A Tas Sc'ulejnac Eb' Schecab' Jesús Hechos 25 - Chuj San Sebastian Bible

C'ochnc Pablo 'a yojltac Festo

¹ Ax win Festo cha, xc'och win 'a chon̈b' Cesarea, yic yoch win gobernadoral. Schab'jil xo schan win yopiso cha, x'at win 'a Jerusalén.

² Ax ewin sat ya'mal 'och sti eb' israel 'a Dios, yet' jun tzo'n̈ xo ewin 'ay yopiso, 'ix c'och ewin 'a winac, xit' ya'nc 'och ewin 'a yib'n̈ Pablo.

³ 'Ix sc'an ewin 'a Festo cha, sec toq'ue tz'ijx cot Pablo chi 'a Jerusalén cha. 'Ixta xyutj ewin yalni, yujto tznib'j ewin smil cham 'a yol b'e.

⁴ Palta xyaln win Festo 'a ewin 'ixtic: —Preso yaj Pablo 'a Cesarea ticnec. Yic to jaye c'u, 'oj in 'atx ta'.

⁵ Yuj cha, tztac' tz'at eb' eyajlil 'a Cesarea chi wet'oc. Toto 'ay smul Pablo cha, tztac' 'at yalnc eb' ta', xchi winac.

⁶ 'Aym wajxquec c'u, mto lajn̈ec c'u x'och wan win Festo 'a Jerusalén cha, xlajw cha, 'ix paxx win 'a Cesarea. Ax 'a junx c'u, 'ix 'em wocn win 'a sdespacho. Xlajw cha, xya'n win 'ijxoc 'at Pablo.

⁷ Yic xc'och Pablo 'a yojltac winac, ax ewin yit israelal xcot 'a Jerusalén, 'ix c'och oynjoc ewin 'a 'a. Man̈ jantcoc tas 'ix cob' ya'ch ewin 'a yib'an̈, palta may xon wal jac tzch'ox ewinac, toto yel tzyal ewinac.

⁸ Xlajw yaln ewinac, xyaln Pablo pax 'ixtic: —Toxn may jac in mul 'ochnc 'a ch'an̈ ley yic eb' wit israelal, may in mul 'ochnc 'a yatut Dios, may pax in mul 'ochnc 'a win yajl 'a Roma, xchi.

⁹ Palta snib'j win Festo to tzalj eb' israel yet'oc. Yuj cha, 'ix sc'anb'n win 'ixtc 'a Pablo: —¿Tzam a nib'j tzach 'at 'a Jerusalén, sec ata tzach in b'eyc'ojlej? xchi winac.

¹⁰ —A 'a sdespacho win yajl 'a Roma tzin c'anb't in b'a. Ata smoj tzin b'eyc'ojlaxi. 'In ojtac, caw may in mul 'ochnc 'a eb' wit israelal tic.

¹¹ Toto 'ay junc in mul smoj tzin cham yu'uj, chamquin cab'i'. Palta toto man̈ yelc tas tzya'ch eb' wit israelal tic 'a wib'an̈, toto 'ixta', may mach tztac' in ya'n 'och 'a yol sc'ab' eb'. Tic tzin c'anb't in b'a 'a win yajl 'a Roma, at win 'oj in b'eyc'ojlani, xchi Pablo 'a winac.

¹² Xlajw cha, 'ix sc'umn sb'a win Festo chi yet' jun tzo'n̈ ewin yit yajlil tz'a'n snab'enoc. Yuj cha, xyaln win 'a Pablo 'ixtic: —Ach tic, xa c'anb't a b'a 'a win yajl 'a Roma, yuj cha, ata 'oj ach wa't ta', xchi winac.

C'ochnc Pablo 'a yojltac rey Agripa

¹³ 'Ayxm sjayloc c'u, 'ix c'och win rey Agripa yet' 'ix Berenice 'a Cesarea cha, sec tzc'umj sb'a eb' yet' win Festo, yujto tot schajnac win yopiso.

¹⁴ Ata xcan eb' jaye c'u ta'. 'Ay jun c'u 'ix yaln win Festo 'a win rey cha, tas yaj Pablo, 'ix yaln win 'ixtic: —A yic yel Félix 'a yopiso, 'ay jun winc 'aycn 'och 'a preso yu'uj, Pablo sb'i.

