2 Cr 6 - Chuj San Sebastian Bible

Snajnac Salomón sq'uin̈l yatut Dios

¹ Xlajw cha, xyaln Salomón 'ixtic: Mamin Jehová, 'ix ala chajtlto scal q'uic'q'uinl cajn ach 'eq'ui.

² Palta an tic, 'ix in b'o jun atut caw man̈x jantcoc swach'il, 'a 'aj tzach 'aji, jun et'l 'aj 'oj a can cajn 'a smasnil tiempo, xchi.

³ 'Ix meltzj 'at q'ueln win rey chi 'a smasnil eb' yit israelal lin̈n 'ec' chi ta', xyaln win wach' paxti 'a yib'n̈ eb'.

⁴ 'Ix yaln win 'ixtic: Alx cab' wach' paxti 'a Jehová qui Diosalec an̈ israel on̈c tic, tox 'ix 'el'ch tas yaljnac yet' sti 'a in mam, atn David, yic yaln 'ixtc 'a 'a:

⁵ Yictax wi'n 'elt in chon̈b' 'a Egipto, may junc chon̈b' xin si'l 'a scal yin̈tl Israel, yic ata tzb'o junc watut 'aj tzin 'aj cajan, yic tzb'inax in b'i ta', mant 'a pax junc winc tox xin si'li, yic tzjucb'tzan in chon̈b' tic,

⁶ palta a ticnec, xin si'l chon̈b' Jerusalén, sec wach' ata tzb'inax in b'i. Ach in si'n pax 'eli sec wach' ach 'oj ac' reyl 'a yib'n̈ in chon̈b' tic, xchi Dios 'a in mam.

⁷ Ax in mam, caw wal snib'j sc'ojl sb'o chan̈ junc yatut Dios, yuj yi'n chan̈ Jehová qui Diosalec an̈ israel on̈c tic.

⁸ Palta 'ix yaln Jehová 'ixtc 'a 'a: Caw wach' tas tza na'a, yujto caw tznib'j a c'ojl tza b'o junc watut 'aj tz'och 'emmquilal 'ayin.

⁹ Palta man̈oc ach 'oj a b'o cha'an̈, a jun onnal 'oj b'onc jun n̈a chi yuj yijx chan̈ in b'i, xchi Dios 'a in mam.

¹⁰ A ticnec jun, tox 'ix 'el'ch tas yaljnac Jehová. 'Icha 'ix yutj yaln cha, an in 'och reyl sjelc in mam, in 'em wocn 'a sdespacho yic tzwa'n reyl 'a eyib'an̈. Yuj cha, xin b'on chan̈ jun n̈a tic yico'oc Jehová qui Diosalec.

¹¹ An̈jtona', tox 'ix wa'ch te caxa 'aj 'ay 'ejm strato Jehová sb'ojnac quet'ec, xchi Salomón.

A slesl Salomón 'a Dios

^12-13 'Ay jun b'achnub' to nab'a bronce 'ix yac' b'o 'a snan̈l 'amac', chab' metro yet' 25 centímetro spac'b'il, 'ixta pax xchiquin, jun metro yet' 35 centímetro ste'il. Yajn̈ej 'ix q'ue lin̈n Salomón 'a yib'n̈ jun b'achnub' cha, atn 'a yojltac jun yet'l xajmb'al to yic Jehová. Lin̈n 'ec' smasnil eb' yit chon̈b' 'a spatquil. 'Ix 'em cuman, xyi'n chan̈ sc'ab' xleslwi,

¹⁴ 'ix yaln 'ixtic: —Mamin Jehová, ach qui Diosal an̈ Israel on̈ tic on̈, may junc xo Dios lajn et' 'a satcha'an̈ yet' 'a sat lum tic, yujto tzac' 'el'choc a trato, tza ch'oxn pax a wach'c'ojlal 'a eb' tzyiclni yet' smasnil sc'ojl 'a tas tzala.

¹⁵ Tox 'ix 'ac' 'el'choc a ti a'jnac 'a in mam, tz'acn xotj a'n 'el'choc.

¹⁶ Yuj cha Mamin Jehová, ach qui Diosal on̈, 'el'ch cab' pax tas a ta'wjnac 'a jun a checb' David, yic alni to 'ayn̈j eb' yin̈tl 'oj 'och 'a sdespacho yic tzya'n yajlil 'a yib'n̈ chon̈b' Israel, cojn toto yiclum 'oj yutc sb'a eb' 'ayach, 'icha wal yutjnac sb'a in mam.

