2 Cr 35 - Chuj San Sebastian Bible

Tznax q'uin̈ yuj Josías*r* yic yel eb' israel 'a libre

¹ A 'a Jerusalén, 'ix nax cot q'uin̈ yuj Josías yic yel eb' israel 'a libre yuj yijx chan̈ sb'i Jehová. A 'a chan̈lajn̈e yoch b'ab'l 'uj, 'ix milx cham no quelm calnelu xajmb'al-l yuj q'uin̈ cha.

² An̈jtona', xya'n 'och Josías eb' ya'mal 'och sti eb' 'anma 'a Dios 'a yopiso. 'Ix 'ajx snab'enoc eb' yu'uj, yic tzyiln eb' yopiso 'a yatut Jehová.

³ 'Ix ya'n syam sb'a eb' levita tz'a'w servil 'a Jehová atn eb' cuywjum 'a sley Jehová 'a scal eb' yit israelal, xyaln 'a eb' 'ixtic: A ticnec man̈x 'oj e b'achb'eyc'oc te scaxail trato yet' sjolm e quelab'. Junxn̈ej 'aj tzcan te 'a yet'l 'a yol yatut Jehová, atn jun n̈a sb'ojnac Salomón, yunnal David sreyl chon̈b' Israel. A ticnec ata 'oj eyac' servil Jehová qui Diosalec, yet' pax 'a eb' quit israelalec.

⁴ B'oc 'och e b'a 'a stzolil, a tzyal stzol-l eb' e mam eyicham, a tzyal yaj stz'ib'xcan yuj David sreyl qui chon̈ab', yet' Salomón atn yunnal.

⁵ Wach' eyaj 'a yamq'uil yatut Jehová nan̈loc ex ax levita ex tic, a tzyal sb'ey stzol-l junjn macan̈, sec wach' tzex colwj 'a junjn macn̈ eb' quit israelal to yican sb'a,

⁶ yic tze miln cham no quelm calnelu yic q'uin̈ tic yet' eb'. Yuj cha, sacb'tzejec e b'a, yet' tas to yowlal tzsacb'tzaxi, sec wach' 'oj stac' syiclni eb' quit israelal smasnil tas yaljnac can Moisés yuj Jehová, xchi win rey.

⁷ Xlajw cha, ax 'a scal scajb'en noc' win rey Josías cha, ata xyij 'elt jun tzo'n̈ no xyac' siylab'il 'a eb' chon̈b' yamn yaj chi ta', sec 'ay no wach' ya'n eb' xajmb'alc 'a yic tznax q'uin̈ cha: 30 mil no calnelu yet' no chiwo, 'oxe mil no quelm wacax.

⁸ An̈jtona eb' 'aych yajlil yet' win rey, 'ix 'el 'a sc'ojl eb' ya'n siylab' 'a eb' chon̈ab', yet' 'a eb' ya'mal 'och sti eb' 'anma 'a Dios, yet' 'a eb' levita. Ax pax win Hilcías, Zacarías yet' pax Jehiel, atn eb' tz'iln yatut Dios, 'ix yac' eb' 2,600 no calnelu, yic tznax q'uin̈ cha, yet' 'oxe ciente no quelm wacax.

⁹ A Conanías yet' eb' yu'tac, atn Semaías, Natanael yet' pax Hasabías, Jehiel yet' Josabad, atn eb' syajlil eb' levita, 'ix yac' eb' o'e mil calnelu, yic tznax q'uin̈ cha, yet' pax o'e ciente no wacax, yic tz'ajx no xajmb'al-l yuj eb' levita.

¹⁰ Wach'x yaji yic tznax q'uin̈ cha, ax eb' ya'mal 'och sti eb' 'anma 'a Dios, 'ix sb'on 'och sb'a eb' 'a stzolil, 'ixta pax eb' levita yic tzyiln eb' stzol-l yico'.

¹¹ 'Ixnta xyutj eb' smiln cham no noc' yic q'uin̈, tzya'n eb' schic'l no 'a eb' ya'mal 'och sti eb' 'anma 'a Dios, sec tzicch eb' schic'l no 'a yich yet'l xajmb'al. Xlajw cha, spatz'n 'el eb' levita chi stz'umal no xajmb'al cha,

¹² tzyi'n 'el eb' no xepual xajmb'al to tz'a smasnil, tzpojn 'ec' eb' 'a junjn macn̈ eb' to yican sb'a, yic tzya'n eb' 'a Jehová, 'icha yaj stz'ib'xcan 'a ch'an̈ libro yic Moisés. An̈jtona', 'ixtnta xyutj eb' sb'on no wacax.

¹³ Xlajw cha, sb'oln eb' no xajmb'al yic q'uin̈, 'icha yaj stz'ib'xcani; ax jun tzo'n̈ xo no xajmb'al, 'ix tz'an̈x no 'a yol chen, 'a yol cotc chen, yet' 'a yol xalten. Yajn̈ej 'ix spojn 'ec' eb' mu'c 'a smasnil eb' chon̈ab'.

¹⁴ Xlajw cha, sb'on eb' mun yico', yet' pax yic eb' ya'mal 'och sti eb' 'anma 'a Dios, yujto a eb' yin̈tl Aarón cha, caw wal witz'n yaj eb', yuj ya'n tz'a eb' no xajmb'al to tz'a smasnil yet' no xepual masnto tzq'uic'b'i. Yuj cha, mun wal tzb'o eb' levita yico', yet' yic pax eb' yin̈tl Aarón cha.