¹⁵ Yic in xit' 'a Jerusalén, a ewin sat ya'mal 'och sti eb' israel 'a Dios, yet' ewin 'ichmtac winc 'ay yopiso, xc'och ewin 'ayin. 'Ix ya'n queja ewin Pablo chi 'ayin, snib'j ewin xwa'ch chaml 'a yib'an̈.

¹⁶ Yuj cha, xwaln 'ixtc 'a eb' 'aj Jerusalén cha: A yaj ley 'ayn̈ an̈ 'aj Roma on̈ tic on̈, matz tac' tzcomn 'ajx 'och chaml 'a yib'n̈ junc mach. Yowlal tzc'umj sb'a win yet' eb' tz'a'n queja chi 'a sat juez, sec tzya'lj win yi'n 'el 'a yib'an̈, xchi.

¹⁷ Yuj cha, ax yic 'ix jaw eb' 'a tic, ma'ix 'ec' tiempo wu'uj. A 'a junx c'u, in 'och 'a in despacho. 'Ix wa'n 'ijxc cot Pablo cha.

¹⁸ A in nani, to caw 'ay smul. Palta ax ewin x'a'n queja cha, may wal smul xya'ch ewin 'a yib'n̈ 'icha xwutj in nani.

¹⁹ Cojn xyal ewinac, to 'ay smul Pablo 'a scuynb'il eb'. 'Ix yaln ewin yuj jun win chamnc xo, Jesús sb'i. Ax Pablo tzalni, to pitzan. Yujn̈ej jun tzo'n̈ cha, tzya'n queja ewinac.

²⁰ An xo tic, ma'ix nachj wu'uj, tas tzwutj in b'onyaj eb'. Yuj cha, xin c'anb'n 'ixtc 'a Pablo: ¿Tzam a nib'j tzach 'at 'a Jerusalén, sec wach' ata tzach in b'eyc'ojlej? xin chi.

²¹ Palta xyaln 'ixtc 'ayin: Tic tzin c'anb't in b'a 'a win yajl 'a Roma. At win 'oj in b'eyc'ojlani, xchi Pablo 'ayin. Yuj cha, an xo xwala to tzcan 'a preso, masnto 'oj wa't 'a win yajl cha, xchi win Festo.

²² Xlajw yab'n win rey Agripa jun tzo'n̈ tic, 'ix yaln pax win 'ixtc 'a Festo cha: An̈jtona 'in, tzin nib'j tzwab' pax 'a Pablo cha, xchi winac. —Toto 'ixta', q'ui'nto 'oj ab' 'a 'a, xchi Festo chi 'a winac.

²³ Ax 'a junx c'u, 'ix c'ochx win rey Agripa yet' 'ix Berenice. Yel xo wal wach' yilx eb' yet' spichul. 'Ix 'och eb' 'a 'aj tzb'oyaj owal. 'Ix 'och pax ewin yajl soldado, yet' ewin checl yaj 'a sat eb' chon̈ab'. Ax win Festo cha, 'ix 'a'n 'ijxc cot Pablo.

²⁴ Xlajw cha, xyaln win 'ixtic: —Ach rey Agripa, yet' jantcn̈ej ex xeyam e b'a quet'oc, yaj Pablo tic. Til wal eb' israel 'ix aln 'ayn yu'uj, tolab' 'ay smul. 'Ix yal eb' 'ayn 'a Jerusalén. 'Ix yaln pax eb' 'ayn 'a Cesarea tic. Caw matz yactj eb' sc'ann 'och chaml 'a yib'an̈.

²⁵ Palta tzin na 'an tic, may junc smul smoj scham yu'uj. Tox 'ix sc'anb't sb'a 'a win yajl 'a Roma, atn win Augusto, sec a win 'oj b'eyc'ojlanoc. Yuj cha, tzin na'a, to 'oj wa'ti.

²⁶ Palta may tas wach' in tz'ib'n 'at 'a win yajl chi yu'uj, yuj cha, xwi'n cot 'a ojltac ach rey Agripa, yet' 'a eyojltac e masnil. A ticnec, c'anb'jec eyab' 'a 'a, toq'ue 'ay junc smul tz'ilchj eyu'uj, ax in tz'ib'n 'at 'a win yajl cha.

²⁷ ¿Tom 'oj stac' wa'n 'at junc mach 'aych 'a preso, toto matz in tz'ib'j 'at tas smul tz'och 'a yib'an̈? xchi win Festo cha.