2 Cr 34 - Chuj San Sebastian Bible

'Ochnc Josías reyal

¹ A Josías cha, wajxque ab'il sq'uinal yic schan 'el yich ya'n reyal, 31 ab'il 'ix yac' reyl 'a Jerusalén.

² Caw tojl tas 'ix 'el sb'on 'a sat Jehová. 'Ix sb'eylb'ej sb'eyb'al David, atn smam yicham, toxn ma'ix yij 'el sb'a jac 'a 'a.

A tas sb'ojnac Josías

³ A 'a yic swajxquil ab'il yoch reyal, yic quelm 'unn wali, 'ix schan 'el yich yaln sb'a 'a sDiosal David, atn smam yicham. Ax 'a slajchwil ab'il yoch reyal, syamn 'och satn 'el jun tzo'n̈ tas man̈ wach'c 'a Judá yet' 'a yol chon̈b' Jerusalén. 'Ix ya'n satxoc 'el jun tzo'n̈ macsej 'a jolmctac witz, jun tzo'n̈ sch'oxnb'il comn dios tzcuch Aserá, jun tzo'n̈ yechl to tzeyb'il b'o'oc, yet' pax jun tzo'n̈ yechl to tenb'il b'o'oc.

⁴ Caw q'ueln 'ochi, 'ix ya'n ma'xoc poj jun tzo'n̈ yet'l xajmb'al yic Baal. An̈jtona', 'ix ya'n ma'xoc poj jun tzo'n̈ yet'l xajmb'al 'aj tz'a incienso to 'ay q'ue 'a cha'an̈. Xya'n pax ma'x poj jun tzo'n̈ sch'oxnb'il Aserá cha, jun tzo'n̈ yechl to tzeyb'il b'o'oc, yet' pax jun tzo'n̈ yechl to tenb'il b'o'oc. Pococ x'aji, 'ix ya'n tzicxoc 'at spoccal chi 'a yib'n̈ 'aj mucn eb' xyac' xajmb'al 'a 'a.

⁵ An̈jtona', 'ix ya'n 'ajxc tz'a sb'acl eb' ya'mal 'och sti eb' 'anma 'a scomn diosal 'a yib'n̈ yet'l xajmb'al cha, 'ixtnta xyutj sacb'tzan Judá yet' chon̈b' Jerusalén.

⁶ 'Ixta pax xyutj 'a smasnil chon̈b' 'a yol yic Manasés, 'a yol yic Efraín, yet' 'a yol yic Simeón, masnto 'ix c'och 'a yol yic Neftalí, yet' 'a jun tzo'n̈ chon̈b' mac'b'il 'ejm lan̈chjoc 'a stz'ey cha.

⁷ A yic 'ix lajw sma'n poj jun tzo'n̈ yet'l xajmb'al, jun tzo'n̈ sch'oxnb'il Aserá cha, jun tzo'n̈ yechl tzeyb'il b'o'oc, yet' pax smasnil jun tzo'n̈ xo yechl 'a smasnil yol yic Israel, 'ixta to b'i'an, 'ix paxx cot 'a Jerusalén.

'Ilchjnac ch'an̈ libro yic ley

⁸ A 'a yic swajxclajn̈il ab'il xo yoch reyal, yic tox 'ix lajw sacb'tzan jun nacion̈ cha, yet' yatut Jehová sDiosal, 'ixta to b'i'an, 'ix ya'n nipxc yatut Jehová cha. 'Ix can jun munljel chi 'a yib'n̈ Safán, yunnal Azalía, yet' Amasías sgobernadoral chon̈ab', yet' pax Joah, yunnal Joacaz win 'ajtz'ib'.

⁹ Xlajw cha, x'at eb' tic 'at yil Hilcías sat ya'mal 'och sti eb' 'anma 'a Dios. Xit' ya'nc eb' q'uen tumn 'a 'a, atn q'uen xyij chan̈ eb' levita 'aych stan̈malc spuertail yatut Jehová 'a scal eb' yin̈tl Manasés, yet' 'a scal eb' yin̈tl Efraín, atn smasnil jun tzo'n̈ 'anma cannc can 'a yol yic Israel. An̈jtona', 'ay pax q'uen x'ec' 'ijxoc chan̈ 'a scal eb' yin̈tl Judá, 'a scal eb' yin̈tl Benjamín, yet' pax 'a scal smasnil eb' cajn 'a Jerusalén.

