2 Cr 8 - Chuj San Sebastian Bible

Jun tzo'n̈ xo tas sb'ojnac Salomón

¹ Junc'l ab'il 'ix yac' Salomón sb'on chan̈ yatut Jehová yet' pax jun sdespacho cha.

² Xlajw cha, sb'on pax chan̈ jun tzo'n̈ chon̈b' 'ix ya'x meltzjoc Hiram 'a Salomón, 'ix 'aj cajn eb' israel ta'.

³ Xlajw cha, x'at Salomón yac' owl yet' chon̈b' Hamat 'a yol yic Soba, 'ix yi'n can 'eq'ui.

⁴ Sb'on pax chon̈b' Tadmor jun 'ejm xo 'a cusltac lu'um, yet' smasnil jun tzo'n̈ chon̈b' 'a yol yic Hamat, 'a 'aj tzmolx jun tzo'n̈ tas tzc'uxxi.

⁵ An̈jtona', 'ix sb'on pax chon̈b' Bet-horón 'a yib'n̈ q'ueta', yet' pax Bet-horón 'a yaln̈ 'ejmi, xya'n 'och smuroal sti jun tzo'n̈ chon̈b' cha, x'och spuertail, x'och q'uen q'uen yipnub'oc spuertail cha.

⁶ Sb'on pax chon̈b' Baalat, yet' smasnil jun tzo'n̈ chon̈b' 'aj tzmolx tas tzc'uxx yuj Salomón. An̈jtona', sb'on pax smasnil chon̈b' 'aj tzmolx caruaje yet' no chej yic owal, yet' smasnil tas 'ix snib'j Salomón tzb'o 'a Jerusalén, 'a Líbano, yet' 'a smasnil lum lum 'a yol smacb'en.

⁷ 'Ayt pax jun tzo'n̈ xo eb' 'anma xcan 'a jun tzo'n̈ lugar cha: atn eb' hitita, eb' amorreo, eb' ferezeo, eb' heveo, yet' eb' jebuseo, eb' to man̈ israeloc,

⁸ atn yin̈tl eb' 'anma ma'ix satl yuj eb' israel, 'ix 'ajxn̈ej pural eb' yoch 'a munljel yuj Salomón.

⁹ Palta may junc eb' yit chon̈b' 'ix yac' pural yoch checb'al, mto 'a munljel, yujto cojn 'a soldadoil, 'a yajlil, 'a capitan̈il, 'a comandanteil 'a caruaje yic owal, yet' pax 'a no chej yic owal, cojn 'a jun tzo'n̈ chi 'ix 'och eb'.

¹⁰ 'Ay pax 250 eb' 'aych gobernadoral, atn eb' tz'a'n mandar eb' tzmunlj 'a Salomón.

¹¹ 'Ix yij 'el Salomón chi 'ix yisl win sreyl Egipto 'a yol Schon̈b' David, yujto chuc schon̈b' 'ix. Mun chuc sb'o win yatut 'ix, yujto sna'a, to a 'ix yistzil win cha, man̈ smojc tz'aj 'ix 'a yatut David sreyl can chon̈b' Israel, yujto a jun tzo'n̈ lugar 'aj 'ochnc te scaxail strato Jehová, caw wal niwn yel'chi.

¹² 'Ix ya'n win xajmb'al to tz'a smasnil 'a Jehová, xya'n tz'a 'a yib'n̈ yet'l xajmb'al xb'o 'a yojltac yatut Dios,

¹³ sec wach' tz'ajx junjn macn̈ tas 'a yic sc'ul yajx xajmb'al cha, 'icha tzyal ley 'ix yalcn Moisés, tzyal 'el'chi, atn 'a sc'ul 'iljelal, 'a sc'ul yic tzpac' 'uj, yet' 'a 'oxe niwc q'uin̈ tznax 'a yol junjn ab'il, atn q'uin̈ yic tzwax 'ixm pan may yich, yet' q'uin̈ yic tzmolx sat 'awb'ente', yet' pax q'uin̈ Chinama.

¹⁴ An̈jtona', sb'on pax 'och munljel 'a stzolil, 'icha yaj yuj smam, atn David, sec wach' a eb' ya'mal 'och sti eb' 'anma', tztac' yiln eb' yopiso, yet' eb' levita, atn eb' 'aych 'a yib'n̈ sb'itn 'a Dios, tzcolwj pax eb' yet' eb' ya'mal 'och sti eb' 'anma 'a junjn c'u 'a tas yowlal tzc'anxi. Yet' pax yic tas tz'aj yoch eb' tan̈m puerta 'a stzol-l 'a junjn puerta, yujto 'ixta yutjnac can David yalni, atn schecb' Dios.

¹⁵ Yuj wal cha, ma'ix sjel xon jac tas tz'aj smunlj eb' ya'mal 'och sti eb' 'anma', yet' eb' levita, yet' eb' molm tumin, 'icha yajcn yuj rey David.

¹⁶ Yujto a smasnil munljel nab'il yuj Salomón, 'ix 'el yich sb'o 'a yictax 'ix 'ejm yipnub'al yich yatut Jehová, masnto 'ix lajw sb'o'i.

¹⁷ Xlajw cha, 'ix 'at Salomón 'a Ezión-geber, yet' 'a Elat, 'a stitc a mar 'a yol yic Edom.

¹⁸ A win Hiram 'ix ya' cot jun tzo'n̈ barco yet' eb' tzmunlj xon yet' te'. A jun tzo'n̈ winc cha, caw yojc eb' yec' 'a yib'n̈ a mar. 'Ix 'at eb' yet' eb' schecb' Salomón 'a Ofir; jab'xoj may 320 quintal q'uen oro 'ix yij cot eb' 'a rey Salomón.