A Tas Sc'ulejnac Eb' Schecab' Jesús Hechos 22 - Chuj San Sebastian Bible

¹ Ex 'ichmtac winac, yet' ex wit chon̈ab', 'ab'c jun tzo'n̈ in paxti 'oj wal 'ayx tic, xchi.

² Yic 'ix yab'n eb', chajtlto xpaxtin 'a sti hebreo, caw sictac x'aj eb'. Yuj cha, xyaln Pablo 'a eb' 'ixtic:

³ An tic, israel in eyet'oc. 'Aljnacn 'a chon̈b' Tarso, 'a yol yic Cilicia. Palta a 'a Jerusalén tic in q'uib' cha'an̈. Atn Gamaliel in cuyni. Caw in scuy wal 'a ley yic eb' qui mam quichmec si'mb'il. Caw tzwac' servil Dios 'a smasnil in c'ojol, 'icha tzeyutj e b'a e masnil ticnec.

⁴ A 'a yic yalan̈, caw wixtjnac eb' 'aych snab'en 'a Jesús. 'Ay 'aj xin yam cot eb'. Toxn̈ej winac, toxn̈ej 'ix, c'uxn xwa'ch eb' 'a preso. An̈jtona 'ay 'aj in miljnac cham eb'.

⁵ A win sat ya'mal 'och qui tic 'a Dios, yet' eb' yajl smasnil, tztac' yaln eb', chajtlto yel tzwala. Yujto a eb' 'a'jnac jun tzo'n̈ carta 'ayin, yic cob' wi'nc 'at 'a eb' quit israelal 'a chon̈b' Damasco. In cob' 'at 'a chon̈b' cha, yujto xin nib'j xin sayc' eb' creyente ta'. Xin nib'j x'at in jal cot eb', tzwul wa'nc eb' 'a Jerusalén tic, yic tz'ajx 'och syailal eb'.

Xyal Pablo chajtl yutjnac schan Jesús

⁶ Yuj cha, x'at cob' wi'nc cot eb'. Palta ax yic wan in c'och 'a sla'nil chon̈b' Damasco cha, tecn am chimc'ual, 'ay jun sacq'uinl xcot 'a satcha'an̈, caw ow yoc. 'Ix 'eml 'a wib'an̈, in can 'a scal.

⁷ In telw can 'ejm 'a sat lum yu'uj. Ax xwab'ni, yoch jun paxti', yaln 'ixtc 'ayin: Saulo, ¿tas yuj tzin a pech b'eyc'oc? xchi 'ayin.

⁸ Mamin, ¿mach ach? xin chi 'a 'a. An ton tic Jesús in, 'aj Nazaret in. Caw an tzin a pech b'eyc'oc, xchi 'ayin.

⁹ Ax ewin ajun wet' cha, yiljnac ewin jun sacq'uinl cha. Caw xiw ewinac. Palta ma'ix nachj 'el yuj ewinac, tas jun chi alb'il 'ayin.

¹⁰ Xlajw cha, xwaln 'ixtc 'a 'a: Mamin, ¿tas tza nib'j tzin b'o'o? xin chi. Q'uen̈ wa'an, 'ixc 'a Damasco. Ata 'oj alxoc 'ayach, tas yowlal 'oj a b'o', xchi Cajlil 'ayin.

¹¹ Palta toxn man̈xtzac stac' wiln yuj yoc jun sacq'uinl cha. Ax ewin ajun wet' cha, squetzn in 'at ewin 'a Damasco cha.

¹² Ata 'ay jun winc Ananías sb'i, caw yelc'ojlal yiclum win 'a ley yic Moisés. Caw wach' sb'eyb'al win 'a sat eb' quit israelal smasnil 'a Damasco cha.

¹³ 'Ix c'och win 'ayin, 'ix yaln 'ixtic: Wu'tac Saulo, jacw cab' a sat tic, xchi. Yajn̈j wal cha, 'ix jacw in sat, 'ix wiln winac.

¹⁴ Yuj cha, xyaln win 'ixtc 'ayin: A qui Diosal, atn sDiosal eb' qui mam quicham, a ach si'n can 'eli, sec tzojquej 'el tas tznib'j 'ayach. Yujto tznib'j 'ix el Jesús, atn jun tojl snab'en, yic tzab'n pax tas tzyal 'ayach.

¹⁵ A ticnec, 'oj al-l yab'xil Jesús 'a scal smasnil 'anma', 'oj ala', tas 'ix ela, yet' tas 'ix ab'i.

