2 Cr 30 - Chuj San Sebastian Bible

Snajnac Ezequías q'uin̈*r* yic yel eb' israel 'a libre

¹ Xlajw cha, xya'n Ezequías alxc 'a smasnil yol yic Israel yet' 'a Judá, an̈jtona', xya'n 'at scarta 'a eb' yic Efraín yet' 'a eb' yic Manasés, sec to tzjaw eb' 'a yatut Jehová 'a Jerusalén, yic tznax q'uin̈ yic Jehová sDiosal Israel yuj snax cot yel eb' israel 'a libre.

² A yic tox xlajw spaxtin win rey yet' eb' 'aych yajlil, yet' pax eb' 'anma 'a Jerusalén, yic tznan eb' q'uin̈ chi 'a yic schab'l 'ujal,

³ ma'ix stac' snan eb' q'uin̈ 'a stiempoal, yujto mant niwnoc eb' ya'mal 'och sti eb' 'anma 'a Dios tox sacb'tzej sb'a, 'ixta pax eb' chon̈ab', man̈ niwnoc eb' 'ix syam sb'a 'a Jerusalén.

⁴ Caw 'ix chaj sc'ojl win rey jun tic yet' smasnil eb' chon̈ab'.

⁵ Yuj cha, 'ix smol aln eb' to tz'at eb' checb' yet' ch'an̈ carta 'a smasnil yol yic Israel, chajto 'at 'a chon̈b' Beerseba masnto 'a chon̈b' Dan. 'Ix 'awtx eb', sec tzjaw eb' 'a Jerusalén yic tznax jun q'uin̈ cha. Yujto a 'a yic yaln̈taxi, man̈ niwnoc eb' tzyam sb'a yic snan eb' jun q'uin̈ cha, 'icha yaj stz'ib'xcani.

⁶ Xlajw cha, 'ix 'at eb' schecb' win rey 'a smasnil yol yic Israel yet' 'a yol yic Judá yet' ch'an̈ scarta win rey yet' eb' yajl yaj yet'oc. Xchi 'a ch'an̈ carta chi 'ixtic: Ex quit israelal on̈, meltzjan̈c 'a Jehová qui Diosalec, atn sDiosal Abraham, Isaac yet' Israel, sec 'oj meltzjoc pax cot Dios 'ayex, ex to 'atnc 'ex 'elc 'a yol sc'ab' eb' sreyl Asiria.

⁷ Man̈ lajnoc cab' tzeyutj e b'a 'icha eb' qui mam quichmec, 'icha pax eb' quit israelal, caw tenmtac yutjnac sb'a eb' 'a Jehová, atn qui Diosalec yet' eb' qui mam quichmec, a wal 'ix 'a'n satxoc 'el eb', 'icha wal tzcutj quilnec ticnec.

⁸ Yuj cha, man̈ eyac' pitb'oc 'el e nab'en 'icha yutjnac sb'a eb' qui mam quichmec cha. 'A'c 'och e b'a 'a yol sc'ab' Jehová, jawn̈ec 'a yatut, atn jun sic'b'il 'el yuj 'a smasnil tiempo, tzeya'n servil Jehová qui Diosalec quet' on̈, ax yoch wan yowx 'ayex.

⁹ Toto 'oj eya'x 'och e c'ojl 'a Jehová, a eb' 'ajc'ojl 'ix 'i'n 'at eb' quit israelalec yet' eb' eyunnal 'a 'icha presoal, 'oj cusch sc'ojl eb' 'a eb', ax yajx paxt eb' yuj eb' 'a e chon̈ab'. Yujto a Jehová qui Diosalec, caw wach' snab'en, tz'o'ch sc'ojol. Toto tzeya'x 'och e c'ojl 'a 'a, man̈x 'oj 'el ch'umn 'ayex, xchi.

¹⁰ C'uxn 'ix 'ec' eb' checb' chi 'a smasnil yol yic Efraín yet' 'a yol yic Manasés. X'ec' eb' 'a junjn chon̈ab', masnto 'ix c'och eb' 'a yol yic Zabulón. Palta ax eb' 'anma cha, ton̈j xtzewj eb', xb'uchwj eb' 'a eb' checb' cha.

¹¹ Palta 'ay jaywn̈ eb' 'a yin̈tl Aser, yin̈tl Manasés yet' eb' yic Zabulón, 'ix yij 'ejm sb'a eb' 'a Dios, 'ix jaw eb' 'a Jerusalén.

¹² A eb' 'anma 'aj Judá, a Dios 'ix 'a'n sna eb' to tojl tzyutj eb' snab'en, sec tzyiclj eb' checnb'il xyal win rey yet' eb' yajl yaj yet'oc, a tzyal tas 'ix yutj Jehová yalni.

¹³ Yuj cha, caw niwn 'anma 'ix syam sb'a 'a Jerusalén 'a yic schab'l 'uj, yic tznax sq'uin̈l 'ixm pan may yich.

¹⁴ Xlajw cha, syamn 'och eb' yi'n 'el smasnil jun tzo'n̈ macsej 'ay 'a Jerusalén, yet' jun tzo'n̈ yet'l 'aj tz'a incienso, 'ix sjuln can 'at eb' 'a sch'olnil sti a Cedrón.

