2 Cr 3 - Chuj San Sebastian Bible

Sb'ojnac Salomón yatut Dios

^1-2 'Ix 'el yich sb'on eb' munljum yatut Jehová 'a Jerusalén, yic schab'l xo c'u yoch schab'l 'uj yic schan̈l ab'il yoch Salomón reyl 'a Israel. Ata xb'o 'a lum jolm witz Moriah, 'a 'aj sch'oxjnac sb'a Jehová 'a David. Atn jun lum chi yic yatut Dios yajcn yuj David cha, atn 'a ste'lab' trigo win Ornán 'aj Jebús.

³ A yechl yich yatut Dios 'ix yac' Salomón 'ajxoc b'o cha: 'ay 27 metro spac'b'il, b'aln̈e metro x'aj slewnal sat.

⁴ Ax pax scoredoral, b'aln̈e metro spac'b'il, lajn x'aj slewnal sat yet'oc, b'aln̈e metro x'aj pax ste'il. Ax 'a sat 'och scoredoral cha, ata 'ix yac' 'ajxoc 'och oro caw wal wach' 'a 'a.

⁵ 'Ix ya'n 'ajxoc 'och te 'a'nte q'uisis 'a sat 'a yojol, xlajw cha, xya'n 'ajxoc 'och oro caw wal wach' 'a 'a, xya'n pax 'ajxoc 'och yechl te palma yet' yechl q'uen cadena 'a 'a.

⁶ 'Ix ya'n 'ajxoc 'och jun tzo'n̈ q'uen q'uen man̈x jantcoc swach'l yilx yelwnub'loc. A q'uen oro 'ix sc'an eb' cha, atn q'uen caw wach' cotnc 'a Parvaim.

⁷ 'Ix 'ajx 'och q'uen oro 'a smasnil yojol, 'a smasnil spatzb'il, 'a smasnil smarcoal spuertail, yet' pax 'a spuertail cha, yet' 'a smasnil sat te 'a'nte 'aych 'a sat 'a yich. 'Ix 'ajx 'och pax yechl eb' querubín 'a sat te 'a'nte cha.

⁸ An̈jtona', 'ix ya'n b'o jun Lugar to cojn Dios 'ay yico'. 'Ix b'o 'a yojl cha. 'Ay b'aln̈e metro spac'b'il, lajn yet' slewnal sat yatut Dios cha, b'aln̈e metro pax schiquin. Xlajw cha, 'ix ya'n 'ajxoc 'och oro caw wal wach' 'a 'a, jab'xoj man̈ o'e'oc ciente quintal q'uen x'och 'a 'a.

⁹ A yal-l q'uen lawx oro x'och 'a 'a, junc'l onza yal-l junjn q'ue'en. 'Ix 'och pax oro 'a yojl jun tzo'n̈ cuarto 'a cha'an̈.

¹⁰ A 'a yojl jun Lugar to cojn Dios 'ay yic cha, ata 'ix yac' 'ajxoc b'o chab' yechl querubín 'a te te'. 'Ix 'och pax oro 'a jun tzo'n̈ cha.

^11-12 A stel sc'axl chab' yechl querubín cha, b'aln̈e metro 'a schan̈il, yujto 'ay chab' metro yet' 25 centímetro junjn sc'axl eb', tzc'och tenn junjn sc'axl eb' chi 'a sat yich yatut Dios cha, ax junjn xo sc'axl eb' tzchaj sb'a 'a snan̈l yojol.

¹³ A eb' querubín tic lin̈n chan̈ eb', q'ueln 'el eb' 'a jun cuarto 'ay 'a snan̈l yojl cha.

¹⁴ An̈jtona', 'ix ya'n b'o jun te cortina 'a ch'al nab'a lino, te q'uic'mucnac, te púrpura, yet' te chac, xya'n 'och pax yechl querubín 'a te yelwnub'loc.

A chab' niwc 'oy

¹⁵ 'Ix ya'n pax Salomón b'o chab' niwc 'oy, tecn 'ay junc waclajn̈e metro ste'il, a jun tzo'n̈ cha, 'ix 'och 'a sat yatut Dios. Chab' metro yet' 25 centímetro spiml smacl sjolm junjn te 'oy cha.

¹⁶ An̈jtona', 'ix ya'n b'o pax jun tzo'n̈ q'uen malla to lajn yilx 'icha chim, lajn yaj sb'o 'icha q'uen cadena. 'Ix 'ajx 'och 'a sjolm q'ue'ch 'oy cha. 'Ix ya'n b'o pax jun ciente yechl sat granada, 'ix 'ajx 'och 'a q'uen malla cha.

¹⁷ Xlajw cha, xya'n 'ajxoc 'och jun tzo'n̈ niwc 'oy chi 'a sat yatut Dios. Jun xcan 'a stojlal sur, 'ix ya'cn sb'ic Jaquín, ax junx xcan 'a stojlal norte, 'ix ya'cn sb'ic Boaz.