2 Cr 31 - Chuj San Sebastian Bible

¹ A yic tox 'ix lajw jun q'uin̈ cha, smasnil eb' israel yamn yaj ta', 'ix 'at eb' 'a smasnil chon̈b' 'a yol yic Judá, 'ix sma'n poj eb' jun tzo'n̈ q'uen 'aj tzyal sb'a eb' 'anma', yet' jun tzo'n̈ sch'oxnb'il comn dios Aserá. 'Ix sma'n juwc eb' jun tzo'n̈ macsej 'a jolmctac witz, yet' jun tzo'n̈ yet'l xajmb'al 'ay 'a smasnil yol yic Judá, 'a yol yic Benjamín, 'a yol yic Efraín yet' pax 'a yol yic Manasés, masnto xlajw smasnil. Xlajw cha, 'ix paxx smasnil eb' israel 'a schon̈ab', junjn eb' 'ix 'at 'a slu'um.

² Xlajw cha, spojn 'ec' Ezequías eb' ya'mal 'och sti eb' 'anma 'a Dios yet' eb' yit levitail 'a stzolil, sec wach' junjn mach tzyil yopiso. A eb' ya'mal 'och sti eb' 'anma', a eb' x'a'n tz'a no xajmb'al to tz'a smasnil, yet' no xajmb'al yic junc'ojlal. Ax jun tzo'n̈ xo eb' levita cha, a eb' 'ix 'a'n yuj diosal 'a Jehová, 'ix yaln pax eb' wach' paxti 'a 'a, stan̈wni pax eb' spuertail yatut Jehová.

³ A win rey 'ix yac' win no scajb'il noc' xajmb'alil: no xajmb'al to tz'a smasnil 'a yic sq'uin̈b'ial yet' 'a yemc'ual, no xajmb'al to tz'a smasnil tz'ajx 'a sc'ul 'iljelal, yet' no xajmb'al yic tznax q'uin̈ yic tzpac' 'uj yet' jun tzo'n̈ xo q'uin̈ to niwn yel'chi, 'icha yaj stz'ib'x can 'a sley Jehová.

⁴ An̈jtona', xyaln pax 'a smasnil eb' 'anma cajn 'a Jerusalén, to tzyac' eb' scolwal toxn tzyac' eb' 'a eb' ya'mal 'och sti eb' 'anma 'a Dios yet' 'a eb' levita, sec wach' yelc'ojlal tzyac' servil eb' Jehová, 'icha yaln ley.

⁵ A yic x'elt jun ley cha, 'ix yac' eb' israel jantcn̈ej tas x'el 'a sc'ojl ya'ni, jun tzo'n̈ yel xo wach': atn 'ixm trigo, yal uva, aceite, no yalchab', yet' jantcn̈ej tastc tzmol chan̈ eb'. An̈jtona', xyi'n pax cot eb' sdiesmoal sat yawb'en. Caw niwn 'ix yac' eb'.

⁶ An̈jtona pax eb' cajn 'a Jerusalén, yet' jun tzo'n̈ xo chon̈b' 'ay 'a yol yic Judá, 'ix yac' eb' sdiesmoal swacax, scalnelu, yet' sdiesmoal janctn̈ej tas 'ay 'a eb', to yicxo Jehová sDiosal eb' yaji. Caw jun b'uln̈ x'aj syamb'tzan sb'a scolwal eb' smasnil.

⁷ A 'a yic yoxl 'uj, 'ix syamn 'och eb' smolb'tzan jun tzo'n̈ cha, masnto 'a yucl 'uj 'ix 'och wan eb' ya'ni.

⁸ A Ezequías yet' eb' yajl yaj yet'oc, a yic xyiln eb' jun tzo'n̈ xmolb'tzax cha, xyaln eb' wach' paxti 'a Jehová yet' 'a yib'n̈ schon̈ab', atn Israel.

⁹ Xlajw cha, sc'anb'n Ezequías 'a eb' ya'mal 'och sti eb' 'anma', yet' 'a eb' yit levitail, yuj jun tzo'n̈ 'ix jaw ch'ucn cha.

¹⁰ Ax Azarías sat ya'mal 'och sti eb' 'anma 'a Dios yin̈tl Sadoc, 'ix ta'wi, xyaln 'ixtic: Yictax schan 'el eb' yich yi'n cot yofrenda 'a yatut Jehová tic, 'ayn̈j tas tzqui c'uxu, caw wal tzon̈ b'ut'ji, caw niwnto tzyac' sobra scani, atn jun tzo'n̈ ch'ucn 'ec' tic, yujto a Jehová 'ix yac' syaxilal 'a yib'n̈ eb' quit chon̈b'ec, xchi.

