A Tas Sc'ulejnac Eb' Schecab' Jesús Hechos 6 - Chuj San Sebastian Bible

Sic'b'il ucwn̈ eb' diácono

¹ A 'a jun tiempoal cha, 'ix niwtj sb'isl eb' creyente. Palta a eb' creyente griego sti', 'ix cot yowl eb' 'a eb' creyente hebreo sti', yujto yic 'ix 'ajx wa eb' meb'a 'a junjn c'u, man̈ tz'acnoc x'ajx yic eb' 'ix chamnc yichmil griego sti'.

² Yuj cha, 'ix 'awtx cot smasnil eb' creyente yuj eb' schecb' Jesús slajchwan̈il, 'ix yaln eb' 'ixtic: —'Ijn man̈xtzac tztac' caln 'el spaxti Dios on̈, yujto axn̈ej te mexa tic tzcac' cuenta on̈. Palta caw man̈ smojc tzcactj can caln 'el on̈.

³ Yuj cha, ex wu'tac, tze say ucwn̈oc winc 'a qui calc tic, tzeya'n 'och yopiso eb' sb'on jun munljel tic. Yowlal caw wach' sb'eyb'al eb', tznachj 'el yic Dios yuj eb', yowlal caw 'aych Yespíritu Dios 'a eb'.

⁴ An̈ xo tic on̈, an̈ja 'oj qui leslwi on̈, ax caln pax 'el spaxti Dios on̈, xchi eb' lajchwan̈ cha.

⁵ Caw 'ix tzalj eb' smasnil yuj jun paxti cha. Atn eb' tic 'ix si'x 'elt yuj eb': a Esteban, caw 'aych sc'ojl 'a Dios, caw 'aych Yespíritu 'a 'a, yet' Felipe, Prócoro, Nicanor, Timón, Parmenas, yet' pax Nicolás 'aj Antioquía. A Nicolás tic, 'ochnc 'a scuynb'il eb' israel 'a yic yalan̈.

⁶ Xlajw si'x 'el eb', 'ix 'ijx 'at eb' 'a yojltac eb' schecb' Jesús. Ax eb' schecb' Jesús cha, 'ix leslwi eb'. 'Ix ya'n 'at eb' sc'ab' 'a sjolm eb'.

⁷ A spaxti Cajlilec, caw 'ix wach' pucl 'a scal eb' 'anma'. Yuj cha, caw xwach' niwnb'i sb'isl eb' creyente 'a Jerusalén cha. Ax eb' ya'mal 'och sti eb' israel 'a Dios, caw niwn eb' xya'ch 'a sc'ojol.

Yamchjnac Esteban

⁸ Ax Esteban, til wal swach'c'ojlal Dios 'ix scha'aj. Caw x'och Dios yet'oc. Yuj cha, til wal milagro 'ix ch'oxl 'a scal eb' 'anma'.

⁹ Palta 'ay jun tzo'n̈ eb' israel tzyam sb'a 'a jun capiya tzcuch yic eb' 'Ac'b'ilx can 'el 'a Libre. 'Ay pax jun tzo'n̈ xo eb' 'aj chon̈b' Cirene, 'aj Alejandría, 'aj Cilicia, yet' eb' 'aj Asia. 'Ix c'och eb' 'a Esteban cha. 'Ix sten sb'a eb' yet'oc.

¹⁰ Palta ma'ix yac' ganar eb', yujto caw jeln xyutj sb'a yalni, yujto x'och Yespíritu Dios yet'oc.

¹¹ Ax eb' cha, ton̈j xlaj sman eb' jaywn̈ stestigo. 'Ix ya'n eb' sc'ojloc eb', sec tzyal eb' 'ixtic: —'Ix cab' yaln win Esteban chi on̈. Caw 'ix b'uchwj win 'a qui mam quichmec Moisés, xb'uchwj pax win 'a Dios, xchi cob' eb'.

¹² 'Ixta xyutj eb' stzuntzn chan̈ eb' chon̈ab', yet' ewin 'ichmtac winac, yet' ewin cuywjum 'a ley yic Moisés. Yuj cha, 'ix cot jucnjoc eb' 'a Esteban cha, 'ix syamn cot eb'. Xit' ya'nc eb' 'a yojltac ewin sat yajal.

¹³ Xlajw cha, 'ix sayn eb' jun tzo'n̈ xo eb' tz'a'n 'och 'es 'a yib'n̈ Esteban cha. 'Ix yaln eb' 'ixtc 'a ewin yajl cha: —A win Esteban tic, caw matz yactj can win sb'uchwj 'a yatut Dios, palta yicn̈ej Dios yaji. Tzb'uchwj pax win 'a ley yic Moisés.

¹⁴ 'Ix cab' yaln win 'ixtic: A Jesús 'aj Nazaret, a 'oj 'a'n lan̈chjc 'ejm yatut Dios. 'Oj yac' jelmjoc pax jun tzo'n̈ qui b'eyb'al 'ac'b'il can 'ayn̈ yuj Moisés, xchi winac, xchi cob' eb'.

¹⁵ Ax ewin yajl cha, yet' eb' wocn 'ejmta smasnil, 'ix 'och q'ueln eb' 'a Esteban cha. 'Ix yiln 'och eb' sat, caw lajn yilx 'icha sat junc ángel.