A Tas Sc'ulejnac Eb' Schecab' Jesús Hechos 13 - Chuj San Sebastian Bible

'Ochnc Yopiso Bernabé yet' Saulo

¹ A 'a scal eb' creyente 'a chon̈b' Antioquía, ata 'ay jun tzo'n̈ eb' tzyac' Dios yal-l spaxti', 'ayc' pax jun tzo'n̈ eb' cuywjum: atn Bernabé, yet' Simón tzcuch pax Niger, Lucio 'aj chon̈b' Cirene, Saulo, yet' pax Manaén, atn jun q'uib'nc chan̈ yet' win Herodes, win ya'jnac yajil 'a Galilea.

² A 'a jun 'el, wan yaln sb'a eb' 'a Cajlil, 'aych pax eb' 'a c'ajb'c'ojlal. Ax Yespíritu Dios 'ix aln 'a eb' 'ixtic: —Tze sic' 'elt Bernabé yet' Saulo 'ayin, sec 'oj munljc eb' 'a 'aj 'ix wa'ch yopiso, xchi.

³ Yuj cha, 'ix 'och eb' 'a c'ajb'c'ojlal, 'ix leslwi eb'. Xlajw cha, 'ix ya'n 'at eb' sc'ab' 'a sjolm Bernabé yet' Saulo, 'ix schecn 'at eb'.

Alxnac 'el spaxti Dios 'a Chipre

⁴ 'Ix checx 'at Bernabé yet' Saulo yuj Yespíritu Dios. 'Ix 'emch eb' 'a chon̈b' Seleucia. Ata x'och eb' 'a yol jun barco, 'ix 'at eb' 'a lugar Chipre 'ay 'a snan̈l a mar.

⁵ 'Ix 'elt eb' 'a yojl te barco chi 'a chon̈b' Salamina, 'ix 'ec' yalnc 'el eb' spaxti Dios 'a jun tzo'n̈ scapiya eb' yit israelal. Ax Juan Marcos ajun paxi, yic tzcolwj yet' eb'.

⁶ 'Ix c'axw 'ec' eb' 'a yol yic Chipre cha, 'ix c'och eb' 'a chon̈b' Pafos. Ata x'ilchj jun win yit israelal eb' yu'uj, tzcuch Barjesús. A win cha, tzyalch sb'a wayjlil, tzcob' yal winac, to a Dios tz'a'n yal-l spaxti'.

⁷ A win cha, junn̈j yec' yet' win Sergio Paulo, win yajl 'a Chipre cha. Caw jeln snab'en win Sergio cha. 'Ix yawtn cot win Bernabé yet' Saulo, yujto tznib'j win tzyab' spaxti Dios 'a eb'.

⁸ Palta ax win tzyalch sb'a wayjlil cha, tzcuch pax Elimas, 'ix cot yowl win 'a eb', yujto snib'j win ma'ix ya'ch Sergio chi sc'ojl 'a spaxti Dios.

⁹ Ax Saulo, tzcuch pax Pablo, caw 'aych Yespíritu Dios 'a 'a. 'Ix 'och q'ueln 'a win tzyalch sb'a wayjlil cha.

¹⁰ 'Ix yaln 'a win 'ixtic: —Ach tic, caw tzextj paxti eb' 'anma', caw maysch'olnil a nab'en. Yunnalch win diablo, 'ajc'ojl 'ajch 'a smasnil tas wach'. A spaxti Cajlil, caw yel, yuj cha, ¿tas yuj matz actj can extni?

¹¹ A ticnec, 'oj ya'ch Cajlil a yailal. 'Oj yac' juwc yol a sat junc tiempoal. Wach'xam 'ay yoc c'u, palta man̈x 'oj stac' eln jab'oc, xchi Pablo chi 'a winac. Yajn̈j wal cha, xjuw yol sat winac. Man̈xtzac stac' yiln win jab'oc, yuj cha, x'at saync 'ec' win junc mach tzquetzn b'eyc'oc.

¹² Ax win yajl 'a Chipre cha, yic 'ix yiln win jun cha, 'ix ya'n 'och win sc'ojl 'a Dios. Caw 'ix sat sc'ojl win yab'n jun tzo'n̈ cuynb'il yic Cajlilec.