¹⁶ A ticnec, ¿tas tza tan̈wej? Q'uen̈ wa'an, 'ac' 'ajxc bautisar a b'a. Al a b'a 'a Jesucristo, sec 'oj 'ajxc can lajwc a mul, xchi win Ananías chi 'ayin.

Yaljnac Pablo, chajtl 'ajnc schecx 'at 'a eb' man̈ israeloc

¹⁷ Ax yic in japx 'a Jerusalén tic, in 'at leslwoc 'a yatut Dios, palta yic wan in leslwi, 'icha to in waychni.

¹⁸ 'Ix wiln Cajlilec, 'ix yaln 'ayn 'ixtic: Caw tza c'ol ep el 'a Jerusalén tic, yujto toxn ma'oj scha eb' yab' jun wab'xil 'oj ala', xchi.

¹⁹ Yuj cha, xwaln 'ixtc 'a 'a: Mamin, toxn yojc eb', to 'ec' in sayjnac eb' 'aych xon sc'ojl 'aych 'a junjn capiya. C'uxn in yamjnac eb', wa'n 'och eb' 'a preso, in ma'n pax eb'.

²⁰ Ax win Esteban, win aljnac 'el ab'xil, yic sjulq'uenan eb', locn in ta', an moljnac spichl eb', yic sjuln cham eb' winac, xin chi 'a Cajlilec.

²¹ Palta xyaln pax Cajlilec 'ayn 'ixtic: 'Ixic, yujto tzach in checb't 'a scal eb' man̈ israeloc 'a najat, xchi 'ayin, xchi Pablo 'a eb'.

Xc'och Pablo 'a yojltac win comandante

²² 'Ix smaclj eb' 'anma yab'i', tas chi wan yaln Pablo 'a eb'. Palta ax yic xyab'n eb' yaln junx cha, 'ix syamn 'och eb' sq'ue yaw, xyaln eb' 'ixtic: Cham cab' winac. ¿Tas gana pitzn winac? xchi eb'.

²³ Caw xq'ue somnjoc eb' yowxi, junjn eb' xlaj tzicb'tan̈c spichul. 'Ix sjop chan̈ eb' pococ, tzjuln q'ue eb' 'a cha'an̈. 'Ixta xyutj eb' sch'oxni, yujto caw tzowx eb' 'a Pablo cha.

²⁴ Ax 'ix yiln win comandante jun cha, 'ix ya'n win 'ijxc pax 'och Pablo 'a yol cuartel. 'Ix yaln winac, to tzma'xi, sec wach' 'oj yala', tas yuj tzq'ue yaw eb' 'anma chi yowx 'a 'a.

²⁵ Ax yic tox 'ix sjal eb' Pablo, yic tzma'xi, 'ix yaln Pablo 'a jun win capitan̈ 'ayc' ta': —¿Tom 'ay sleyl tzin e comn maq'uej? 'In 'aj Roma in, an̈jtona', may jac in mul xcheclji, xchi.

²⁶ Yic 'ix yab'n win jun xyal cha, x'at yalnoc win 'a win comandante 'ixtic: —Caw 'ay smay jun wan a b'on tic, 'ab'i to 'aj Roma win Pablo cha, xchi 'a winac.

²⁷ Xlajw cha, x'at sc'anb'noc win comandante chi 'ixtc 'a Pablo cha: —¿Tom yel 'aj Roma ach? xchi win 'a 'a. —Yel toni, 'aj Roma 'in, xchi 'a winac.

²⁸ —An̈jtona 'ixta 'in, palta caw niwn tumn xwac'a, xin mann 'och in b'a 'aj Romail, xchi winac. —Palta an tic, yic walji toxn 'aj Roma 'in, xchi Pablo 'a winac.

²⁹ Yuj cha, ax eb' soldado 'ijn xma'n cha, xyactj 'el eb'. Yic 'ix yab'n win comandante cha, to 'aj Roma Pablo, caw 'ix xiw winac, yujto 'ix scomn 'a'j win jalxoc.

C'ochnc Pablo 'a eb' sat yajal

³⁰ Ax 'a junx c'u, 'ix snib'j win comandante chi yab'i', tas yuj x'ajx queja Pablo yuj eb' israel. Yuj cha, xyi'n 'el win q'uen cadena 'a 'a. Xlajw cha, xya'n win syam sb'a eb' sat ya'mal 'och sti eb' israel 'a Dios, yet' smasnil eb' sat yajal. 'Ix ya'n 'elt win 'a yojltac eb'.