A Tas Sc'ulejnac Eb' Schecab' Jesús Hechos 8 - Chuj San Sebastian Bible

Yixtnac Saulo eb' creyente

¹ A Saulo, caw locn yet' eb' xmiln cham Esteban. Atn wal 'a jun c'u cha, 'ix 'el yich yajx 'och jun niwn yailal 'a yib'n̈ eb' creyente 'aj Jerusalén cha. Yuj cha, 'ix laj yi'nc 'el sb'a eb'. 'Ix laj 'at eb' 'a jun tzo'n̈ xo chon̈b' 'a yol yic Judea cha, yet' 'a Samaria. Cojxnn̈ej eb' schecb' Jesús 'ix can 'a Jerusalén cha.

² Xlajwn̈ej scham Esteban, 'ay jun tzo'n̈ winc 'aych snab'en 'a Dios, 'ix yi'n 'at eb' sniwnal, x'at smucnc eb'. Caw x'oc' eb' yu'uj.

³ Ax win Saulo, caw xyac' win stul 'a eb' creyente. Tzann̈j 'aj 'ay eb', x'och win 'a yol yatut eb'. 'Ix laj yi'nc 'elt win eb' winac, yet' pax eb' 'ix 'ix, x'at ya'nc 'och win eb' 'a preso.

Alb'il 'el wach' 'ab'x 'a Samaria

⁴ Palta a eb' creyente xlaj yi'l sb'a eb' 'a Jerusalén, tzann̈j 'aj xlaj c'och eb', 'ix laj yalnc 'el eb' wach' 'ab'x yic colnb'il.

⁵ Ax Felipe, 'ix c'och 'a chon̈b' Samaria. Ata xyalcn 'el yab'xil Cristo 'a scal eb' 'anma cha.

⁶ Ax eb' 'anma 'ayc' ta', c'uxn 'ix ya'ch eb' schicn 'a tas 'ix yal Felipe cha. 'Ix yiln pax eb' jun tzo'n̈ milagro 'ix sch'oxo.

⁷ A 'a jun chon̈b' cha, til wal eb' 'anma 'aych demonio 'a 'a. Ax Felipe chi xlaj 'i'nc 'el 'a eb'. Caw x'el yaw ewin demonio chi yel 'a eb'. Til wal eb' sicb'nac 'eli, yet' pax eb' matz tac' sb'eyi, xlaj b'ox can eb' yuj Felipe cha.

⁸ Yuj wal jun tzo'n̈ cha, caw 'ix tzalj eb' 'anma smasnil 'a jun chon̈b' cha.

⁹ Palta ata 'ay jun winc Simón sb'i. Caw tz'ixtx paxti eb' 'anma yuj winac, yujto tzyalch sb'a win wayjlil 'a scal eb'.

¹⁰ Wach'xam eb' may yel'chi, mto eb' niwn yel'chi, c'uxn xya'ch eb' snab'en 'a winac. 'Ix cob' yalnc eb' 'ixtic: —A win Simón tic, atn jun dios tzcuch niwn spoder, xchi cob' eb'.

¹¹ Caw xya'ch eb' snab'en 'a winac, yujto pecti syamjnac 'och win yixtn paxti eb' 'anma', yujto tzyal to tzuj yiln sb'a.

¹² Ax Felipe xaln 'el 'a scal eb', tas tz'aj eb' yoch 'a yol sc'ab' Dios. 'Ix yaln 'el yab'xil Jesucristo 'a eb'. Yuj cha, 'ay eb' winac, 'ay eb' 'ix, xlaj ya'ch eb' sc'ojl 'a tas 'ix yala. Xlajw cha, 'ix laj ya'n 'ajxc bautisar sb'a eb'.

¹³ 'Ixta pax win Simón cha, 'ix ya'ch pax win 'a sc'ojol. 'Ix ya'n pax 'ajxc bautisar sb'a winac. Xlajwn̈ej cha, junxn̈ej x'ec' win yet' Felipe. 'Ay jun tzo'n̈ milagro 'ix sch'ox Felipe cha, caw niwn yel'chi. Yuj cha, caw 'ix sat sc'ojl win Simón chi yilni.