'Ayc' Pablo yet' Bernabé 'a Antioquía

¹³ Ax Pablo yet' eb' ajun yet'oc, 'ix 'och eb' 'a yol jun te barco. 'Ix 'elx eb' 'a chon̈b' Pafos cha, 'ix c'och eb' 'a chon̈b' Perge, 'a yol yic Panfilia. Palta ax Juan Marcos, 'ix 'actn can eb', 'ix meltzj can pax 'a Jerusalén.

¹⁴ 'Ix 'elx eb' 'a Perge cha, 'ix c'och eb' 'a chon̈b' Antioquía 'a yol yic Pisidia. Ax 'a yic sc'ul 'iljelal, x'och eb' 'a yol scapiya eb' yit israelal, x'em wocn eb' ta'.

¹⁵ Ata x'awtx ley yic Moisés, yet' jun tzo'n̈ tas tz'ib'b'il can yuj eb' schecb' Dios pecti'. Xlajw cha, ax eb' yajl yaj 'a capiya cha, 'ix ya'n eb' yal jun winc 'ixtc 'a Pablo yet' 'a Bernabé: —Ex wit chon̈ab', toto 'ay junc tas tze nib'j tzeyac' scuy eb' 'anma', tztac' eyaln 'el ticnec, xchi.

¹⁶ Yuj cha, 'ix q'ue wan lin̈n Pablo. 'Ix ya'n chan̈ sc'ab', sec sictac tz'aj eb'. 'Ix yaln 'a eb' 'ixtic: —'Ab'tec ex wit israelal, yet' ex 'ay e xiwcojlal 'a Dios.

¹⁷ A qui Diosalec an̈ israel on̈c tic, a si'jnac can 'el eb' qui mam quichmec. A yic 'ayc' eb' 'a scal eb' chuc chon̈b'al 'a Egipto, a 'a'jnac can 'och eb' niwc chon̈b'al. Xlajw cha, xyi'n 'elt eb' 'a Egipto chi yet' spoder.

¹⁸ Chawinc ab'il 'e'nc eb' 'a lum cusltac lu'um. Ax Dios, ya'jnac techjoc sb'eyb'al eb' ta'.

¹⁹ An̈jtona', a satjnac 'el uque chon̈b'al eb' 'anma 'ay 'a yol yic Canaán. Ax slum eb' satnc 'el cha, ya'jnac can yico'oc eb' qui mam quichmec.

²⁰ Xlajw cha, xya'n Dios yopiso jun tzo'n̈ eb' juez ya'w cuenta. Nan̈l yol ciente ab'il ya'jnac eb' 'ixta', masnto yic yoch win Samuel schecb'oc Dios.

²¹ Ax 'a jun tiempoal cha, 'ix sc'ann eb' junc sreyl 'a Dios, sec a tzb'onyaj eb'. Yuj cha, ax Saúl 'ix yac' Dios sreyloc eb'. A Saúl cha, yunnal Quis, yin̈tl Benjamín. Chawinc ab'il 'ochnc win sreyloc eb'.

²² Ax Dios, 'ix 'i'n 'el Saúl 'a yopiso. Ax David 'ix ya'x can 'och sjeloc. Yaln 'ixtc yu'uj: Yaj David yunnal Isaí. Atn jun tic, tzin tzalj yet'oc. A 'oj b'onc smasnil tas tzin nib'ej, xchi.

²³ Ax Jesús, yin̈tl can David cha, a Dios 'a'jnac yopiso qui Colmalc an̈ israel on̈c tic, 'icha yaj ya'n can sti'.

²⁴ Yic mantzac syamch smunljel cha, ax Juan xaln 'el 'a eb' quit israelal, chajtlto yowlal tzna sb'a eb', tzya'n pax 'ajxc bautisar sb'a eb'.

²⁵ Ax yic wan xo slajw yopiso Juan cha, 'ix yaln 'ixtic: A e nani, to Cristo 'in, ticni ma'ay. Palta 'ay jun tza'n sjaw wu'uj, caw niwn yel'chi. Caw man̈ in mojc wa'n servil, wach'xam ton̈j tzin jiyl jac xan̈ab', xchi.