¹⁰ Xlajw cha, xya'n 'och q'uen tumn chi 'a yol sc'ab' eb' 'aych 'a yib'n̈ yiln sb'o munljel 'a yatut Jehová. Ax eb' chi tz'a'n stojl eb' tznipn cha.

¹¹ Xya'n pax eb' q'uen tumn chi 'a eb' josmte', yet' 'a eb' cuywjum yaj 'a jun munljel cha, yic tzmann eb' q'uen q'uen to tzeyb'ilxo, yet' smasnil te te tz'och syamnub'loc, yic tz'och pax te spatzb'iloc jun tzo'n̈ n̈a juwncan yuj eb' sreyl Judá.

^12-13 A jun tzo'n̈ winc cha, caw wal wach' 'ix yutj eb' sb'on jun munljel cha. A mach tzjucb'tzan eb', a eb' levita, atn Jáhat yet' Abdías, yin̈tl Merari eb'; yet' Zacarías yet' Mesulam, yin̈tl Coat eb'. A eb' tic sat yajl yaji. Ax jun tzo'n̈ xo eb' levita 'ajcuenta 'a b'it yet' 'a syamc'ab'il yic b'it, yajl pax yaj eb' 'a eb' cuchm 'icatz, yet' 'a jun tzo'n̈ xo eb' tzmunlji. 'Ay pax eb' 'ajtz'ib', 'ay pax eb' 'ilm munljel, 'ay pax eb' tan̈m spuertail yatut Dios.

¹⁴ A yic wan yijx 'elt q'uen tumn xit' can 'a yatut Jehová, 'ix 'ilchj ch'an̈ libro yic sley Jehová yuj Hilcías cha, atn tas yaljnac can 'a Moisés.

¹⁵ Xlajw cha, xyaln Hilcías 'ixtc 'a Safán win 'ajtz'ib': 'Ix 'ilchj ch'an̈ libro yic ley wuj 'a yatut Jehová, xchi. 'Ix ya'n Hilcías ch'an̈ libro chi 'a Safán.

¹⁶ Ax Safán chi 'ix 'i'n 'at ch'an̈ 'a win rey. Xyaln 'a win 'ixtic: —An̈ a checb' on̈ tic mamin rey, wan qui b'on smasnil munljel 'aycn 'och 'a quib'an̈.

¹⁷ 'Ix syam sb'a q'uen tumn 'ix wul 'ajxoc can 'a yatut Jehová, 'ix 'ajx q'uen 'a yol sc'ab' eb' 'aych 'a yib'n̈ yiln munljel, yet' 'a yol sc'ab' eb' tzb'on munljel cha.

¹⁸ An̈jtona', a Hilcías cha, 'ix yac' jun ch'an̈ libro 'ayin, xchi. Xlajw cha, 'ix yawtn Safán ch'an̈ 'a yojltac win rey cha.

¹⁹ A yic xyab'n win rey tas tzyal ch'an̈ ley cha, 'ix stzilnjat win spichul.

²⁰ 'Ix ya'n 'awtxoc cot Hilcías, Ahicam, yunnal Safán, Abdón yunnal Micaía, Safán win 'ajtz'ib', yet' pax Asaías schecb' win rey.

²¹ Xyaln win 'a eb' 'ixtic: —'Ixquec, 'at c'anb'jec 'a Jehová wu'uj, yet' yuj smasnil eb' cannc 'a yol yic Israel yet' 'a yol yic Judá, yuj tas tzyal ch'an̈ libro 'ix 'ilchj tic; yujto caw niwquil yowl sc'ojl Jehová 'ay cot 'a quib'n̈ec, yujn̈ej to ma'ix syiclj eb' qui mam quichmec spaxti Jehová, ma'ix sb'eylb'ej pax eb' smasnil tas tz'ib'b'il 'a ch'an̈ libro tic, xchi.

²² Xlajw cha, 'ix 'at Hilcías yet' jun tzo'n̈ xo eb' xchecx 'at yuj win rey, yic tz'at sc'umnc eb' 'ix Hulda 'ix schecb' Dios, yistzil Salum, yunnal Ticva, yixchicn Harhas, atn scuenta smoln smasnil pichl 'a yatut Jehová. Ata cajn 'ix 'a jun schamacn̈il chon̈b' 'a Jerusalén.