¹⁵ A 'a schan̈lajn̈il c'u yoch schab'l 'uj cha, smiln cham eb' e no quelm calnelu yic q'uin̈ cha. Ax eb' ya'mal 'och sti eb' 'anma 'a Dios yet' eb' levita, caw 'ix q'uixw 'el eb', yuj cha, 'ix sacb'tzan sb'a eb'. 'Ix yi'n 'at eb' no xajmb'al to tz'a smasnil 'a yatut Jehová.

¹⁶ 'Ix 'ochx eb' 'a yopiso 'a stzol-l jun 'ejm xo, 'icha yaln ley yic Moisés, atn win schecb' Dios. Ax eb' ya'mal 'och sti eb' 'anma cha, 'ix stzicch eb' schic'l no xajmb'al xyac' eb' yit levitail cha.

¹⁷ Yujto til to wal eb' 'anma mantzac sacb'tzej sb'a 'a scal eb' chon̈b' cha, yuj cha, smiln cham eb' levita no quelm calnelu yic q'uin̈ chi yuj eb', sec wach' tz'och yopiso no yuj q'uin̈ cha.

¹⁸ Yujto caw niwn eb' 'anma 'a yin̈tl Efraín, 'a yic Manasés, 'a yic Isacar yet' 'a yic Zabulón to mantzac sacb'tzej sb'a, 'ix scomn chin eb' no xajmb'al yic q'uin̈ cha, palta man̈ 'ixta'oc yaj stz'ib'xcani. Yuj cha, 'ix leslwi Ezequías yuj eb', xyaln 'ixtic: Mamin Jehová qui Diosal ach yet' eb' qui mam quichm on̈, caw wach' a nab'en, 'ac' niwnc'ojlal 'a yib'n̈ smasnil smul eb' to tzya'ch 'a sc'ojl yaln sb'a 'ayach,

¹⁹ wach'xam mantzac sacb'tzej sb'a eb', 'icha yaln sleyl atut, xchi.

²⁰ 'Ix yab' Jehová slesl Ezequías, yuj cha, 'ix ya'n niwnc'ojlal 'a yib'n̈ smul eb' chon̈ab'.

²¹ Yuj cha, uque c'u 'ix can eb' israel 'a Jerusalén. Caw tzaljc'ojlal 'ix sna eb' sq'uin̈l 'ixm pan may yich. Ax eb' ya'mal 'och sti eb' 'anma 'a Dios yet' eb' yit levitail, tzb'itn eb', tzyaln eb' wach' paxti 'a Jehová 'a junjn c'u yet' jun tzo'n̈ yamc'ab' yic b'it 'a Dios to yic yaji.

²² A Ezequías, 'ix yal yuj diosal 'a smasnil eb' levita, to caw xya'ch eb' 'a snab'en ya'n servil Jehová. 'Ix chi eb' no xajmb'al tz'ajx xajmb'al-l 'a jun q'uin̈ to niwn yel'ch 'a uque c'u. 'Ix yac' eb' xajmb'al yic junc'ojlal, 'ix ya'n eb' yuj diosal 'a Jehová qui Diosalec, atn sDiosal eb' qui mam quichmec.

²³ Ax smasnil eb' chon̈ab', 'ix yal eb' to tzyac' uque'ocx c'u q'uin̈, caw wal tzaljc'ojlal 'ix sna eb' junx uque c'u cha.

²⁴ Yujto a Ezequías sreyl Judá, 'ix siyj jun mil no quelm wacax, uque mil no calnelu 'a eb' chon̈ab' yic tzya'n eb' xajmb'aloc, an̈jtona', 'ixta pax eb' yajl yaji, 'ix siyj eb' jun mil no quelm wacax, yet' lajn̈e mil no calnelu. Caw niwn eb' ya'mal 'och sti eb' 'anma 'a Dios 'ix sacb'tzej can sb'a.

²⁵ A eb' ya'mal 'och sti eb' 'anma cha, yet' smasnil eb' 'anma 'aj Judá, caw 'ix tzalj eb'. 'Ixta pax eb' levita yet' smasnil eb' xcot 'a smasnil yol yic Israel. An̈jtona', 'ixta pax eb' chuc chon̈b'al 'ix cot 'a smasnil yol yic Israel cha, yet' pax eb' cajn 'a yol yic Judá.

²⁶ Caw niwn tzaljc'ojlal x'och 'a Jerusalén, yujto a yictax stiempoal Salomón, atn yunnal David sreyl can chon̈b' Israel, caw mant 'a 'aj tzuj 'icha jun tic 'a Jerusalén.

²⁷ Xlajw cha, 'ix q'ue wan lin̈n eb' ya'mal 'och sti eb' 'anma 'a Dios yet' eb' yit levitail, yic tzc'ann eb' syaxilal Jehová 'a yib'n̈ eb' chon̈ab'. Caw 'ix 'ab'x slesl eb' chi 'a satcha'an̈, atn 'a 'aj cajn Dios.