2 Cr 9 - Chuj San Sebastian Bible

Wulnc 'ix sreinail chon̈b' Sabá

¹ A 'ix sreinail chon̈b' Sabá, xyab' 'ix yel yab'xil rey Salomón, to caw niwn yel'chi. Yuj cha, 'ix jaw 'ix 'a Jerusalén yic tzwul sc'anb'noc 'ix jun tzo'n̈ paxti caw ya snachj 'a Salomón, yic tzya'n prowal. Caw niwn eb' schecb' 'ix xjaw yet'oc, niwn no cameyo cuchjnac perjuma, niwn q'uen oro yet' eb' q'uen q'uen yel xo wach' yilxi. A yic xjaw 'ix 'a yojltac Salomón, xyaln 'ix smasnil tas nab'ilx yu'uj.

² Palta ax Salomón c'uxn 'ix spac smasnil jun tzo'n̈ sc'anb'j 'ix cha, may tas 'ajltac spacn 'a 'ix.

³ A yic xyiln 'ix sjelnal Salomón yet' sdespacho b'ob'il yu'uj,

⁴ yet' tas tzc'uxx 'a sat smexa, yet' yet'l eb' 'aych yopiso yet'oc, yet' jun tzo'n̈ xo eb' schecab' yet' spichl eb', caw chuc yilx spichl eb' tz'i'n cot svaso winac, yet' pax jun tzo'n̈ xajmb'al tz'ajx tz'a 'a yatut Jehová, caw sat sc'ojl 'ix yiln jun tzo'n̈ cha.

⁵ 'Ix yaln 'ix 'a win rey chi 'ixtic: A tas xwab' yalx 'a in chon̈ab', yuj jun tzo'n̈ tas tza b'o'o, yet' yuj a jelnal tzb'inaxi, caw yel ton wal b'i'an.

⁶ Palta a yic cha, matz wa'ch wal 'a in c'ojol tas chi tzalxi, ax ticnec tic wal tzwil yet' in sat. Wal yel matz q'ue'ch yalx spacloc a jelnal 'a tas tzwab' yalx cha, yujto ach tic yel xo tz'ec' a jelnal 'a yib'n̈ 'icha tz'aj yalx cha.

⁷ Caw wach' yic eb' 'anma tzmunlj 'ayach, caw wach' pax yic eb' a checb' 'ayc'n̈ej a ojltac, yic tzyab'n eb' a jelnal.

⁸ Alx cab' wach' paxti 'a Jehová a Diosal to caw tzalj et'oc, yuj cha, ach ya'n 'och reyl sjeloc. Yuj schamc'ojlal 'a chon̈b' Israel tic, yic tzb'inax sb'i 'a smasnil tiempo, yuj cha, ach ya'n 'och reyal, sec wach' tzac' reyl 'a swach'il yet' 'a stojlal, xchi 'ix.

⁹ Xlajw cha, xya'n can 'ix jun tzo'n̈ tic 'a rey Salomón: jun ciente quintal q'uen oro, caw niwn perjuma, yet' eb' q'uen q'uen yel xo wach' yilxi. Mant 'a jun 'ejmoc 'ix jaw perjuma 'a chon̈b' Israel, 'icha xyac' 'ix sreinail Sabá 'a rey Salomón.

¹⁰ An̈jtona pax eb' schecb' Hiram, yet' eb' schecb' Salomón, xit' yi' cot eb' q'uen oro 'a Ofir, xyi'n pax cot eb' te sándalo, yet' eb' q'uen q'uen yel xo wach' yilxi.

¹¹ Mant 'a xon jun 'ejmoc tz'ilx jun tzo'n̈oc te sándalo chi 'a yol smac'ben Judá 'icha jun tzo'n̈ te cha. A yet' te 'ix yac' win rey b'o sc'ochal yatut Jehová, yet' sdespacho win rey cha. An̈jtona', a yet' te 'ix yac' b'o win arpa yet' salterio, yic eb' tzb'itn 'a Dios.

¹² 'Ix 'el wal 'a sc'ojl win rey chi ya'n smasnil tas sc'an 'ix sreinail Sabá, chuc pax yaj tastc tox 'ix yac' win sjelc tastc 'ix yij cot 'ix 'a winac. Xlajw cha, 'ix pax 'ix 'a schon̈b' yet' eb' schecb' ajun yet'oc.

Caw niwn yel'ch Salomón

¹³ A q'uen oro tzchaj Salomón 'a junjn ab'il, o'e ciente quintal.

¹⁴ Man̈ 'ayc 'och pax q'uen stojlb'al eb' chon̈wjum stz'acb'oc q'ue'en. An̈jtona yet' smasnil eb' sreyl Arabia yet' smasnil eb' gobernador 'a yol smacb'en chon̈b' Israel, tzyij cot eb' q'uen oro yet' q'uen plata 'a 'a.