¹⁷ A wal ticnec jun Mamin Jehová, ach qui Diosal on̈, 'el'ch cab' tas 'aj a'jnac can a ti cha.

¹⁸ Palta ach in Diosal, ¿yel am wali 'oj stac' aj cajn 'a sat lum lum tic? 'Intax a satcha'an̈, may yalnb'il 'aj tzlajw c'ochi, palta caw matz techj ach smolni, ¡Ocxom wal jun yune n̈a 'ix in b'o eco'oc tic!

¹⁹ Wach'xam 'ixta', palta maclj wal ab' in lesal yet' tas tzwal 'ayach. Mamin Jehová ach in Diosal, 'ab' wal tas tzwal 'aych yet' in lesl an a checb' in tic, yuj in c'ann a wach'c'ojlal.

²⁰ Q'ueln achn̈ej cab' 'och 'a jun atut tic 'a sc'ual, yac'wlil, jun aljnac chajtlto a 'a yojl tic 'oj a b'inaxn̈ej. Yuj cha, maclj wal ab' in lesl an a checb' in tic.

²¹ Maclj wal ab' in lesl tic 'an, yet' yic eb' wit israelal tic, yic tzleslwi eb' 'aych 'a jun lugar tic. A wal 'a satchan̈ 'aych 'eq'ui, a yic tzab'ni, tza'n lajwc qui mul 'a quib'n̈ on̈.

²² Q'uinloc 'ay junc mach tz'ajx 'och 'a yib'an̈ chajtlto x'och smul 'a junc yit 'anma'il, tzlajw cha, tzjaw 'a yojltac yet'l xajmb'al 'a jun atut tic tzwul ya'nc sti' to may smul,

²³ a 'a satcha'an̈ tza chaj ab' tas yaj jun cha, tza b'onyaj 'a stojlal; tza'n 'och yailal 'a yib'n̈ mach tz'och smul cha, tza b'on pax yaj mach may smul, a tzyal wal tas yilxi.

²⁴ Q'uinloc tzon̈ 'ajx ganar an̈ a chon̈b' on̈ tic, yuj eb' 'ajc'ojol, yuj qui maysch'olnil tz'och 'ayach, toto tzqui na qui b'a on̈, tzcaln qui b'a 'ayach, tzon̈ tew pax 'aych 'a jun n̈a tic,

²⁵ comnoc tza chaj 'ab' qui lesl tzc'och 'aych 'a satcha'an̈, tza'n lajwc qui mul on̈, tzon̈ a'n meltzjc pax 'a qui lum tic a'jnac 'a eb' qui mam quichm on̈.

²⁶ Q'uinloc 'oj 'och wan ya'n n̈ab' yujto tz'och qui mul 'aych on̈, yuj cha, tza'n 'och qui yailal, palta toto yajn̈ej tzon̈ jaw leslwoc 'aych 'a jun atut tic, tzcaln wach' paxti 'ayach, yic tzqui nan qui b'a yuj qui mul on̈,

²⁷ ab' wal 'a satcha'an̈ tas tzcal an̈ a checb' on̈ tic, tza'n lajwc qui mul an̈ a chon̈b' on̈ tic. Tza ch'oxn junc b'eyb'al wach' tzqui b'eylb'ej on̈, tzlajw cha, tza'n cot n̈ab' 'a yib'n̈ lum lum 'ix 'ac' quico'oc tic on̈.

²⁸ Toq'ue 'ay 'aj 'oj tacjoc 'el cawb'en yuj cuaresma mto yuj tz'a'ab', mto yuj no c'ulub', mto yuj jun tzo'n̈ocx no noc', yuj cha tzjaw wejl 'a yib'n̈ jun chon̈b' tic. Toq'ue 'oj jawc oynjoc eb' 'ajc'ojl 'a qui chon̈b' tic on̈, ax sjaw tzann̈j yailal tzon̈ satn 'el on̈,

²⁹ to 'ixta', tzab' wal slesl eb' wit chon̈b' oj smoj q'ue sc'ab' yaln sb'a 'aych 'a stojlal jun atut tic, toto 'oj sna sb'a eb' yet' smasnil sc'ojol.