²⁶ Ex wit 'anma'il, ex yin̈tl can Abraham wet'oc, yet' ex 'ay e xiwc'ojlal 'a Dios, a jun 'ab'x yic colnb'il tic, eyic wet'oc.

²⁷ Palta a eb' 'aj Jerusalén, yet' eb' syajlil eb', ma'ix nachj 'el yuj eb', chajtlto a Jesús atn Cristo. Junjn sc'ul 'iljelal, 'ix yab'n eb' yawtx tas tz'ib'b'il can yuj eb' schecb' Dios, palta ma'ix nachj 'el yuj eb'. Yuj cha, a yic xya'n 'och eb' chaml 'a yib'n̈ Jesús, 'ix ya'n eb' 'el'choc jun tzo'n̈ tas tz'ib'b'il can cha.

²⁸ Caw may smul x'ilchj yuj eb', man̈ smojc smil cham eb'. Palta xit' sc'anch eb' chaml 'a yib'n̈ 'a win Pilato, atn win yajal.

²⁹ C'uxn 'ix sb'o eb' 'icha yaj stz'ib'x can 'a Chan̈ U'un̈. Xlajw cha, xyi'n 'emt eb' sniwnal 'a spenc te culus. 'Ix 'at ya'nc 'och eb' 'a yol jun q'ue'en.

³⁰ Palta a Dios x'a'n pitzwc pax 'a scal eb' chamnac.

³¹ Xlajw cha, niwn to sc'ul 'ix 'ec' yet' eb' scuywum, atn eb' cotnc yet' 'a Galilea xc'och eb' yet' 'a Jerusalén, yic mantzac chami. A eb' cha, wan yaln 'el eb' yab'xil 'a scal eb' 'anma ticnec.

³² 'Ixta on̈ pax an̈ tic on̈, wan caln pax 'el jun wach' 'ab'x tic 'ayx on̈, chajtlto a Dios ya'jnac can sti 'a eb' qui mam quichmec.

³³ Ya'jnac can pax sti 'ayn̈ec, yujto yin̈tl on̈ec eb' qui mam quichmec cha. Yic 'ix pitzw pax Jesús, 'ix 'el'ch tas yaljnac can cha, yic ya'n can sti'. 'Icha yaj stz'ib'x can 'a ch'an̈ schab'l Salmo, 'aj tzyal 'ixtic: Ach tic Wunnal ach. A 'a jun c'u tic, 'ix wac' checljoc 'eli to 'ixta aji, xchi Dios.

³⁴ Yaljnac can pax Dios, chajtlto 'oj yi'x q'ue wan Jesús 'a scal eb' chamnac, sec may b'a'n̈ 'oj c'a sniwnal. Yaljnac can 'ixtc 'a Chan̈ U'un̈: 'Oj wac' 'el'choc in wach'c'ojlal 'aj wa'jnac in ti wa'n 'a rey David, xchi.

³⁵ 'Aycto, yaln can David yab'xil Cristo 'a junx salmo 'aj tzyal 'ixtic: Mamin, ma'oj a cha c'a in niwnal an sic'b'iln 'el oj tic, xchi.

³⁶ A David cha, ya'jnac servil eb' 'anma 'a jun tiempoal cha, 'icha snib'j Dios. Xlajw xoj cha, xchami, smucxi. Ax sniwnal cha, xc'a'i.

³⁷ Palta ax jun 'ix yac' Dios pitzwc pax 'a scal eb' chamnac, ma'ix c'a sniwnal.

³⁸ Yuj cha, tzin nib'j tzeyojquej 'eli, to cojxn Jesús tztac' ya'n lajwc qui mulec. Yuj cha, wan yalx jun 'ab'x tic 'ayex.

³⁹ A jun ley yic Moisés, caw matz tac' ya'n lajwc qui mulec. Palta tzann̈j mach tzya'ch sc'ojl 'a Jesucristo, c'uxn tz'ajx can lajwc smul eb' yu'uj.