¹⁴ Ax yic 'ix yab'n eb' schecb' Jesús 'ayc' 'a Jerusalén, chajtlto 'ay eb' 'aj Samaria 'ix ya'ch spaxti Dios 'a sc'ojol. Yuj cha, 'ix schecn 'at eb' Pedro yet' Juan ta'.

¹⁵ Yic 'ix c'och eb', 'ix leslwi eb' yuj eb' creyente 'aj Samaria cha, sec tz'ajx Yespíritu Dios 'a eb'.

¹⁶ Yujto mant 'a junc eb' tzchan Yespíritu Dios. Cojnant 'a sb'i Cajlil Jesús 'ajxnac bautisar eb'.

¹⁷ Ax Pedro yet' Juan, 'ix ya't eb' sc'ab' 'a sjolm eb'. 'Ixta to b'i'an, 'ix 'ajx 'och Yespíritu Dios 'a eb'.

¹⁸ Ax yic 'ix yiln win Simón, to a yic xya'n 'at eb' sc'ab' 'a sjolm eb' creyente cha, 'ix 'ajx 'och Yespíritu Dios 'a eb', yuj cha, xcob' yaltnoc win tumn 'a eb' schecb' Jesús cha.

¹⁹ 'Ix yaln win 'a eb' 'ixtic. —Mamtzac eyac' wopiso tic eyet'oc, sec wach' tzann̈j mach 'aj 'oj wa't in c'ab' 'a sjolom, 'oj scha eb' Yespíritu Dios wu'uj, xchi winac.

²⁰ Palta xyaln Pedro 'a win 'ixtic. —Sat cab' 'el a tumn chi et'oc. A jun tzyac' Dios 'a nab'an̈ej, ¿tom tza na'a, to tztac' a mann yet' jab' a tumn tic?

²¹ Ach tic, may aln ec quet' 'a jun copiso tic on̈, yujto man̈ tojloc a nab'en 'a sat Dios.

²² Yuj cha, na a b'a, tzactncan jun a maysch'olnil tic. C'an 'a Dios, sec toq'ue 'oj ach yac' niwnc'ojlal yuj tas wan a nan tic.

²³ Yujto tzwila, caw 'ay a chichnc'ojlal, an̈j maysch'olnil wan a'n servil, xchi Pedro 'a winac.

²⁴ Xyaln win Simón chi 'ixtic: —Leslwan̈c 'a Cajlil wu'uj, sec ma'oj jawc jun yailal chi tzeyal jawc 'a wib'n̈ cha, xchi winac.

²⁵ Xlajw cha, ax eb' schecb' Jesús, 'ix yaln 'el eb' yab'xil Jesús cha, tastc 'ix yil eb'. 'Ix yaln pax 'el eb' spaxti Cajlil. Til wal jun tzo'n̈ aldea 'a yol yic Samaria chi 'aj x'ec' yalcn 'el eb' wach' 'ab'x yic colnb'il. Xlajw cha, 'ix paxx eb' 'a Jerusalén.

A Felipe yet' win 'aj Etiopía

²⁶ 'Ay jun yángel Cajlil 'ix aln 'ixtc 'a Felipe: —'Ac' lista a b'a. 'Ixc 'a stojlal sur 'a yol jun b'e tzcot 'a Jerusalén, tzc'och 'a chon̈b' Gaza, xchi. A jun b'e cha, atn tz'ec' 'a cusltac lu'um.

²⁷ Yuj cha, 'ix ya'n lista sb'a, 'ix 'ati. Ax 'a yol b'e, ata xyil sb'a yet' jun winc 'aj Etiopía. A jun winc cha, 'ay yopiso win yuj 'ix Candace, 'ix yajl yaj 'a Etiopía cha. Molm tumn yaj win 'a 'ix. Xit' yal sb'a win 'a Dios 'a Jerusalén.

