Am 3 - Chuj San Sebastian Bible

A smunljel eb' schecb' Dios

¹ Ex wit israelal, 'ab'c wal tas tzyal Jehová, atn jun 'ijnac 'elt eb' qui mam quichmec 'a Egipto, a tzaln 'ixtic:

² Ex israel, to cojn ex sic'b'ilx 'elt wuj 'a scal smasnil eb' chon̈b' 'ay 'a yolyib'n̈q'uinal. Yuj cha, 'oj wa'ch yailal 'a eyib'n̈ yuj smasnil maysch'olnil tze b'o'o, xchi.

³ Toto 'ay chawn̈oc 'anma moln sb'eyi, tzyal 'el'chi, to wach' yaj eb'.

⁴ Toto tz'el yaw no león 'a scal te', tzyal 'el'chi tox 'ix yamchj schib'j no tzyal cha. Toto tz'el yaw no cotc león 'a yet'l 'a yoltc n̈aq'ue'en, tzyal 'el'chi, 'ay junc tas xyamchj yuj no'.

⁵ Toto tz'ejm junc no ch'ic 'a sat lu'um, tzyal 'el'chi, 'ay junc yal 'ay 'ejmi. Toto tzq'ue wan tza'njoc junc yal chi 'a sat lu'um, tzyal 'el'chi, 'ay junc tas x'och 'a yojol.

⁶ Toto tz'utz'x q'uen trompeta 'a scal chon̈ab', caw tzxiw chan̈ smasnil 'anma'. Toto 'ay tas 'ay smay tz'ec' 'a scal chon̈ab', tzyal 'el'chi, a Jehová tz'a'n b'o 'ixta'.

⁷ An̈jtona', toto 'ay tas tzb'o Jehová Dios, yowlal tzyalcn 'a eb' schecb' b'ab'el.

⁸ Smasnil 'anma tzxiwi, toto tz'el yaw no león. An xo, ¿tom ma'oj wal-l spaxti Jehová Cajlil, toto a tzaln 'ayin?

'Oj lan̈chjoc 'ejm Samaria

⁹ Alc 'el jun tzo'n̈ tic 'a scuartel Asdod, yet' 'a jun tzo'n̈ cuartel 'a Egipto: Cotn̈ec 'a lum jolmctac witz 'a Samaria. 'Iltec wal tz'aj somchj chan̈ eb' 'anma yuj yixtm 'anma'il, xe chi.

¹⁰ A Jehová a tzaln 'ixtic: Caw man̈ yojcoc eb' sb'on jac tas tojol. A 'a yol yatut eb', ata molb'il tas ton̈j tzyij 'ec' eb' 'a eb' 'anma', xchi.

¹¹ Yuj cha, tzyaln pax Jehová Dios 'ixtic: 'Ay jun 'ajc'ojl 'oj jawoc, 'oj 'och oyn 'a snacion̈ eb' tic, 'oj sma'cn lan̈chjoc scuartel eb', ax yi'n pax 'elt smasnil tas 'ay 'a yol sdespacho eb', xchi.

¹² A Jehová a tzaln 'ixtic: A jaywn̈ocx eb' 'aj Samaria 'oj colchjoc, cojxn jac sc'axpil xila, mto sc'axpil sch'at eb' 'oj yic' ax s'at eb' 'eloc. Lajn 'oj 'aj eb' 'icha tzyutj junc 'ilm calnelu scoln 'el chab'oc yoc mto jac sti schicn no calnelu 'a sti no león, xchi.

¹³ A Jehová Dios tztac' yuj smasnil, a tzaln 'ixtic: 'Ab'c ax tic, tzlajw cha, tzeyaln 'el 'a eb' yin̈tl Jacob:

¹⁴ A yic 'oj jawc jun c'u yic 'oj wa'nc 'och yailal 'a yib'n̈ eb' israel yuj jantc smaysch'olnilal eb' tzb'o'o, a yic cha, c'uxn 'oj in ma'cn lan̈chjoc jun tzo'n̈ yet'l xajmb'al eb' 'a Bet-el. A sch'ac jun tzo'n̈ yet'l xajmb'al cha, 'oj ma'xoc 'ejm b'uychjoc 'a sat lu'um.

¹⁵ An Jehová in, an tzwala, 'oj in mac' lan̈chjoc jun tzo'n̈ n̈a tzc'anlb'ax 'a yic stiempoal si'ic, yet' jun tzo'n̈ tzc'anx 'a yic stiempoal c'ac'. 'Oj in mac' lan̈chjoc jun tzo'n̈ n̈a 'aych q'uen marfil yelwnub'loc, atn jun tzo'n̈ niwc n̈a, xchi Dios.