2 Ti 4 - Chuj San Sebastian Bible

¹ A yic 'oj jawc pax Cajlil Jesucristo 'a scha'ejmal, ax swach' 'och reyal, ax sb'eyc'ojlan smasnil 'anma chamnc xo, yet' eb' pitznto. Yuj cha, a 'a sat Dios yet' 'a sat Cajlil Jesucristo, tzcham wal waln 'at 'ayach.

² Caw tzal-l spaxti Dios 'a scal eb' 'anma'. Toxn̈ej tznib'j eb' yab'i', toxn̈ej ma'ay, palta caw tzaln̈ej, caw tza montj eb'. Tza tench wan eb' 'a maysch'olnil, tza'n wal snab'enoc eb'. Caw niwn tzotj a c'ojl 'a eb', tza cuyn pax eb' 'a spaxti Dios.

³ Yujto 'ay jun tiempoal 'oj jawoc, 'ay eb' man̈x 'oj scha alxoc jun tzo'n̈ cuynb'il yel 'a 'a. Til wal jun tzo'n̈ comn paxti 'oj snib'c eb' yab'i'. Yuj cha, til wal eb' cuywjum 'oj smolb'tzoc cot eb'. Palta a eb' cuywjum cha, ton̈j 'oj scomn alc eb' jun tzo'n̈ comn paxti', 'icha tznib'j eb' 'anma cha.

⁴ Yuj cha, man̈x 'oj ya'ch eb' schicn 'a jun cuynb'il caw yel. Cojn jun tzo'n̈ comn 'ab'x 'aj 'oj ya'ch eb' snab'en.

⁵ Palta ach xo, caw te'n tzotj a nab'en 'a smasnil tiempo. Caw tzac' techjoc ab'n syail. Caw tzal-l wach' 'ab'x yic colnb'il 'a scal eb' 'anma'. Munljan̈ si'mb'il, sec may tas 'oj yac' palta 'a jun opiso cha.

⁶ Aln tic, wan sjaw stiempoal 'oj in chami. 'Icha junc xajmb'al tzmilx chamoc, 'ixta 'oj waji.

⁷ 'Icha junc mach caw tzyac' 'ip 'a junc tajnel, 'ixta xwutj in b'a in munlj 'a yic Dios. A ticnec xwac' ganar slajw wopiso 'a swach'il. Smasnil tiempo, caw xin ya'ilj jun tzo'n̈ cuynb'il 'aj 'aych qui c'ojol.

⁸ Al ticnec, 'ay jun spac wic molb'il xo, yujto tojl tzwutj in b'eyb'al. A Cajlil, caw tojl snab'en, a 'oj b'eyc'ojlanc smasnil 'anma'. A 'a yic jun c'u cha, 'oj in cha spac wic 'a 'a. Man̈ cojnoc in 'oj in cha spac wico'. Jantcn̈ej eb' caw tznib'j jawc Cajlil 'a scha'ejmal, 'oj scha eb' yic jun xo.

⁹ Tzin nib'j tza c'ol ep a sayn tas tzach 'aj a cot muc'uc.

¹⁰ Yujto a Demas, in yactj can in ch'ocoj. 'Ix 'at 'a Tesalónica, yujto cojn tas 'ay 'a yolyib'n̈q'uinl tic tznib'j 'ochi. Ax cu'tac Crescente, 'ix 'at 'a Galacia. Yet' cu'tac Tito, 'ix 'at pax 'a Dalmacia.

¹¹ Cojxnn̈ej Lucas 'ayc' wet'oc. Yic tzach coti, tz'ec' ec' Marcos et'oc, yujto caw 'ay yopiso smunlj wet' 'a Cajlil.

¹² Xin checb't cu'tac Tíquico 'a Éfeso.

¹³ Yic wec' 'a chon̈b' Troas, a 'a yatut Carpo, ata cannc jun spotl in patc wu'uj. A yic tzach coti, tz'ec' ec'. 'Ay pax jun tzo'n̈ ch'an̈ libro, tzej cot pax yet'oc. Yet' pax jun tzo'n̈ xo ch'an̈ u'un̈, comnoc wal tzej cot ch'an̈ in c'ana'.

¹⁴ A win Alejandro, win tenm q'ue'en, caw maysch'olnil xyutj sb'a win 'ayin. Palta a Cajlil 'oj 'a'nc spac 'a 'a.

¹⁵ An̈jtona 'ach, tzel a b'a 'a winac, yujto caw tzchichn 'och win 'a jun 'ab'x tzcal-li.

¹⁶ A yic waln in paxti 'a win yajl 'a b'ab'el, may junc mach 'ix 'och wet'oc. C'uxn x'at eb', in yactn can eb' in ch'ocoj. Comnoc ma'oj yac' Dios spac jun chi 'a eb'.

¹⁷ Palta ax Cajlil, a 'ix 'och wet'oc. 'Ix colwj wet'oc. Yuj cha, xin wach' aln 'el wach' 'ab'x yic colnb'il. A wal eb' man̈ israeloc, c'uxn xlaj yab' eb' smasnil. A 'a jun 'el, 'icha to yamchjnacn yuj junc no león, 'ijn schin 'ejm no'. Palta ax Cajlil, a 'in coln can 'el 'a yol sti no'.

¹⁸ A 'oj in coln can 'el 'a yol sc'ab' smasnil maysch'olnil. 'Oj in swach' moloc, sec wach' 'oj in c'och 'a yol sc'ab' 'a satcha'an̈. Niwn cab' yel'ch Jesucristo 'a smasnil tiempo. 'Ixta cab' tz'aji.

Tz'ajx 'at stzatzl sc'ojl eb'

¹⁹ Tic tzwa't stzatzl sc'ojl canb' Prisca yet' cu'tac Áquila, yet' pax eb' 'ay 'a yol yatut Onesíforo.

²⁰ 'Ix can cu'tac Erasto 'a Corinto. Ax cu'tac Trófimo, 'ix can 'a Mileto wu'uj, yujto ya'ay.

²¹ Tzin nib'j tza c'ol ep a cotcni, ya' sb'a mantzac jaw n̈ab'lq'uinal. A cu'tac Eubulo tic, tic tzya't stzatzl 'a c'ojol. 'Ixta pax cu'tac Pudente, yet' cu'tac Lino, yet' canb' Claudia, yet' pax eb' creyente smasnil, tic tzya't eb' stzatzl a c'ojl ta'.

²² Tzin nib'j 'aych Cajlil Jesucristo et'oc. Ya' cab' Dios swach'c'ojlal 'ayx e masnil ta'. [Ya' cab'i'.]