²⁸ Wan spax win 'a Etiopía. Wocn 'ejm win 'a yol jun scaruaje. Wan yawtn win Ch'an̈ Un̈ tz'ib'b'il can yuj Isaías, atn win schecb' Dios.

²⁹ Ax Yespíritu Dios 'ix aln 'a Felipe 'ixtic: —'Ixc 'a stz'ey jun caruaje cha, xchi.

³⁰ Ax yic xc'och Felipe 'a stz'ey win 'aj Etiopía cha, 'ix yab'ni, to wan yawtn win Ch'an̈ Un̈ tz'ib'b'il can yuj Isaías. Yuj cha, sc'anb'n 'a win 'ixtic: —¿Tzam nachj 'el o'oj, tas tzyal Ch'an̈ Un̈ wan 'awtn tic? xchi 'a winac.

³¹ 'Ix yaln win 'ixtc 'a 'a: —Toto may mach tzin cuyni, ¿tas wal 'oj wutc wojcan 'eli? ¿Mamtzac ach q'uet wet' 'a yol caruaje tic, tzach 'em wocn jac 'a in tz'ey? xchi winac.

³² A Ch'an̈ Un̈ 'aj wan yiln winac, ata tzyal 'ixtic: 'Icha tz'aj yijx 'at junc no calnelu 'aj tzmilxi, 'ixta xyutj sb'a, may xon tas xyala, sictac yaj 'icha no calnelu tzjoxxi.

³³ Caw q'uixweltac 'oj 'aj yuj eb'. Toxn ma'oj sb'o xon yaj eb' jab'oc. May junc mach 'oj stac' yalni, to 'ay yin̈tl 'oj canoc. Yujto 'oj 'ijxoc 'el 'a yolyib'n̈q'uinl tic, xchi 'a Ch'an̈.

³⁴ Yuj cha, sc'anb'n win 'a Felipe 'ixtic: —¿Mamtzac al 'ayin, mach yab'xil jun tic yaljnac can win schecb' Dios cha? ¿Tom mun a yab'xil win yaljnac cani, mto chuc junc xo mach yaljnac can win yab'xil? xchi.

³⁵ Ax Felipe 'ix aln 'a winac, tas tzyal 'el'ch Ch'an̈ Un̈ cha. 'Ix syamn 'och yaln yab'xil Jesucristo 'a winac.

³⁶ Yic wan s'at eb' 'a yol b'e, 'ix c'och eb' 'a jun a a'. 'Ix yaln win 'aj Etiopía chi 'a Felipe 'ixtic: —Yaj jun a 'a tic. ¿Mamtzac stac' tzin a'cn bautisar ticnec? xchi winac.

³⁷ [—Tztac'a, toto smasnil a c'ojol, tza'ch a c'ojl 'a Cristo, xchi 'a winac. —Tzwa'ch 'a in c'ojol, chajtlto a Jesucristo, Yunnal Dios, xchi winac.]

³⁸ Xlajwn̈ej cha, xya'n win 'ijxc 'och wan jun scaruaje cha. 'Ix 'at win yet' Felipe 'a jun a cha. Ata xyac' 'ajxc can bautisar sb'a win ta'.

³⁹ Yic xlajw sq'ue paxt eb' 'a yol a cha, 'ix 'ijx 'at Felipe chi yuj Yespíritu Cajlil. Ax win 'aj Etiopía cha, man̈xtoc xyil win 'aj 'ix c'ochi. Palta 'ix 'atx win 'a yol b'e cha. Tzaljc'ojlal x'atx can winac.

⁴⁰ Ax Felipe cha, yajn̈j wal cha, xc'ochcn 'a chon̈b' Azoto. Xlajw xoj cha, 'ix 'atxi. C'uxn x'ec' yalcn 'el wach' 'ab'x yic colnb'il 'a jun tzo'n̈ xo chon̈ab', masnto xc'och 'a chon̈b' Cesarea.