2 Cr 36 - Chuj San Sebastian Bible

'Ochnc Joacaz reyal

¹ Xlajw cha, ax eb' 'anma 'a Jerusalén, a eb' 'ix 'a'n 'och Joacaz, yunnal Josías reyl sjelc smam.

² A Joacaz 23 ab'il sq'uinal yic 'ix schan 'el yich ya'n reyal, 'oxe 'uj 'ix yac' reyl 'a Jerusalén.

^3-4 Ax win sreyl Egipto 'ix 'i'n 'el 'a yopiso 'a Jerusalén, ax Eliaquim yu'tac Joacaz 'ix ya'cn 'och win reyl 'a Judá sjeloc. 'Ix sjeln win sb'i Eliaquim cha, xya'n sb'ic Joacim, 'ix yi'n 'at win Joacaz chi yet' 'a Egipto. 'Ix ya'n win rey Necao chi yac' eb' 'aj Judá chi stojlb'al 'a winac, 75 quintal q'uen plata, yet' 'oxe arroba q'uen oro.

'Ochnc Joacim reyal

⁵ A Joacim 25 ab'il sq'uinal, yic schan 'el yich ya'n reyal, uxlche ab'il xyac' reyl 'a Jerusalén. Palta caw maysch'olnil x'el sb'on 'a sat Jehová sDiosal.

⁶ Ax Nabucodonosor sreyl Babilonia a 'ix 'a'n owl yet'oc, 'ix sjaln yet' cadena, xyi'n 'at 'a Babilonia cha.

⁷ An̈jtona xyi'n 'at Nabucodonosor chi nan̈l yamc'ab' yic yatut Jehová, 'ix ya'n 'och 'a yol yatutal sdiosal 'a Babilonia.

⁸ Ax jantcto yab'xil Joacim, yet' sb'eyb'al to maysch'olnil, yet' pax tas tu 'ix 'el sb'oni, ata tz'ib'b'il can 'a ch'an̈ libro yic yab'xil eb' sreyl Israel yet' Judá. Ax jun yunnal tzcuch Joaquín, a x'ochx can reyl sjeloc.

A Joaquín 'ijxnac 'at*r* 'icha presoal 'a Babilonia

⁹ A Joaquín wajxclajn̈e ab'il sq'uinal yic schan 'el yich ya'n reyal, 'oxe 'uj yet' lajn̈e xo c'u xyac' reyl 'a Jerusalén, palta caw maysch'olnil x'el sb'on 'a sat Jehová.

¹⁰ A 'a yic b'ab'l 'uj 'a yic junx ab'il, 'ix yaln rey Nabucodonosor to tz'ijx 'at Joaquín 'a Babilonia yet' jun tzo'n̈ yamc'ab' to chan̈ stojol yic yatut Jehová. Ax Sedequías yu'tac can smam Joaquín cha, a xya'cn 'och win sreyloc Judá yet' Jerusalén.

'Ochnc Sedequías reyal

¹¹ A Sedequías 21 ab'il sq'uinal yic schan 'el yich ya'n reyal, uxlche ab'il xyac' reyl 'a Jerusalén.

¹² Palta caw maysch'olnil x'el sb'on 'a sat Jehová sDiosal. Ma'ix syiclj tas xyal Jeremías schecb' Dios 'a 'a, atn tas 'ix 'ajx yal yuj Jehová.

¹³ An̈jtona', 'ix yac' tenmtacl sb'a 'a Nabucodonosor, atn jun 'aj 'ix yac' sti 'a sat Dios, to junxn̈ej tzyutj snab'en yet'oc. Jun 'eln̈ej 'ix yac' pitb'oc 'el snab'en, man̈xtoc 'ix yal sc'ojl xmeltzj 'a Jehová sDiosal chon̈b' Israel.

¹⁴ An̈jtona', a smasnil eb' sat ya'mal 'och sti eb' 'anma 'a Dios, yet' smasnil eb' chon̈ab', caw tzniwtj eb' sb'on maysch'olnil. A wal sb'eyb'al jun tzo'n̈ xo nacion̈ tzb'eylb'ej eb', tzyixtj 'el eb' yatut Jehová, atn jun sic'b'il 'el yuj 'a Jerusalén.

¹⁵ A Jehová sDiosal eb' yet' smam yicham, a x'a'n tennb'ilal 'a eb' yuj eb' schecab', yujto caw tz'o'ch sc'ojl 'a schon̈ab', yet' 'a scajnub'.

¹⁶ Palta ton̈j 'ix tzetzx eb' schecb' Dios chi yuj eb', may yel'ch tas 'ix yal eb' chi 'a sat eb', tzb'uchwj pax eb' 'a eb' schecb' Dios cha, masnto xjaw yowl sc'ojl Jehová 'a yib'n̈ schon̈ab', man̈xtzac stac' yoch wa'an.

Xma'x 'ejm lan̈chjoc yatut Jehová

¹⁷ Xlajw cha, xchecx cot win rey yet' eb' soldado 'aj Babilonia yuj Jehová, yic tzya'n owl yet' eb' 'aj Judá cha. A yic 'ix 'ajx ganar eb', 'ix milx cham eb' quelm yet' espada a yol yamq'uil yatut Dios. Man̈x 'a jac sniwnc'ojlal 'a eb' quelem, 'a eb' cob'es, yet' 'a eb' 'ichmtac 'anma man̈x 'a yip. Xya'ch Jehová smasnil eb' 'a yol sc'ab' jun rey cha.

¹⁸ An̈jtona', smasnil yamc'ab' yic yatut Dios, niwac yet' scotcal, yet' jantcn̈ej tas 'ay ta', yet' jantcn̈ej tas 'ay 'a yatut win rey, yet' eb' 'aych yajlil yet'oc, c'uxn 'ix yij 'at smasnil 'a Babilonia.

¹⁹ 'Ix sn̈usn eb' yatut Dios, sma'n can lan̈chjoc eb' smuroal Jerusalén, sn̈usn eb' smasnil despacho, sma'n can juwc eb' smasnil tas to chan̈ stojol.

²⁰ Ax jantcto eb' ma'ix cham yuj espada, 'ix 'ijx 'at eb' 'a 'icha presoal 'a Babilonia. 'Ix 'ochcn eb' smosooc win rey yet' eb' yunnal winac, masnto xyij yip nacion̈ Persia.

²¹ 'Ixta 'ix 'aj yel'ch tas ya'jnac Jehová yal-l win Jeremías. 'Ixta x'aj yilj lum lu'um, yujto niwn tiempo may munljel xb'o 'a sat lu'um, masnto stz'acw 70 ab'il.

A sley win Ciro

²² A 'a b'ab'l ab'il yoch Ciro reyl 'a Persia, ata x'el'ch tas ya'jnac Jehová yal-l Jeremías. A Jehová a 'ix aln 'a snab'en Ciro sreyl Persia, yic tzyaln 'el jun ley 'a smasnil yol snacion̈ 'a un̈al, tzyaln jun ley chi 'ixtic:

²³ An Ciro in tic, sreyl in Persia, an tzwal 'ixtic: A Jehová sDiosal satcha'an̈, a x'a'n 'och smasnil nacion̈ 'ay 'a sat lum tic 'a yol in c'ab'. A 'ix aln 'ayin, to tzin b'o chan̈ junc yatut 'a Jerusalén 'a yol yic Judá. Yuj cha, tzann̈j ex to schon̈b' Jehová eyaji, colwj cab' Jehová e Diosal eyet'oc. A ticnec 'ixquec 'a Jerusalén cha, xchi Ciro.