A Tas Sc'ulejnac Eb' Schecab' Jesús Hechos 19 - Chuj San Sebastian Bible

'Ayc' Pablo 'a Efeso

¹ Yic 'ayc' Apolos 'a Corinto cha, 'ix 'ec' Pablo 'a jun tzo'n̈ chon̈b' 'ay 'a tzalctac. Xlajw cha, xc'och 'a chon̈b' Efeso. Ata 'ix 'ilchj jun tzo'n̈ eb' creyente yu'uj.

² 'Ix sc'anb'n 'ixtc 'a eb': —¿Xe chaj am Yespíritu Dios, yic eya'n 'och e c'ojl 'a Cristo? xchi 'a eb'. —Ma'ay, mant 'a 'aj xcab' on̈, toto 'ay Yespíritu Dios cha, xchi eb'.

³ —Palta a yic eya'n 'ajxc bautisar e b'a, ¿tas yaj jun bautismo chi e chajnac? xchi 'a eb'. —Tolab' a jun bautismo yic Juan qui chajnac on̈, xchi eb' 'a 'a.

⁴ Yuj cha, xyaln pax Pablo 'a eb' 'ixtic: —Ya'jnac bautisar win Juan eb' 'anma', yic sch'oxn 'eli, chajtlto tzna sb'a eb' yuj smul. Palta yaljnac win 'a eb', chajtlto 'ay jun tza'n sjaw yu'uj. Yowlal ata tzya'ch eb' sc'ojol. A jun cha, atn Jesús, [atn Cristo,] xchi Pablo 'a eb'.

⁵ Ax yic xlajw yab'n eb' jun tzo'n̈ tic, 'ix ya'n 'ajxc bautisar sb'a eb' 'a sb'i Cajlil Jesús.

⁶ Xlajwn̈ej cha, 'ix ya'n 'at Pablo sc'ab' 'a sjolm junjn eb'. 'Ixta to b'i'an, 'ix 'ajx can 'och Yespíritu Dios 'a eb'. 'Ix paxtin eb' 'a jun tzo'n̈ chucchc ti'al. Xlajw cha, 'ix 'ajx pax yal-l eb' jun tzo'n̈ cuynb'il yic Dios.

⁷ Ax eb' x'a'n 'och 'a sc'ojl cha, 'aym lajchwan̈oc sb'isl eb'.

⁸ 'Oxe 'uj xit' yal-l Pablo spaxti Dios 'a yol scapiya eb' yit israelal. Caw te'n xyutj sb'a yaln 'el 'a eb'. 'Ix ya'lj ya'n nachjc 'el yuj eb', tas tzyutj eb' yoch 'a yol sc'ab' Dios.

⁹ Palta 'ay jun tzo'n̈ eb' caw pit. Toxn matz nib'j eb' tzya'ch 'a sc'ojol. X'ec' laj yalnc eb' 'a eb' 'anma', chajtlto maysch'olnil jun cuynb'il yic eb' creyente cha. Yuj cha, 'ix yi'n 'el sb'a Pablo 'a eb'. 'Ix yi'n 'at sb'a yet' eb' creyente 'a jun escuela yic jun win Tirano sb'i. Ata xyal-l spaxti Dios 'a eb' 'a junjn c'u.

¹⁰ Chab' ab'il 'ixta xyutj sb'a. Yuj cha, c'uxn xlaj yab' eb' 'ay 'a yol yic Asia chi yab'xil Cajlil Jesús. Wach'xam eb' israel, wach'xam eb' man̈ israeloc, c'uxn xlaj yab' eb' smasnil.

¹¹ Ax Dios 'ix c'anlb'an Pablo sch'oxn jun tzo'n̈ milagro caw niwn yel'chi.

¹² 'Ay eb' x'i'n cot payu', yet' pichul, xit' squiln 'och eb' 'a sniwnal Pablo. Xlajw cha, x'at ya'nc 'och eb' 'a eb' ya'ay. 'Ixta x'aj sb'ox can sc'ojl eb' yu'uj. 'Ay pax ewin demonio x'el 'a eb' 'anma yu'uj.

¹³ Palta 'ay jaywn̈ eb' israel 'ix b'eyq'ui. 'Ix ya'lj eb' yi'n 'el ewin demonio 'a eb' 'anma'. 'Ix ya'lj eb' sc'anlb'an sb'i Cajlil Jesús, yic tzcob' yi'nc 'el eb' ewin demonio cha. 'Ix cob' yalnc eb' 'a ewin 'ixtic: —A 'a sb'i Jesús tzcaln 'ayx on̈, 'eln̈ec. A Jesús cha, atn jun tz'ec' yal-l Pablo yab'xil, xchi eb'.