¹¹ Yuj cha, xya'n Ezequías b'o yet'l 'aj tzmolx jun tzo'n̈ chi 'a yatut Jehová. A yic xlajw sb'o'i,

¹² caw latz'mtac xyutj eb' smoln jun tzo'n̈ b'ab'l sat 'awb'ente chi 'a yojol, yet' jun tzo'n̈ diesmo, yet' pax jun tzo'n̈ xo tas to yic Jehová yaji. A jun levita tzcuch Conanías a xcan 'a yib'n̈ yilni, ax jun yu'tac tzcuch Simei, a xcan xchab'loc yilni.

¹³ A rey Ezequías yet' win Azarías sat yaj eb' yiln yatut Dios, a eb' x'a'n 'och jun tzo'n̈ eb' tic 'a yaln̈ schecnb'il Conanías, yet' Simei cha. A eb' cha, atn eb' tic: Jehiel, Azazías, Nahat, Asael, Jerimot, Jozabad, Eliel, Ismaquías, Máhat, yet' Benaías.

¹⁴ A Coré, yunnal Imna yin̈tl Leví, a yajl yaj 'a yib'n̈ eb' stan̈mal spuertail yatut Jehová 'a stojlal 'aj tzq'uel c'u, 'aych pax 'a yib'n̈ schan ofrenda to tz'el 'a sc'ojl eb' 'anma ya'ni, yet' ofrenda to tzpojx 'eq'ui, yet' tas to yic Jehová yaji.

¹⁵ A eb' levita, atn Edén, Miniamín, Jesúa, Semaías, Amarías yet' Secanías, atn eb' 'ix colwj yet' Coré 'a smasnil sc'ojol, yic tzpojx 'ec' ofrenda 'a schon̈b' eb' ya'mal 'och sti eb' 'anma 'a Dios, a tzyal smacquixtacl yaj eb', eb' 'ichm 'anma', yet' eb' 'unin.

¹⁶ 'Ix spojn 'ec' eb' 'a scal smasnil eb' winc tzjaw 'a yatut Jehová, yic tzwul yilnoc eb' yopiso 'a junjn c'u, a tzyal sjaw stzol-l smacl yic junjn eb' 'a yib'an̈, cojn toto tz'ib'b'il eb' 'a slistail eb' yin̈tl Leví, eb' 30 ab'il sq'uinal, yet' 'a yojltac.

¹⁷ Atn slistail eb' ya'mal 'och sti eb' 'anma 'a Dios b'ob'il, a tzyal smam yichm eb'. A eb' levita junc'l ab'il sq'uinal, yet' 'a yojltac, 'aych eb' 'a lista, a tzyal yopiso eb', yet' yic tzjaw stzol-l smacl yic eb' 'a yib'an̈.

¹⁸ A 'a jun lista cha, tz'ib'b'il eb' cotc 'unin, eb' 'ix 'istzilab'il, eb' 'unnab'il, yet' eb' 'ix 'islab'il, tzyal 'el'chi, smasnil mach 'aych 'a yaln̈ schecnb'il eb', yujto 'a smasnil sc'ojl eb' spojn 'ec' eb' jun tzo'n̈ ofrenda 'ac'b'il 'a Dios cha.

¹⁹ 'Ay pax eb' winc 'aych 'a yib'n̈ spojn 'ec' tas tzc'ux eb' ya'mal 'och sti eb' 'anma 'a Dios, eb' to yin̈tl Aarón, atn eb' levita to tz'ib'b'il sb'i, yet' eb' cajn 'a 'aj tztan̈wx wa no cajb'il noc' 'a schon̈b' eb' ya'mal 'och sti eb' 'anma 'a Dios cha.

²⁰ 'Ixtnta xyutj Ezequías sb'on jun tzo'n̈ tic 'a smasnil yol yic Judá. A smasnil jun tzo'n̈ sb'o cha, caw wal wach', wal yel caw tojl 'a sat Jehová sDiosal.

²¹ A smasnil jun tzo'n̈ sb'o'o yic sc'anx 'a yatut Dios, 'ix sb'o wal 'a smasnil sc'ojol yet' 'a 'emmquilal 'icha yaln ley yet' checnb'il. Yuj cha, caw wach' 'ix 'el'chi.