¹⁵ 'Ix ya'n rey Salomón b'o chab' ciente niwc smacl sat jul-lab' to 'aych oro 'a 'a, lajchwe libra q'uen oro 'aych 'a jun jun.

¹⁶ An̈jtona', 'ix ya'n win b'o junx 'oxe ciente cotc smacl sat jul-lab', waque libra q'uen oro 'aych 'a jun jun, ax 'a jun n̈a tzcuch Calte yic Líbano, ata xit' ya'cni.

¹⁷ 'Ix ya'n pax win rey 'ajxoc 'och q'uen marfil yelwnub'loc jun niwquil despacho, 'ix ya'n win 'ajxoc 'och q'uen oro caw wach' 'a spatquil.

¹⁸ A jun despacho cha, 'ay sc'ochal, waque sb'achquixtaquil. 'Ay 'ejm oro 'a 'aj te'n 'ejm yoc win rey. B'ob'il 'och sc'ab' jun xilail chi 'a junjn smo'och, b'ob'il 'och pax yechl junjn no león 'a junjn sc'ab' cha.

¹⁹ An̈jtona', 'aych pax lajchwan̈ xo yechl león chi 'a jun sc'ochal cha, junjn 'a junjn smoch waque sb'achquixtacl cha. Mant 'a xon junc rey tox sb'o yic 'icha jun cha.

²⁰ A smasnil svaso rey Salomón, oron̈ej, yet' smasnil vaso tzc'anx 'a jun n̈a tzcuch Calte yic Líbano, oron̈ej smasnil. May junc tas b'ob'il yet' plata yujto a 'a jun tiempoal cha, a q'uen plata man̈ niwnoc wal yel'ch q'ue'en.

²¹ A eb' schecb' win rey, tz'at eb' yet' eb' schecb' Hiram yet' te barco 'a Tarsis, yic tz'at yi'nc cot eb' q'uen oro, q'uen plata, q'uen marfil, no chab'in yet' no pavo real 'a junjn yoxxil ab'il.

²² A rey Salomón, 'ec'b'al sricoal yet' sjelnal 'a yib'n̈ smasnil eb' rey 'a yolyib'n̈q'uinl tic.

²³ A smasnil eb' rey cha, 'ix jaw eb' 'a Salomón, yic tzwul yilnc eb', mto wul yab'nc pax eb' jantc wal sjelnal x'ajx yuj Dios.

²⁴ A eb' tzjaw 'a junjn ab'il, 'ix yij cot eb' siylab' 'a 'a: 'Icha q'uen plata, oro, pichul, yamc'ab' yic owal, perjuma, no cawyu chej yet' no mula.

A Salomón sman caruaje yet' no chej

²⁵ An̈jtona', a Salomón 'ay chan̈e mil scabayeriza 'aj tz'aj e no schej, yet' caruaje. 'Ay pax lajchwe mil no chej tzto'ni. 'Ay caruaje chi tzc'an eb' tztan̈wni win rey 'a Jerusalén, 'ay pax jun tzo'n̈ tzc'an eb' tztan̈wni chon̈ab'.

²⁶ A rey Salomón cha, yajl yaj 'a yib'n̈ smasnil eb' rey, tzchajto cot 'a a Éufrates, masnto tzc'och 'a slum eb' filisteo, tzc'och to pax 'a smon̈jon Egipto.

²⁷ A 'a Jerusalén, a q'uen plata, 'icha xoj comn q'uen x'aj q'uen yuj win rey; ax te c'ute', 'icha xoj te calte'al higo x'aj te 'a span̈nil yich eb' lum witz.

²⁸ An̈jtona', a e no schej Salomón, ata tzcot e no 'a Egipto, yet' 'a jun tzo'n̈ xo nacion̈.

Schaml Salomón

²⁹ Ax jantc to yab'xil Salomón, yictax yel yich, masnto 'a slajub', ata tz'ib'b'il can 'a jun tzo'n̈ ch'an̈ libro yic eb' schecb' Dios, atn Natán, yet' Ahías 'aj Silo, yet' pax jun tzo'n̈ 'icha waychil 'ix yil jun schecb' Dios Iddo sb'i, yuj tas alb'il can 'a spatquil Jeroboam, yunnal Nabat.

³⁰ A Salomón chawinc ab'il 'ix yac' reyl 'a yib'n̈ smasnil chon̈b' Israel. A 'a Jerusalén ata 'ay sdespacho.

³¹ Ax yic schami, ata xmucx 'a Schon̈b' David, atn smam. Ax jun yunnal tzcuch Roboam, a 'ix 'ochcn reyl sjeloc.