Am 4 - Chuj San Sebastian Bible

¹ Ex 'ix to caw wal b'a'ch ex 'icha no wacx wach' yajx servil, ex to cajnex 'a lum stzalnil Samaria, 'ab'c wal jun tic. Caw tze yixtj eb' meb'a', yet' eb' 'oltac yilx 'ochi. Tzeyaln 'a eb' eyichmil 'ixtic: 'Ijec cot te 'an̈, to tzcu'jec te', xe chi 'a eb'.

² A Jehová Cajlil, sloc sb'i yic ya'n can sti 'ixtic: 'Ay wal jun c'u 'oj jawoc, 'oj locxoc 'och jun tzo'n̈ q'uen q'uen 'ayex, ax e jucxb'eyoc, ax eb' eyune', 'oj locxoc 'och q'uen niwc luc'b' 'a eb', ax sjucx 'at pax eb' 'a najat.

³ An Jehová in, an tzwala, to caw stzol-l 'oj eyaj eyijx 'el 'a 'aj 'oj ma'xoc 'ejm lan̈chjoc jun tzo'n̈ n̈a cha, ax e julx can 'at 'a caw najt cha.

A jun tennb'ilal to man̈ yeloc

⁴ An Jehová in, an tzwala: 'In tze nib'j e b'o tas tze nib'ej, yuj cha, 'ixquec 'a Bet-el, yet' 'a Gilgal 'aj tz'och jun tzo'n̈ niwc yamnil, 'a'c e nab'en e b'on jantc maysch'olnilal tze nib'j e b'o ta'. 'Ijc 'at e xajmb'al 'a junjn sq'uin̈b'ial, 'a'c e diesmo 'a yoxtquil c'ual.

⁵ 'A'c tz'a 'ixm pan may yich ofrendail yuj e alj yuj diosal. Alc 'el 'a scal smasnil 'anma', yuj jantc eyofrenda tz'el wal 'a e c'ojl eya'ni, 'in a chi caw tze nib'j e b'o'.

A stenmtacl eb' israel

⁶ An Jehová in, an tzwala, to an xwac' eyab' syal wejl 'a smasnil yol e chon̈b' tic, palta man̈ yujoc cha, ex meltzj cot paxt 'ayin.

⁷ 'Ix wi'n pax 'och wan n̈ab' 'a 'oxe 'ujal yic mantzac 'el-l sat eyawb'en. 'Ix wac' 'ejmc n̈ab' 'a yib'n̈ junc chon̈ab', ax 'a junc xo, ma'ay, 'ay 'aj xyac' n̈ab' cha, 'ay pax 'aj ma'ay, yuj cha, xtacj chan̈ 'awb'en.

⁸ A chab' 'oxe chon̈b'al ex tic 'aj may n̈ab', ex 'at sayj a 'a junc xo chon̈b' 'aj caw 'ay n̈ab', palta man̈ niwnoc a x'ilchj 'eyu'uj, ma'ix 'ec' e tacn̈ti'al. Palta man̈ yujoc cha, ex meltzj paxt 'ayin.

⁹ An Jehová in, an tzwala, ex wac' cuenta yet' jun niwquil 'ic', yet' pax jun tzo'n̈ xo yailal, xwa'n 'ixtxoc 'el eyawb'en, yet' eyuva. Ax no c'ulb' xwac' c'uxnc 'ejm e higo, yet' e olivo. Palta man̈ yujoc cha, ex meltzj paxt 'ayin.

¹⁰ Wa'jnac cot jun tzo'n̈ yailal 'a eyib'an̈, 'icha wal wutjnac wa'n cot yailal 'a Egipto. 'Ix wac' milxoc cham eb' eyunnal 'a scal owal, ax eb' 'ajc'ojl yajch 'ayx cha, a eb' 'ix 'i'n can e chej. Til wal 'aj 'e'nc sjab' eb' chamnc 'a e camplamento. Palta man̈ yujoc cha, ex meltzj paxt 'ayin.

¹¹ An Jehová in, an tzwala, ex wac' lajwc 'el 'icha 'ajnc slajw 'el eb' 'aj Sodoma, yet' eb' 'aj Gomorra, yuj cha, ax jaywn̈ ex cannc ex tic, lajn ex xoj 'icha junc te cux tz'ijx can 'elt 'a scal te c'ac'. Palta man̈ yujoc cha, ex meltzj paxt 'ayin.

¹² 'Ixta wal 'oj ex wutc ex israel, 'a'c lista e b'a, yujto 'oj eyil-lac 'och e sat wet' an e Diosal in tic. ¿Tom 'oj e techj 'ayin?

¹³ 'In an b'ojnac eb' lum niwc witz, yet' pax 'ic'. Tzwac' yojcoc 'el eb' 'anma cha tas nab'il wu'uj. An tzin jelmtej 'och sacq'uinl 'a q'uic'q'uinlal, tzin 'ec' pax 'a caw schan̈il yib'n̈ lum lum tic. Jehová Dios tztac' yuj smasnil, 'ixta yalx in b'i, xchi Dios.