¹⁴ 'Ay ucwn̈ yunnal jun win israel Esceva sb'i, jun win sat ya'mal 'och sti eb' israel 'a Dios. 'Ix ya'lj ewin yi'n 'el jun win demonio 'ixta'.

¹⁵ Palta 'ix ta'w win demonio chi 'a ewin 'ixtic: —A Jesús tzeyal cha, wojtac. Wojc pax Pablo cha. Palta ax xo tic, ¿mach ex? xchi winac.

¹⁶ A win 'aj 'aych win demonio cha, 'ix cot jucnjoc win 'a ewinac. 'Ix ya'n ganar win ewin smasnil. Caw x'ixtx ewin yu'uj. Til wal x'aj ewin slajwi. Jitn 'el ewinac, x'el ewin 'a yol jun n̈a cha. 'Ix laj 'at ewin 'eloc.

¹⁷ Ax eb' 'anma smasnil 'aj Efeso cha, wach'xam eb' israel, mto eb' man̈ israeloc, c'uxn xlaj yab' eb' speclal jun cha. Yuj cha, caw 'ix xiw eb' smasnil. 'Ix yaln eb' wach' paxti 'a Cajlil Jesús.

¹⁸ An̈jtona', niwn eb' 'aych sc'ojl 'a Cristo 'ix c'ochi. 'Ix yaln q'uet eb' jantcn̈ej jun tzo'n̈ maysch'olnil xlaj sb'o'.

¹⁹ 'Ay pax nan̈l eb' creyente ya'ljnac wayjlil. 'Ix yi'n cot eb' jun tzo'n̈ yun̈al 'aj tzcuy eb' jun wayjlil cha. 'Ix sn̈usn tz'a eb' 'a sat eb' smasnil. 'Ix sb'isn 'el eb', jantc stojl jun tzo'n̈ ch'an̈ un̈ cha. 'Aym junc 50,000 dracma 'ix 'el'chi.

²⁰ Yuj cha, til wal 'anma 'ix ya'ch sc'ojl 'a spaxti Cajlil. 'Ixta x'aj scheclj 'eli, to caw niwn spoder spaxti Dios.

²¹ Xlajw jun tzo'n̈ cha, 'ix snan Pablo, to 'oj 'ec' 'a yol yic Macedonia yet' 'a yol yic Acaya, ax sc'och 'a Jerusalén, 'ix yaln 'ixtic: —'Oj lajwc cha, yowlal 'oj in c'och 'a Roma, xchi.

²² Yuj cha, 'ix checn b'ab'ljoc chawn̈ schecb' 'a Macedonia. A Timoteo yet' Erasto x'ati. Palta ax Pablo, xcan jaye xo 'uj 'a Asia cha.

Q'uenc somnjoc eb' 'aj Efeso yowxi

²³ Ax 'a jun tiempoal cha, caw xq'ue somnjoc eb' 'anma scot yowl yuj b'eyb'al yic Cajlil.

²⁴ 'Ay jun winc Demetrio sb'i, tzb'o win q'uen plata. Tzb'on win jun tzo'n̈ yechl yatutal jun sdiosal eb' tzcuch Diana. A jun sdiosal eb' cha, tolab' 'ix. A eb' tzb'on jun tzo'n̈ yechl cha, til wal tumn tzyac' ganar eb' 'a spatic.

²⁵ 'Ix yac' win syam sb'a eb' tzb'on jun tzo'n̈ yechl cha, yet' jun tzo'n̈ xo eb' lajn yopiso yet'oc. 'Ix yaln win 'a ewin 'ixtic: —Ex wit munljumal, eyojtac til wal qui tumn tzlaj ca'c ganar 'a jun copiso tic.

²⁶ Palta 'in tzeyila, tzeyab'n paxi, tas wan sb'on win Pablo. Tzyaln winac, chajtlto a jun tzo'n̈ dios b'ob'il yuj 'anma', man̈ diosoc. Til wal 'anma xyac' win sc'ojloc. Man̈ cojnoc 'a Efeso tic, palta quenxn̈ej ma'ix 'ajx sc'ojloc smasnil eb' 'aj Asia yuj winac.

