A Tas Sc'ulejnac Eb' Schecab' Jesús Hechos 10 - Chuj San Sebastian Bible

A Pedro yet' Cornelio

¹ 'Ay jun winc 'a chon̈b' Cesarea, Cornelio sb'i. A jun cha, syajlil jun tzo'n̈ eb' soldado tzcuch 'aj Italia.

² Caw 'ix ya'ch win snab'en 'a Dios. Caw 'ay xiwc'ojlal win 'a 'a, yet' jantcn̈ej eb' jun yaj yet' 'a yol yatut. Til wal tas 'ix yac' pax 'a eb' israel to meb'a'. Caw tzleslwin̈ej win 'a Dios.

³ Ax 'a jun 'el, 'a yic am a las tres, 'icha to waychil x'aj yilni. 'Ay jun yángel Dios 'ix 'och 'a yol jun cuarto 'aj 'ayc' winac. 'Ix yaln jun ángel chi 'a win 'ixtic: —Cornelio, xchi.

⁴ 'Ix 'och q'ueln Cornelio a jun ángel cha. Caw 'ix xiw win yu'uj: —Mamin, ¿tas tzal 'ayin? xchi win 'a 'a. Yuj cha, xyaln 'a win 'ixtic: —Caw 'ix yab' Dios a lesal. 'Ix yiln pax jun tzo'n̈ a siylab' tzac' 'a eb' meb'a'. Caw matz sat sc'ojl 'a jun tzo'n̈ cha.

⁵ A ticnec, checb't jaywn̈oc winc 'a chon̈b' Jope, 'at yi' cab' cot eb' win Simón, tzcuch pax Pedro.

⁶ 'Ayc' 'a yatut jun sq'uexul, atn win b'om tz'u'um. A yatut win cha, ata 'ay 'a sti a mar. [A Pedro cha, 'oj wul yal 'ayach, tas yowlal 'oj a b'o',] xchi jun ángel cha.

⁷ Xlajw xoj s'at jun ángel cha, 'ix yawtn cot win chawn̈ eb' schecab', yet' jun soldado to ya'mal xon servil winac. A jun soldado cha, cojn 'a Dios 'aych snab'en.

⁸ Jantcn̈ej tas 'ix yal jun ángel cha, c'uxn xyalx win 'a eb'. Xlajw xoj cha, 'ix checn 'at win eb' 'a chon̈b' Jope.

⁹ Ax 'a junx c'u 'a chimc'ual, yic wan sc'och eb' checb' chi 'a sla'nil chon̈b' Jope cha, ax Pedro 'ix q'ue leslwoc 'a span̈nil yib'n̈ yatut win Simón cha.

¹⁰ Yic 'ayt 'ec' ta', 'ix cot swejel. 'Ix sc'ann wa sb'a. Palta ax yic wanto sb'o tas tzc'uxu, 'icha waychil x'aj sch'oxx jun tas 'a 'a.

¹¹ 'Ix yiln sjacw satcha'an̈. 'Ay jun 'icha niwquil sac nip 'ix 'emli. T'un̈n chan̈ yisquinyoal schan̈il, 'ix 'eml 'a span̈nil yib'n̈ jun n̈a 'aj 'ayc' Pedro cha.

¹² Ax 'a yol jun sac nip cha, ata 'aych junjn c'aj no noc'. 'Ay no chan̈e yoc, 'ay pax no chan, yet' pax no ch'ic.

¹³ Xlajw yeml jun cha, 'ix yab'n Pedro yoch jun paxti', xyaln 'ixtic: —Pedro, q'uen̈ wa'an. Ma'cham jun tzo'n̈ noc' tic, tza chini, xchi.

¹⁴ Palta xyaln Pedro 'ixtic: —May Mamin, yujto mant 'a jun 'ejmoc xin c'ux junc tas comn yaji, mto junc tas 'ay yowlal yuj ley yic Moisés, xchi.

¹⁵ Yuj cha, xyaln pax jun chi 'ixtc jun 'ejm xo: A jun tzo'n̈ tas tzyal Dios to may yowlal, ach xo tic, man̈ ala', to 'ay yowlal, xchi 'a Pedro cha.

¹⁶ 'Ox 'ejm xyal jun chi 'ixta'. Xlajwn̈ej cha, 'ix 'ijx pax q'ue jun sac nip chi 'a satcha'an̈.

¹⁷ Wanto snan Pedro tas wal yaj jun tzo'n̈ cha, 'ix c'och eb' schecb' Cornelio 'a sti n̈a. Tox sc'anb'j eb' yab'i', 'aj 'ay jun yatut win Simón cha.

