Am 1 - Chuj San Sebastian Bible

Yailal 'a eb' nacion̈ 'a stz'ey Israel

¹ An Amos in tic, cajm in noc' 'a chon̈b' Tecoa, a yic 'aych win Uzías reyl 'a chon̈b' Judá, ax Jeroboam, yunnal Joás, a 'aych reyl 'a Israel. Chab'oct ab'il sjaw jun niwquil quixcab' 'a jun chon̈b' tic, 'ix yaln Dios 'ayin to tzwal jun tzo'n̈ paxti tic 'ixtc 'a yib'n̈ chon̈b' Israel.

² 'Icha wal sc'an̈ c'u, 'ixta wal yab'x sjaj Jehová 'a tzaln Sión 'a Jerusalén. Smasnil te c'ultc tzlo no noc', caw tz'em lojljoc xil te stacj 'a sat lu'um, tztacj pax 'ejm te c'ultc 'ay 'a jolm witz Carmelo.

A chon̈b' Siria

³ A Jehová a 'ix aln 'ixtic: A wal eb' 'aj Damasco, man̈x jantcoc maysch'olnil sb'o eb', yuj cha, yowlal 'oj wa'ch yailal 'a yib'n̈ eb', yujto 'icha wal tz'aj ste'x 'ixm trigo, 'ixta wal x'aj yixtx 'el eb' 'aj Galaad yuj eb'.

⁴ A ticnec, 'oj wac' n̈usxoc tz'a yatut eb' rey yin̈tl can Hazael. A jun c'ac' chi 'oj satnc 'el jun tzo'n̈ sdespacho win Ben-hadad.

⁵ 'Oj in ma'poj smasnil spuertail chon̈b' Damasco. 'Oj in satl eb' 'anma cajn 'a span̈nil lum Avén, yet' win yajl yaj 'a Bet-edén, ax eb' 'aj Siria, 'oj 'ijxoc 'at eb' mosoal 'a chon̈b' Kir, xchi Jehová.

A chon̈b' Filistea

⁶ Xyaln pax Jehová 'ixtic: A wal eb' 'aj chon̈b' Gaza, man̈x jantcoc maysch'olnil sb'o eb', yuj cha, yowlal 'oj wa'ch yailal 'a yib'n̈ eb', yujto xyij 'at eb' smasnil eb' chon̈ab', axta schon̈ch eb' mosoal eb' 'a Edom.

⁷ Yuj cha, 'oj wac' n̈usxoc tz'a smuroal Gaza cha. Ax jun c'ac' chi 'oj satnc 'el jun tzo'n̈ scuartel eb' soldado.

⁸ 'Oj in satl eb' cajn 'a chon̈b' Asdod, yet' eb' yajl yaj 'a chon̈b' Ascalón. Yet' wal smasnil in poder 'oj in c'och tza'njoc 'a chon̈b' Ecrón, man̈x 'a junc eb' filisteo chi 'oj canoc, xchi Jehová.

A chon̈b' Tiro

⁹ Xyaln pax Jehová 'ixtic: A wal eb' 'aj chon̈b' Tiro, man̈x jantcoc maysch'olnil sb'o eb', yuj cha, yowlal 'oj wa'ch yailal 'a yib'n̈ eb'. 'Ix schon̈ch eb' jun chon̈b'al eb' 'anma mosoal 'a chon̈b' Edom, man̈x 'ic sna cot eb' jun strato yet' eb', chajtlto swach'c'ojl sb'a eb'.

¹⁰ Yuj cha, 'oj wac' n̈usxoc tz'a chon̈b' Tiro cha, ax jun c'ac' chi 'oj satnc 'el jun tzo'n̈ scuartel eb', xchi.

A chon̈b' Edom

¹¹ A Jehová tzaln 'ixtic: A wal eb' 'aj Edom, man̈x jantcoc maysch'olnil sb'o eb', yuj cha, yowlal 'oj wa'ch yailal 'a yib'n̈ eb'. Caw spech b'eyc'oc eb' smasnil eb' yican, atn eb' israel, yic tzmilx cham eb' yuj eb', may xon jac sniwnc'ojlal eb' 'a eb', tzb'on eb' tas tznib'j yet' yowl sc'ojl chi 'a eb'. Matz 'at satc'ojlal yowl sc'ojl eb' chi yu'uj.

¹² Yuj cha, 'oj wac' n̈usxoc tz'a chon̈b' Temán, ax jun c'ac' chi 'oj satnc 'el jun tzo'n̈ scuartel eb' 'aj Bosra, xchi.

A chon̈b' Amón

¹³ A Jehová tzaln 'ixtic: A wal eb' 'aj Amón, man̈x jantcoc maysch'olnil sb'o eb', yuj cha, yowlal 'oj wa'ch yailal 'a yib'n̈ eb'. Yujn̈ej snib'n eb' yi' jacx slum, yuj cha, xlaj stecnc 'elt eb' yolsc'ojl eb' 'ix 'ix yet'x yune cajn 'a yol yic Galaad.

¹⁴ Yuj cha, 'oj wac' n̈usxoc tz'a smuroal chon̈b' Rabá, ax jun c'ac' chi 'oj satnc 'el scuartel eb'. Caw 'oj 'el yaw eb' yuj owal. A jun owl cha, 'icha wal junc niwquil 'ic', 'ixta 'oj 'aj sjawi.

¹⁵ 'Oj 'atcn presoal sreyl eb' 'a chuc chon̈b'al, yet' eb' yit yajlil, xchi Jehová.