⁴⁰ Yuj cha, tzeyil wal e b'a. To ma'ay, a tas tz'ib'b'il can yuj eb' schecb' Dios, 'oj jawc 'a eyib'an̈. Yujto yaljnac can eb' 'ixtic:

⁴¹ Ex b'uchwjum, 'iltec. Sat cab' e c'ojl eyilni, ax e chami. Yujto 'ayx 'ec' 'a in nab'en tas 'oj in b'o 'a e cal 'a jun tiempoal tic, palta ma'oj e cha eyab'i' yic 'oj alxoc 'ayex, xchi Dios 'a Ch'an̈ U'un̈, xchi Pablo 'a eb'.

⁴² Ax Pablo yet' eb' ajun yet'oc, yic wan yelt eb' 'a yol scapiya eb' israel cha, 'ay eb' man̈ israeloc xtew 'och 'a eb', sec tzc'anb'j eb' yab' jun tzo'n̈ cuynb'il chi 'a junx sc'ul 'iljelal.

⁴³ Ax yic xlajw jun culto cha, til wal eb' israel x'at yet' Pablo yet' Bernabé. 'Ay pax eb' 'ochnc 'a scuynb'il eb' israel cha, x'at pax eb' yet' eb'. Yuj cha, xyaln Pablo yet' Bernabé 'a eb', chajtlto te'n tzyutj sb'a eb' ya'n 'och sc'ojl 'a schamc'ojlal Dios.

⁴⁴ Ax 'a junx sc'ul 'iljelal, jab'xoj ma'ix syam sb'a eb' chon̈b' smasnil, yic tzyab'n eb' spaxti Dios.

⁴⁵ Palta ax xyiln eb' israel, chajtlto til wal 'anma 'ix syam sb'a. Yuj cha, 'ix chichn 'och eb' 'a Pablo cha. 'Ix cob' yalnc eb' to yes. Ton̈j xb'uchwj eb' 'a 'a.

⁴⁶ Yuj cha, 'ix ste'wtzan sb'a Pablo chi yet' Bernabé. 'Ix yaln eb' 'ixtic: —Yowlal a 'ayx quit israelal tzqui b'ab'l alj 'el spaxti Dios on̈. Palta 'in matz e nib'j tzeya'ch e c'ojl 'a 'a. Am tze na'a, to man̈ smojc tze chaj e q'uinl 'a jun 'ejmn̈ej. Yuj cha, a ticnec, 'oj cal-l jun 'ab'x tic 'a eb' man̈ israeloc on̈.

⁴⁷ Yujto yaljnac can Cajlil 'ayn̈ 'ixtc on̈: Ach wa'cn 'och sacq'uinlal 'a jun tzo'n̈ nacion̈ masnto 'aj tzlajw c'och yolyib'n̈q'uinal, yuj e'n 'at colnb'il ta', xchi Cajlil, xchi eb'.

⁴⁸ Ax eb' man̈ israeloc, caw stzalj eb' yab'n jun tzo'n̈ tic. 'Ix syamn 'och eb' yalni, to caw wach' spaxti Cajlil. Ax eb' sic'b'il xon 'el yuj Dios, yic 'oj scha eb' sq'uinl 'a jun 'ejmn̈ej, 'ix ya'ch eb' sc'ojl 'a 'a.

⁴⁹ 'Ixta x'aj spucb't spaxti Cajlil 'a jun lugar chi smasnil.

⁵⁰ Palta ax eb' israel x'a'n sc'ojloc eb' yajl yaj 'a jun chon̈b' cha. 'Ay pax jun tzo'n̈ eb' x'ochnc 'a scuynb'il eb' israel, checl yaj eb' 'a sat eb' 'anma', 'ix 'ajx pax sc'ojloc eb'. 'Ix syamn 'och eb' ya'n stul 'a Pablo yet' 'a Bernabé. 'Ix spechn 'el eb' 'a jun lugar cha.

⁵¹ Ax Pablo yet' Bernabé, 'ix sma'cn 'el eb' spoccal yoc, yic tzch'oxn can 'el eb', to man̈x 'a yaln eb' yic 'a eb' 'anma cha. Xlajw cha, x'at eb' 'a chon̈b' Iconio.

⁵² Ax eb' creyente 'aj Antioquía cha, caw stzalj eb'. Caw 'aych Yespíritu Dios 'a eb'.