¹⁸ 'Ix 'awj 'och eb', sc'anb'n eb' 'ixtic: —¿'Aym 'ec' win Simón 'a tic, win tzcuch pax Pedro? xchi eb'.

¹⁹ Ya' sb'a wanto snan Pedro yuj jun tzo'n̈ xyil cha, 'ix yaln Yespíritu Dios 'a 'ixtic: —'Ay 'oxwn̈ winc tzach c'anb'ni.

²⁰ Q'uen̈ wa'an, 'eman̈, 'ixc yet' eb'. Caw 'a'ch 'a a c'ojl a 'at yet' eb', yujto an xin chec cot eb' 'ayach, xchi 'a 'a.

²¹ Yuj cha, 'ix 'eml Pedro 'a 'aj 'ay eb' schecb' win Cornelio cha. 'Ix yaln 'a eb' 'ixtic: —Waji, an ton tic tzin e sayq'ui. ¿Tas e checnb'il 'ayin, yuj cha, tzex jawi? xchi 'a eb'.

²² 'Ix yaln eb' 'a 'ixtic: —'Ay jun win syajlil eb' soldado Cornelio sb'i. Caw wach' sb'eyb'al. 'Ay pax xiwc'ojlal 'a Dios. Caw wach' a sat smasnil eb' et israelal. 'Ay schamc'ojlal eb' 'a 'a. Ax jun yángel Dios 'ix aln 'a 'a, to tzchec cot eb' schecb' tic ach wul yi't 'a yatut, sec wach' 'oj yab' tas 'oj al 'a 'a, xchi eb' 'a Pedro cha.

²³ Yuj cha, x'ijx 'och eb' 'a yol n̈a yuj Pedro. Ata xway eb'. Ax 'a junx c'u, x'at yet' eb'. 'Ix 'at pax jaywn̈ eb' creyente 'aj Jope chi yet' eb'.

²⁴ At 'a yewial, 'ix c'och eb' 'a chon̈b' Cesarea. Ax Cornelio stan̈wi sc'och eb' ta'. Tox 'ix yawtj cot eb' yican yet' jun tzo'n̈ eb' swach'c'ojol.

²⁵ A yic jab'xoj sc'och Pedro cha, 'ix 'elt win Cornelio chi 'a yol yatut. 'Ix chan win sc'ochi. 'Ix 'em cumn 'a yojltac Pedro cha, yic tzya'n 'ejm sb'a 'a 'a.

²⁶ Palta 'ix squetzn chan̈ Pedro cha, 'ix yaln 'a 'ixtic: —Quen̈ lin̈an, yujto quit 'anmal qui b'a, xchi.

²⁷ Wan spaxtin eb', x'och eb' 'a yol n̈a cha. 'Ix yiln Pedro chajtlto niwn eb' syam sb'a ta'.

²⁸ Yuj cha, xyaln 'a eb' 'ixtic: —Eyojtac, an̈ israel on̈ tic on̈, may sleyl tzqui c'umj qui b'a yet' junc chuc chon̈b'al on̈. May sleyl tzon̈ 'och 'a yol yatut on̈. Palta a Dios x'a'n nachjc 'el wu'uj, yuj cha, matz tac' walni, to 'ay junc mach may sleyl tzin c'umej.

²⁹ Yuj cha, may tas 'ix wala, yic in 'at eya'n cotoc. Al ticnec, alc 'ayin, ¿tas yuj in 'at eyac' cotoc? xchi 'a eb'.

³⁰ Yuj cha, xyaln win Cornelio 'a 'ixtic: —Yab'n 'icha hora tic 'oxji, 'ayn 'och 'a c'ajb'c'ojlal. Wan in leslwi 'a yol watut tic 'a yic am a las tres yic yemc'ual, 'ay jun xwul sch'ox sb'a 'ayin, caw tzictzni yilx spichul.

³¹ 'Ix yaln 'ayn 'ixtic: Cornelio, 'ix yab' Dios a lesal, 'ix snan cot pax jun tzo'n̈ a siylab' tzac' 'a eb' meb'a'.

³² Al ticnec, checb't jaywn̈oc winc 'a chon̈b' Jope, 'at yi' cab' cot eb' Simón, tzcuch pax Pedro. 'Ayc' 'a yatut jun sq'uexul, atn win b'om tz'u'um. A yatut win cha, ata 'ay 'a sti a mar. [A Pedro cha, 'ay tas 'oj wul yal 'ayach,] xchi 'ayin.

³³ Xlajwn̈ej cha, xin checn 'at eb' in checb' ach sayq'ui. Yuj wal dios 'ayach, caw xa yiclj a jawi. A ticnec, 'ayn̈ec 'ec' qui masnil 'a sat Dios. Yuj cha, tzqui nib'j tzcab' on̈, jantcn̈ej tas alb'il yuj Cajlilec 'ayach, al 'ayn̈ on̈, xchi 'a 'a.