³⁰ 'Aych 'ec' 'a satcha'an̈ 'aj cajn ach cha, ax ab'n tas 'oj yal eb' 'ayach. Ach xo 'oj 'ac' lajwc smul eb', ax a coln pax eb', ax a'n spac 'a jun jun, a tzyal tas tz'el sb'oni, yujto cojn ach ojc tas 'ay 'a qui pixn junjn on̈.

³¹ Toto 'ixta', 'oj yal sb'a smasnil eb' a chon̈b' 'ayach, ax ach syiclni eb' ya' sb'a pitzn eb' 'a sat lum lum a'jnac can 'a eb' qui mam quichm on̈.

³² Q'uinloc 'ay eb' chuc chon̈b'al 'a caw najat, 'oj yab' eb' a b'inax yuj tas satjub'tac tza b'o yet' a poder, yuj cha, ax sjaw cajn eb' 'a qui cal on̈. Toto 'ay junc eb' tzleslwi 'aych 'a stojlal jun n̈a tic,

³³ 'ab' tas tzyal eb' 'ayach. 'Aych 'ec' 'a satcha'an̈ tzab'ni, 'ac' tas tzc'an eb' 'ayach, sec wach' 'oj ach yojcoc 'el smasnil nacion̈ 'ay 'a sat lum lum tic. 'Oj ach yojcoc 'el eb', ax syiclni eb' 'ayach, 'icha eb' a chon̈b' tic. Nachj cab' pax 'el yuj eb' chajtlto a jun n̈a 'ix in b'o tic, ec yaji, yic tz'och 'emmquilal 'ayach.

³⁴ A yic 'oj qui 'at an̈ israel on̈ tic cac' owl yet' eb' 'ajc'ojl chi 'on̈, yaln̈j 'ajtil 'oj on̈ a checa', toto tzon̈ leslwi 'aych 'a stojlal jun chon̈b' sic'b'il 'el oj tic, yet' 'a stojlal jun n̈a 'ix in b'o eco'oc tic,

³⁵ tzab'n 'a satcha'an̈ tas tzcal 'aych on̈, ach xo 'oj ac' cac' ganar on̈.

³⁶ Q'uinloc 'ay 'aj 'oj 'och qui mul 'aych on̈, yujto an̈ 'anman̈ tic, c'un yoch qui mul, ax scot am owl 'ayn̈ on̈, ax am on̈ a'n 'a yol sc'ab' ewin 'ajc'ojl yajch 'ayn̈ on̈, ax on̈ yi'n can 'at ewin am 'icha presoal 'a junc xo chuc chon̈b'al 'a najat, mto 'a lac'an.

³⁷ Toto a yic 'ayn̈ 'ec' 'a junc chuc chon̈b'al chi 'on̈, tznan sb'a qui c'ojol, tzqui c'ann niwnc'ojlal 'aych yuj qui mul tz'och on̈,

³⁸ toto yet' smasnil qui c'ojl on̈, yet' smasnil qui nab'en on̈, tzqui nan qui b'a 'aj 'ayn̈ 'ec' 'a 'icha presoal cha, ax qui leslwi 'aych 'a stojlal cot lum lum tic a'jnac 'a eb' qui mam quichm tic on̈, yet' 'a jun chon̈b' sic'b'il 'el oj tic, yet' pax 'a jun n̈a b'ob'il eco'oc tic wu'uj,

³⁹ to 'ixta', a 'a satchan̈ 'aj cajn ach cha, tzab' tas tzcal 'ayach, tza pacn tas tzqui c'an 'aych on̈, tza'n lajwc qui mul an̈ a chon̈b' on̈ tic tz'och 'aych cha.

⁴⁰ A ticnec ach in Diosal, tzin tew wal 'ayach, to tzach cot q'uelan, tza chan wal 'ab' lesl tz'och 'aych 'a jun lugar tic.

⁴¹ Cotn̈ mu'c ticnec ach Jehová qui Diosal on̈, yic tzach can cajn 'a jun lugar tic, yet' te a caxa tzch'oxn 'el a poder. Ach Jehová qui Diosal on̈, col eb' ya'mal 'och qui ti 'ayach, ax eb' eco', tzaljc'ojlal cab' yaj eb' yuj a wach'c'ojlal.

⁴² Ach Jehová in Diosal, man̈ in a patquilc 'el an sic'b'iln can 'el oj tic, na cot a chamc'ojlal 'a a checb' David, xchi rey Salomón 'a slesal.