²⁷ Caw 'ay smay jun tic. Tecn man̈x 'oj 'at qui chon̈c yu'uj. A pax qui diosal Diana, tecn man̈x 'a yel'ch jun yatutal 'a sat eb' 'anma'. A jun qui diosalec tic, caw niwn yel'ch 'a sat eb' 'anma 'a smasnil Asia, yet' 'a smasnil yolyib'n̈q'uinal. Palta ax ticnec, 'ay smay. Tecn 'oj lajwc 'el yopiso 'a sat eb', xchi winac.

²⁸ Yic xyab'n ewin jun tzo'n̈ cha, caw wal xcot yowl ewin si'mb'il. 'Ix 'awj chan̈ ewinac, xyaln eb' 'ixtic: —Caw niwn yel'ch 'ix qui diosal Diana an̈ Efeso on̈c tic, xchi eb'.

²⁹ Ax eb' chon̈b' chi smasnil, caw xq'ue somnjoc eb' yowxi. 'Ix syamn eb' Gayo yet' Aristarco. A chawn̈ eb' cha, 'aj Macedonia eb', ajun eb' xc'och yet' Pablo 'a Efeso cha. 'Ix to'x 'at eb' schawn̈il 'a jun lugar 'aj tzyam sb'a eb' 'anma' yic tz'elwni eb'.

³⁰ Ax Pablo, snib'j x'at yal 'a eb' 'anma cha, palta ma'ix chax 'at yuj eb' creyente.

³¹ 'Ay pax jaywn̈ eb' yajl yaj 'a Asia cha, swach'c'ojl sb'a eb' yet' Pablo. 'Ix ya'n eb' alxc 'a 'a, to matz 'at sch'ox sb'a 'a eb' 'anma cha.

³² Ax eb' 'anma 'ix syam sb'a cha, chucch xlaj yal chan̈ junjn eb', yujto ton̈j xlaj q'ue somnjoc eb' yalni. 'Ec'b'al spacl eb' man̈ 'ojtnacoc tas yuj tzyam sb'a.

³³ Palta 'ay jun win Alejandro sb'i. 'Ix ecx 'el'ch win 'a sat eb' 'anma chi yuj eb' yit israelal. 'Ix alx 'a 'a, tas yuj tzyam sb'a eb' 'anma'. Xlajw cha, 'ix ya'n chan̈ win sc'ab' 'a eb', toq'ue sictac tz'aj eb'. Yujto tznib'j win tzcol sb'a yet' eb' yit israelal.

³⁴ Palta xyiln eb' 'anma cha, to israel winac. Yuj cha, xwach' q'ue yaw eb' smasnil. 'Aym chab'oc hora xlaj yal eb' 'ixtic: —Caw niwn yel'ch 'ix qui diosal Diana an̈ Efeso on̈c tic, xchi eb'.

³⁵ At win 'ajtz'ib' yic chon̈ab', c'ojnc'ojnil 'ix smontj win eb', sec sictac tz'aj eb'. Xlajw cha, xyaln win 'a eb' 'ixtic: —Ex wit chon̈ab', smasnil 'anma 'ojtnac, an̈ Efeso on̈c tic, 'ay copiso qui tan̈wniec jun yatutal qui diosal Diana niwn yel'chi, yet' jun yechl 'ix Diana chi cotnc 'a satcha'an̈.

³⁶ May junc mach tztac' yalni, to 'es jun tzo'n̈ tzwal tic. Yuj cha, sictac tzex 'aji. Nac wal si'mb'il, sec may junc tas tze comn b'o'ej.

³⁷ Yujto a ewin xeyij cot tic, may junc maysch'olnil sb'o ewin 'a spatc qui diosalec. Ma'ix b'uchwj ewin 'a 'ix.

³⁸ A win Demetrio yet' ewin yitb'eyum, toto tznib'j ewin tzyac' queja junc mach, tztac' s'at ewin 'a juzgado 'at yal 'a win juez. Tztac' 'at yalnc sb'a ewin 'a eb' yajal.

³⁹ Toto 'ay junc xo tas tze nib'ej, tztac' eya'n junc c'umjb'a yet' eb' yajal, tze b'onyaj ta'.

⁴⁰ Yujto caw 'ay smay. Lemb'il tzna eb' yajl cha, to a yet' eb' wan ca'nec owal. Toto tzc'anb'j eb' 'ayn̈ec: ¿Tas yuj ex q'ue somnjoc eya'n owal? toto 'oj schic eb', matz tac' qui colnec qui b'a caln junc tas 'a eb', xchi win 'a eb'.

⁴¹ Xlajw yaln win 'ajtz'ib' chi jun tzo'n̈ cha, 'ix checn pax win eb' 'anma chi smasnil 'a yatut.