A smensaje Pedro 'a yol yatut Cornelio

³⁴ Yuj cha, 'ix syamn 'och Pedro yaln 'a eb' 'ixtic: —A ticnec wojtac, wal yel, lajnn̈ej yel'ch smasnil 'anma 'a sat Dios.

³⁵ Tzann̈j mach 'ay xiwc'ojlal 'a Dios, wach'xam man̈ israeloc, caw tzalj yet'oc, toto wach' sb'eyb'al.

³⁶ A Dios 'a'jnac can spaxti 'ayn̈ an̈ israel on̈ tic on̈. Yaljnac 'ayn̈ on̈, to 'ay junc'ojlal yuj Jesucristo, atn Cajlilec qui masnil.

³⁷ Ax xo tic, 'in eyojtac, tas 'ix sb'o Dios 'a qui lugar an̈ israel on̈ tic on̈. A 'a Galilea 'elnc yich, yic slajw yaln can 'el Juan spaxti Dios, yic slajw ya'n bautisar eb' 'anma'.

³⁸ Eyojtac, chajtlto a Dios ya'jnac Yespíritu 'a Jesús 'aj Nazaret. Ya'jnac pax spoder 'a 'a. Eyojc paxi, chajtl 'e'nc Jesús colwjoc 'a eb' 'anma'. Jantcn̈ej eb' 'ixtxnac yuj win diablo, c'uxn 'ix yac' b'oxc sc'ojl eb'. 'Ixta yutjnac sb'a, yujto a Dios 'aych yet'oc.

³⁹ An̈ tic on̈, tzcac' testigoal qui b'a yuj jun tzo'n̈ tastc 'ix sb'o cha. Jantcn̈ej tas x'ec' sb'o 'a yol yic Judea yet' 'a chon̈b' Jerusalén, caw xquil on̈. Xlajw xoj cha, st'un̈n q'ue eb' wit israelal 'a spenc culus. 'Ixta xyutj eb' smilni.

⁴⁰ Palta ax 'a schab'jial, 'ix 'ajx pitzwc pax yuj Dios. Yuj spoder Dios, 'ix ch'oxn sb'a 'ayn̈ on̈.

⁴¹ Palta ma'ix sch'ox sb'a 'a smasnil 'anma'. Cojxn 'ayn̈ on̈, ata sch'ox sb'a, yujto yictax pecti', sic'b'iln̈ xon 'el yuj stestigooc on̈. On̈ wa pax yet' on̈, yic tox 'ix pitzw pax 'a scal eb' chamnac.

⁴² 'Ix yalcn 'ayn̈ on̈, to yowlal tz'ec' cal-l yab'xil 'a eb' 'anma 'on̈, chajtlto a Dios 'a'jnac yopiso sb'eyc'ojlan smasnil 'anma', eb' pitzan, yet' eb' chamnac.

⁴³ Yictax pecti', 'aycto, yaln can 'el eb' schecb' Dios yab'xil Jesús. Yaljnac can junjn eb', chajtlto jantcn̈ej mach 'oj ya'ch sc'ojl 'a 'a, 'oj 'ajxoc can lajwc smul eb' yu'uj, xchi Pedro 'a eb'.

Schajnac eb' man̈ israeloc*r* Yespíritu Dios

⁴⁴ Ax yic wan yaln Pedro cha, 'ix 'ochcn Yespíritu Dios 'a jantcn̈ej eb' wan yab'xni cha.

⁴⁵ Ax eb' creyente israel ajun yet' Pedro cha, caw 'ix sat sc'ojl eb', yujto xyac' pax Dios Yespíritu 'a eb' man̈ israeloc.

⁴⁶ Yujto xyab' eb', to chucchc til 'ix yal eb' 'aj 'ix 'ochcn Yespíritu Dios cha. 'Ix yab'n pax eb' yaln eb' wach' paxti 'a Dios.

⁴⁷ Xlajw cha, xyaln Pedro 'ixtic: —¿Tom tztac' stenx 'och wan eb' tic, yic matz 'ajx bautisar eb'? 'In 'ix 'ajx Yespíritu Dios 'a eb' 'icha x'aj yajx 'ayn̈ec, xchi.

⁴⁸ Yuj cha, 'ix yaln Pedro to tz'ajx bautisar eb' 'a sb'i Jesucristo. Xlajw xoj yajx bautisar eb', 'ix tew eb' 'a 'a, sec to tzcan jaye'oc c'u yet' eb'.