Am 7 - Chuj San Sebastian Bible

Yiljnac Amós 'oxe tas 'a 'icha waychil

¹ A yic tot lajwnac smolx chan̈ jun tzo'n̈ sb'ab'l 'awb'en win rey, yic wan xo scotx swol jun 'ejm xo, ata sch'ox Jehová Dios 'ayin, to wan ya'n pitzwc chan̈ e no c'ulub'.

² Wan xo slajw 'ejm te c'ultc yuj no', 'ix waln 'ixtc 'a Dios: —Mamin Jehová, 'ac' wal niwnc'ojlal 'ayn̈ an̈ yin̈tl on̈ Jacob tic on̈, caw wal yune chon̈b'al on̈ on̈. Caw ma'oj techjoc jun tic cuj on̈, xin chi.

³ Yuj cha, snan Jehová yuj jun tic, 'ix yaln 'ixtic: —A jun tic, ma'oj ujoc, xchi.

A jun c'ac'

⁴ 'Ix sch'oxn pax Jehová Dios junx tic 'ayin: 'Ix wilni to c'ac' 'ix sc'anlb'ej yic xya'n 'och yailal, caw tzxexni 'icha stzac'ac', 'ix tup chan̈ a niwquil mar yu'uj, xtacj pax chan̈ lum lum tic.

⁵ 'Ix waln 'a 'ixtic: —Mamin Jehová, 'el cab' wal 'a a c'ojl och wa'an, ¿tom 'oj techjoc cuj an̈ yin̈tl on̈ Jacob tic on̈? Caw yune chon̈b'al on̈ on̈, xin chi.

⁶ Yuj cha, 'ix snan Jehová yuj jun tic, 'ix yaln 'ixtic: —Ma'oj ujc pax jun tic, xchi.

A jun plomo yic alwanil

⁷ 'Ix sch'oxn pax Jehová Cajlil junx tic 'ayin: 'Ix wilni to lin̈n 'ec' 'a stz'ey jun muro b'ob'il, yet' junc plomo tzc'an eb' alwanil, yamb'il jun plomo chi yu'uj.

⁸ Xlajw cha, scanb'n Jehová chi 'ayn 'ixtic: —¿Tas tzel Amós? xchi. —'Ay jun plomo yic eb' alwanil tzwila, xin chi 'a 'a. Yuj cha, 'ix yaln 'ixtc 'ayin: —'Icha tz'aj stojlb'tzax junc yisquinyoal n̈a yet' junc plomo, 'ixta pax 'oj wutc in tojlb'tzan eb' israel, tom tojl yaj sb'eyb'al eb', mto ma'ay. Toto man̈ wach'oc, man̈x 'oj wac' niwnc'ojlal 'a yib'n̈ eb' jun 'ejm xo.

⁹ A jun tzo'n̈ smacsej eb' yin̈tl Isaac 'aj tzyac' eb' 'emmquilal 'a lum jolmctac witz, c'uxn 'oj satli. A jun tzo'n̈ yatutal sdiosal eb' israel, 'oj lan̈chjoc can 'ejmi. 'Oj in satl eb' yin̈tl Jeroboam yet' q'uen espada, xchi Jehová.

A win Amós yet' win Amasías

¹⁰ A Amasías ya'mal 'och sti eb' 'anma 'a Dios 'a chon̈b' Bet-el, a 'ix 'a'n alxoc 'a Jeroboam sreyl Israel 'ixtic: Mamin rey, a win Amós wan yec' win 'a scal eb' quit chon̈ab', yic tz'och eb' 'ajc'ojlal 'ayach. Caw matz techj yuj eb' 'anma tas tzyal-l win cha.

¹¹ Tz'ec' yal-l win 'a qui calc 'ixtic: 'Oj cham Jeroboam yuj q'uen espada, ax yijx can 'at smasnil eb' quit israelal 'icha presoal 'a chuc chon̈b'al, xchi Amós cha, xchi Amasías.

¹² Xlajw cha, xya'n win Amasías alxoc 'a Amós 'ixtic: —'Eln̈ 'a tic ach schecb' Dios, 'ixc 'a Judá. Ata 'oj 'ilchjoc tas tza c'ux yuj a paxti tzal-l cha,

¹³ palta may cab' tas tzal-l 'a yib'n̈ Bet-el tic, yujto a 'a tic tz'och win rey 'emmquilal, caw niwn yel'ch jun n̈a tic 'a smasnil yol qui macb'en tic on̈, xchi Amasías cha.

¹⁴ 'Ix ta'w Amós 'a win 'ixtic: —An tic, man̈ schecb'oc Dios waji, matz in nib'j pax 'ixta tzin b'o'o. An tic, cajm in noc', si'm in sat calte'al higo, wach'n̈j yilchj tas tzin c'uxu.

¹⁵ Palta a Jehová in 'i'n 'och wan 'a cajj noc' cha, 'ix yaln 'ayn 'ixtic: 'Ixic 'at al-l in paxti 'a chon̈b' Israel, xchi.

¹⁶ Yuj cha, tzcham wal a maclni spaxti Jehová tic. Atn jun tzo'n̈ tzal 'ayn yuj 'ixtic: Man̈ al-l jun tzo'n̈ spaxti Dios 'a eb' israel, atn eb' yin̈tl Isaac, xa chi.

¹⁷ Yuj cha, atn jun tzo'n̈ tic tzyal Jehová 'ayach: Wal 'a sat eb' chon̈ab' ax yoch 'ix estzil 'ajmul 'ixal. Ax eb' onnal yet' eb' esil, 'oj tzu'xoc cham eb'. 'Oj pojxoc 'ec' lum a lu'um. Ach xo ach tic, a 'a slum eb' chuc chon̈b'al, ata 'oj a chami, ax eb' et israelal, caw najt 'oj 'ijxoc 'at eb' 'icha presoal, xchi Dios 'ayach.