¹⁵ Ax pax eb' 'aych 'a yib'n̈ sb'itni, atn eb' yin̈tl can Asaf, a eb' tic, 'aychn̈ej eb' yiln yopiso, 'icha yaljnac can David, yet' Asaf, Hemán, Jedutún, atn eb' schecb' rey David 'a pecti'. Ax eb' tan̈m puerta 'aychn̈ej pax eb' yiln yopiso. May junc eb' xyactjcan yiln yopiso, yujto a eb' yit levitail eb', a eb' xb'on xajmb'al eb' cha.

¹⁶ 'Ixtnta x'aj yajx servil Jehová 'a yic sc'ul q'uin̈ cha, yic tz'ajx tz'a xajmb'al to tz'a smasnil 'a yib'n̈ yet'l xajmb'al to yic Jehová, 'icha xyutj rey Josías yalni.

¹⁷ A smasnil eb' israel 'ayc' 'a yic jun tiempoal cha, sna eb' q'uin̈ cha, yet' pax uque c'u q'uin̈ yic tzwan eb' 'ixm pan may yich.

¹⁸ Mant 'a 'aj tznax q'uin̈ yic yel eb' israel 'a libre jun 'ejmoc 'icha jun cha, yictax 'a yol stiempoal Samuel win schecb' Dios. May pax junc sreyl chon̈b' Israel 'ix nan jun q'uin̈ 'icha jun 'ix sna rey Josías. To 'a smasnil sc'ojol 'ix snan q'uin̈ yet' eb' ya'mal 'och sti eb' 'anma 'a Dios, eb' levita, eb' 'anma 'aj Judá, yet' eb' israel 'ayc' ta', yet' pax eb' cajn 'a Jerusalén.

¹⁹ A yic swajxclajn̈il ab'il xo yoch Josías reyal, 'ix nax jun q'uin̈ cha.

Schaml Josías

²⁰ 'Ayx tiempo ye'cn jun tzo'n̈ tic yet' yic ya'n nipxc rey Josías yatut Jehová, ax Necao sreyl Egipto, 'ix c'och 'a a Éufrates, yic tzya'n owl 'a chon̈b' Carquemis. A yic cha, 'ix 'at Josías smac Necao cha.

²¹ Ax Necao cha, 'ix schecb't eb' schecab', yic tz'at ya'nc alxc 'ixtc 'a Josías: Man̈ ac' owl wet' ach sreyl Judá, yujto man̈oc et' tzin jaw wac' owal, palta a yet' junx nacion̈ tzin jaw wac' owal. A Dios 'ix aln 'ayin to tzin c'olwip wa'n owal. 'Actj a ten a b'a yet' Dios, sec wach' matz ach satl yu'uj, yujto 'aych Dios wet'oc, xchi 'a 'a.

²² Palta ax Josías ma'ix syiclj smeltzji, to 'ix ste'wtzej sb'a ya'n owl yet'oc. Ma'ix schaj yab' tas 'ix yal Necao, tic pax a Dios 'ix alni. Yuj cha, 'ix ya'n owl yet' 'a jun pan̈n 'a'lic 'a yol yic Meguido.

²³ Ax eb' julwjum yic Necao, 'ix sjulb't eb' sjul-lab' 'a win rey Josías. 'Ix yamchj win yuj eb'. Xlajw cha, xyaln win rey Josías chi 'ixtc 'a eb' schecab': 'Ijinec 'el 'a tic, yujto caw niwquil in 'aj in lajwi, xchi.

²⁴ Xlajw cha, xyi'n 'elt eb' schecb' 'a yol scaruaje cha, 'ix ya'n 'och eb' 'a yol junx schab'l caruaje. 'Ix yi'n 'at eb' 'a Jerusalén. Ata xchami. 'Ix smucn eb' 'a yet'l eb' smam yicham. Smasnil eb' 'aj Judá yet' eb' 'ay 'a chon̈b' Jerusalén 'ix 'oc' eb' yu'uj.

²⁵ Ax Jeremías 'ix sb'o jun poesía yuj snax cot schamlil Josías, yic tzb'itnaxi. Smasnil eb' winc tzb'itni yet' eb' 'ix 'ix tzb'itni, tzna cot eb' jun b'it yic schamlil rey Josías, yic tzb'itnan eb' jun tzo'n̈ b'it yic cusc'ojlal yuj eb' tzlaj chami. Ax x'aji, x'och jun tic sb'eyb'alc eb' israel. A jun tzo'n̈ tic ata tz'ib'b'il can 'a ch'an̈ libro yic b'it yic cusc'ojlal.

²⁶ Ax jantcto yab'xil Josías yet' tas 'ix 'el sb'on yet' swach' snab'en, to tzchaj sb'a yet' tas tz'ib'b'il can 'a ch'an̈ ley yic Jehová,

²⁷ atn smasnil tas 'ix 'el sb'oni, yictax x'el yich, masnto 'a slajub', ata tz'ib'b'il can 'a ch'an̈ libro yic yab'xil eb' sreyl Israel yet' Judá.