T'occtac xoj 'oj 'ajcn sniwnal eb', ax scan jun lugar tic 'a sictaquil, xchi Jehová.

La'n xo yaj b'eyc'ojlal 'a Israel

⁴ Tzcham wal e maclni eyab' jun tzo'n̈ paxti tic ex tzeyixtj eb' 'emmquilal yeq'ui, yet' eb' meb'a 'a qui nacion̈ tic.

⁵ Ax tic tzeyal 'ixtic: Comnoc tzjapx q'uin̈ yic tzpa'x 'uj sec 'oj sta'x qui chon̈n qui trigo. Comnoc tzjapx sc'ul 'iljelal muc'uc sec 'oj stac' qui chon̈n sat cawb'en 'a chan̈ stojol, ax qui c'anlb'an quechtab' to man̈ tz'acnoc.

⁶ 'Oj qui chon̈c 'ixm qui trigo to man̈x 'a swach'il. 'Oj quixtquec eb' meb'a tic, masnto 'oj schon̈ch sb'a eb' 'ayn̈ec, ax yochcn eb' qui mosooc. 'Ixta 'oj yutc eb' stupn 'el sb'oc 'ayn̈ec, wach'xam cojn yuj jun mojc xan̈b' eb', xe chi.

⁷ Yuj cha, xya'n Jehová sti', atn jun mach yijnac chan̈ Jacob, xyaln 'ixtic: May b'a'n̈ 'oj sat in c'ojl 'a smul eb' cha.

⁸ 'Oj 'ib'xoc lum lum yuj smasnil jun tzo'n̈ tic, 'oj 'oc' smasnil eb' cajn 'a 'a. 'Oj q'ue wan lum 'a cha'an̈, ax yejm paxi, 'icha tzyac' a Nilo, tzq'ue wa'an, tz'ejm pax a'.

⁹ An Jehová in, an tzwal 'ixtc yuj jun c'u 'oj jawc cha: Caw wal chimc'ual, ax wa'n 'och q'uic'q'uinal, yic wach' yem yoc c'u, ax wa'n q'uic'b'oc 'el yolyib'n̈q'uinl tic.

¹⁰ A e q'uin̈ tzlaj eya'chi, 'oj wac' meltzjoc 'och cusc'ojlal 'ayex. Ax e b'it tzlaj e b'itnoc, a 'oj 'ochcn 'oc'lal 'ayx yuj chamel. Axn̈ej pichl yic cusc'ojlal 'oj eya'chi, ax e joxn 'el xil e jolom, yuj e ch'oxn 'el e cusc'ojlal. 'Oj eyoc' 'icha junc mach tz'oc' yuj schamlil jun c'otc yunnal, caw man̈ wach'c 'oj 'aj slajw c'och smasnil.

¹¹ An Jehová in, an tzwala: 'Ay jun c'ual, 'oj wa' cot wejl 'a yolyib'n̈q'uinl tic: Man̈ wejloc yuj tas tzc'uxxi yet' yuj tas tz'u'x yuj tacn̈ti'al, palta wejl yuj snib'x 'ab'xoc in paxti'.

¹² 'Oj oyb'xoc 'ec' eb' 'anma sayn 'ec' mach tzaln 'el in paxti'. 'Oj 'at eb' 'a sti a Mar Muerto, masnto 'oj c'och eb' 'a sti a Mar Mediterráneo. 'Oj 'ec' eb' 'a schan̈paq'uil yolyib'n̈q'uinal, palta may mach 'oj 'ilchjoc yuj eb'.

¹³ A wal eb' 'ix cob'stac 'ix caw wal wach' yilxi, yet' eb' quelmtac winc caw 'aych 'a ste'nal, 'oj 'el yip eb' yuj tacn̈til 'a jun c'ul cha.

¹⁴ 'Ixta wal 'oj 'aj eb' tz'a'n sti 'a jun tzo'n̈ yechl q'uixweltac yilx 'ay 'a Samaria, atn eb' tzaln 'ixtic: Tzwac' in ti 'a sb'i sdiosal eb' 'aj Dan, mto 'a sb'i sdiosal eb' 'aj Beerseba, xchi eb'. Yuj wal jun cha, man̈x 'a b'a'n̈ 'oj q'uex wan eb', xchi Dios.