2 Ts 3 - Chuj San Sebastian Bible

Tznib'j Pablo tzleslwi eb' yu'uj

¹ A ticnec, ex wu'tac, ex wanab', caw tzex leslwi cuj on̈, sec 'oj pucl spaxti Cajlilec 'a scal eb' 'anma smasnil muc'uc. Ax schan eb' 'a smasnil sc'ojol, 'icha eyutjnac e chani.

² Tze c'an 'a Dios cuj on̈, sec 'oj qui colchj 'el 'a yol sc'ab' eb' maysch'olnil snab'en on̈, eb' tu tzyutj snab'en 'ayn̈ on̈. Yujto man̈ smasnilc 'anma tz'a'n 'och 'a sc'ojol.

³ Palta a Cajlilec, caw tz'el'chn̈ej tas tzyala. A tz'a'n e te'nal. Tzex scoln pax 'el 'a win syajlil maysch'olnil.

⁴ Tzca'ch Cajlil yipc qui c'ojl eyuj on̈, chajtlto wan eyiclni jun tzo'n̈ checnb'il caljnac can 'ayx on̈, ax eyiclni pax 'a smasnil tiempo.

⁵ Tzqui nib'j on̈, a Cajlilec a tz'a'n nachjc 'el schamc'ojlal Dios eyu'uj. Tzqui nib'j on̈ to tz'och Cristo eyet'oc, sec caw te'n tzeyutj e b'a, 'icha yutjnac sb'a.

Yowlal tzqui b'oc qui munljel

⁶ Ex wu'tac, ex wanab', a 'a sb'i Cajlil Jesucristo, tzcalb't jun tzo'n̈ xo checnb'il tic 'ayx on̈. Toto 'ay eb' creyente matz nib'j sb'o smunljel ta', toto matz b'eylb'ej eb' jun tzo'n̈ cuynb'il 'ec' caljnac can 'ayx on̈, caw matz tac' jun tzex 'ec' yet' eb'.

⁷ Eyojc xo, smoj tze b'eylb'ej qui b'eyb'al on̈, yujto man̈ 'isjoc 'ec' cutjnac qui b'a 'a e cal on̈.

⁸ Eyojtac, may 'aj qui c'anjnac wa qui b'a 'ayx 'a nab'an̈ej on̈. Palta sc'ual yac'wlil on̈ munlj 'a e cal on̈. Caw ca'jnac 'ip qui munlj on̈, yujto qui nib'jnac on̈, may mach tz'ab'n syal ya'n qui gasto ta 'on̈.

⁹ Wach'xam 'ay caln quic qui c'ann qui gasto 'ayx on̈, palta caw on̈ munlj yet' qui c'ab' on̈. 'Ixta cutjnac qui ch'oxn jun wach' b'eyb'al 'ayex, sec wach' tze b'eylb'ej qui b'eyb'al chi 'on̈.

¹⁰ Yujto a yic 'ayn̈ 'ec' 'a e cal on̈, caln can jun checnb'il 'ayx 'ixtic: Toto 'ay mach matz nib'j tzb'o smunljel, caw matz tac' yajx wa'oc, xqui chi 'on̈.

¹¹ Tzcalb't jun tzo'n̈ tic 'ayex, yujto xcab' on̈, to 'ayx ab' caw matz yal e c'ojl tzex munlj ta'. Ton̈j tze comn 'a'j 'och e b'a 'a scal jun tzo'n̈ tas 'aj may eyaln eyico'.

¹² Ax 'ixta tzeyutj e b'a, a 'ayx tzcalb't jun checnb'il tic on̈. Yuj Cajlil Jesucristo tzcham caln 'at 'ayx on̈, caw tzex munlj 'a tzaljc'ojlal, sec 'ay e gasto.

¹³ Ex wu'tac, ex wanab', man̈ ex tzactzjoc e b'on jun tzo'n̈ wach'l chi ta'.

¹⁴ Toto 'ay eb' matz yiclni tas tzcalb't 'ayx 'a jun qui carta tic on̈, yowlal tze checltej 'el eb' 'a e cal, sec 'oj q'uixwc 'el eb'. An̈jtona', caw matz tac' jun tzex 'ec' yet' eb'.

¹⁵ Palta matz tac' eyoch 'ajc'ojlal 'a eb'. Tzeyac' wal snab'enoc eb', yujto eyit creyenteal eb'.

Tzya't Pablo stzatzl sc'ojl eb'

¹⁶ A Cajlilec 'a'm junc'ojlal. Tzin nib'ej, c'uxn tzyac' sjunc'ojlal 'ayx 'a smasnil tiempo. 'Och cab' eyet' e masnil ta'.

¹⁷ An Pablo in tic, tzin tz'ib'j 'at jun in b'i tic, sec chequel, to yel wic jun carta tic. 'Ixtc tzwutj in tz'ib'n 'at in b'i 'a junjn in carta.

¹⁸ Tzin nib'j tzyac' Cajlil Jesucristo swach'c'ojlal 'ayx e masnil ta'. [Ya' cab'i'.]