²³ A yic 'ix yaln eb' 'a 'ix, xta'w 'ix, xyaln 'ix 'a eb' 'ixtic: —'Ixtc 'ix yutj Jehová qui Diosalec yalni: Alc 'a jun mach ex checn cot wul e c'anb'c 'ayin, chajtlto an Jehová in, an tzwala:

²⁴ 'Oj wa' cot yailal 'oj satnc 'el jun lugar tic, yet' 'a yib'n̈ eb' 'anma cajn 'a 'a, smasnil catb' tz'ib'b'il can 'a ch'an̈ libro 'ix 'awtx 'a yojltac win sreyl Judá.

²⁵ Yujto in eyactjcani, ax 'a jun tzo'n̈ comn dios xe yac' e xajmb'al, xe tzuntzn cot wal yowl in c'ojl yuj smasnil tas x'el e b'oni. Yuj wal cha, tox 'ix cot yowl in c'ojl 'a yib'n̈ jun lugar tic, man̈xtzac stac' stup 'a yib'an̈.

²⁶ Yuj cha, alc 'a sreyl Judá, atn jun mach ex checn cot wul e c'anb'c 'ayn an Jehová in, to an Jehová sDiosal in chon̈b' Israel an tzwal 'ixtic: Yujto xa chaj ab' tas tzyal ch'an̈ libro,

²⁷ 'ix a'ch wal 'a a c'ojol, xe'n 'ejm a b'a 'a wojltac an Dios in, yic 'ix ab'ni to 'ay yowl in c'ojl 'a yib'n̈ jun lugar tic, yet' 'a yib'n̈ eb' cajn 'a 'a. Yujto ach 'och 'emmquilal 'a wojltac, xa tzilnjat a pichul, caw ach 'oq'ui, an̈jtona 'in, 'ix wab' tas 'ix ala. An Jehová in, an tzwala.

²⁸ An 'oj wac' 'el'choc, to junc'ojlal 'oj aj a chami. 'Oj a mucx 'aj mucn eb' a mam echam. Man̈x 'oj el yailal 'oj wa' cot 'a yib'n̈ jun lugar tic yet' 'a yib'n̈ eb' cajn 'a 'a, xchi Dios, xchi 'ix. Xlajw cha, xmeltzj eb' schecb' win rey, 'ix wul yalnc eb' spac tas xit' sc'anb'j cha.

A strato Josías yet' Dios

²⁹ Xya'n win rey 'awtxoc cot smasnil eb' yichm wincal chon̈b' Judá yet' Jerusalén, yic tzyamn sb'a eb'.

³⁰ Xlajw cha, x'at win rey 'a yatut Jehová yet' smasnil eb' winc 'aj Judá yet' smasnil eb' cajn 'a chon̈b' Jerusalén, yet' eb' ya'mal 'och sti eb' 'anma 'a Dios yet' jun tzo'n̈ xo eb' levita, yet' smasnil eb' 'anma 'ay 'a yol nacion̈ cha, smasnil eb' niwn yel'chi, yet' eb' may yel'chi. 'Ix ya'n win rey 'awtxoc yab' eb' smasnil tas tzyal ch'an̈ libro yic trato, atn ch'an̈ x'ilchj yuj eb' 'a yol yatut Jehová.

³¹ 'Ix 'och lin̈n win rey 'a stz'ey jun niwquil 'oy. 'Ix sb'on pax strato yet' Jehová, chajtlto 'oj syiclc sb'eylb'an schecnb'il Jehová, scuynb'il, yet' sley. 'Oj syiclc 'a smasnil sc'ojol, 'a smasnil snab'en, ax ya'n 'och 'a yopiso 'icha yaj stz'ib'x can jun trato chi 'a ch'an̈ libro cha.

³² Xlajw cha, xyaln 'a smasnil eb' 'anma 'aj Jerusalén yet' 'a eb' yic Benjamín yamn yaj ta', to tzta'wj eb' sti syiclni jun checnb'il cha. Smasnil eb' cajn 'a Jerusalén, 'ix syiclj eb' sb'on 'icha yaj stz'ib'xcan jun strato Dios, atn sDiosal eb' yet' eb' smam yicham.

³³ 'Ix ya'n Josías 'ijxc 'el smasnil yechl to yajb'entac 'a smasnil yol smacb'en eb' israel. Xyaln 'a smasnil mach 'ayc' 'a yol yic Israel to tzyac' servil eb' Jehová sDiosal. A 'a yic pitzn Josías, ma'ix yij 'el sb'a xon eb' 'a Jehová, atn sDiosal eb' yet' smam yicham.