2 Cr 28 - Chuj San Sebastian Bible

'Ochnc Acaz sreyloc Judá

¹ A Acaz cha, junc'l ab'il sq'uinal yic schan 'el yich ya'n reyal. Waclajn̈e ab'il xyac' reyl 'a Jerusalén, palta man̈ tojloc tas x'el sb'on 'a sat Jehová, man̈ 'ichaoc yic David, atn smam yicham.

² An̈j sb'eyb'al eb' sreyl chon̈b' Israel sb'eylb'ej. An̈jtona', stenb'o pax jun tzo'n̈ q'uen q'ue'en yic tzb'o yechloc jun comn dios tzcuch Baal.

³ 'Ix ya'n tz'a incienso 'a lum pan̈n 'a'lic yic Ben-hinom. Ata xyac' tz'a yunnal xajmb'alil, 'icha stu b'eyb'alil jun tzo'n̈ nacion̈ satjnac 'el Jehová 'a yic mantzac tzc'och eb' israel 'a lu'um.

⁴ An̈jtona', 'ix ya'n xajmb'al, 'ix ya'n pax tz'a incienso 'a jun tzo'n̈ macsej 'ay 'a jolmctac witz, yet' 'a lum tzalan, yet' pax 'a yich eb' te te pim xi'il.

⁵ Yuj wal cha, 'ix 'ajx 'och yuj Jehová sDiosal 'a yol sc'ab' sreyl Siria. Caw niwn sb'isl eb' 'aj Judá xyij 'at eb' sirio 'a 'icha presoal 'a Damasco. An̈jtona', xya'n pax 'och Jehová eb' 'aj Judá chi 'a yol sc'ab' sreyl chon̈b' Israel, yuj cha, caw niwn eb' xchami.

⁶ A eb' soldado win Peka, sreyl Israel, yunnal Remalías, junn̈j c'u smil cham eb' jun 120 mil soldado 'aj Judá, eb' caw tec'an, yujn̈ej to xyactjcan eb' Jehová, atn sDiosal eb' yet' smam yicham.

⁷ Ax win Zicri, atn jun soldado caw 'ay yip 'a scal eb' yin̈tl Efraín, a 'ix miln cham Maasías yunnal win rey, yet' Azricam, atn yajl yaj 'a sdespacho winac, yet' pax Elcaná, sat yajl yaj yuj win rey.

⁸ An̈jtona', wach'xam yit chon̈b' sb'a eb' yet' eb' israel, palta a eb' israel, 'ix 'yij 'at eb' chab' ciente mil eb' 'aj Judá 'icha presoal 'a Samaria. Til wal eb' 'ix 'ix, eb' winc 'unin, yet' eb' 'ix 'unn xyij 'at eb', til to wal pax tas xyij 'at eb'.

⁹ Ata 'ay jun schecb' Jehová Oded sb'i. A jun cha, 'ix 'elt 'a sat eb' soldado yic 'ix c'och eb' 'a Samaria cha, xyaln 'a eb' 'ixtic: —A Jehová qui Diosalec, atn pax sDiosal eb' qui mam quichmec, 'ix cot yowl sc'ojl 'a Judá, yuj cha, xya'n 'och 'a yol e c'ab'. Palta ax xo tic, xe mil cham eb' yet' yowl e c'ojol, caw xq'ue'ch eyowl chi 'a satcha'an̈.

¹⁰ Ax ticnec, tox xe nalb'ej to tzeya'ch eb' 'aj Jerusalén yet' jun tzo'n̈ xo eb' 'aj Judá chi e mosooc mto eya'malc servil. Palta ¿tom may pax e mul ax tic tz'och 'a Jehová qui Diosalec?

¹¹ A ticnec jun, chajc eyab' tas 'oj wala', 'a'c meltzjc eb' eyit israelal xe yij cot 'icha presoal, yujto caw tzcot yowl Jehová 'ayex, xchi Oded.

¹² Xlajw cha, a jaywn̈ eb' yajl yaj 'a scal eb' yin̈tl Efraín: atn Azarías yunnal Johanán, Berequías yunnal Mesilemot, Ezequías yunnal Salum, yet' Amasa yunnal Adlai, xc'och eb' 'at scha eb' xjaw 'a owl cha,

¹³ xyaln eb' 'a eb' 'ixtic: —Man̈ eyi'ch eb' 'icha presoal 'a tic, yujto a jun cha, caw tz'och qui mulc 'a Jehová. Ax tic, 'ipn e sayn tas tz'aj sniwtj qui mul 'a 'a, yuj cha, caw tzcot yowl sc'ojl 'ayn̈ec an̈ israel on̈c tic, xchi eb'.

¹⁴ Xlajw xoj cha, 'ix ya'n can 'el eb' soldado chi eb' presoanm chi 'a libre, xya'n can eb' smasnil tas xit' yi'cn 'ec' chi 'a eb' yajal, yet' 'a smasnil eb' chon̈b' cha.

¹⁵ Ax ewin tox xb'inax sb'i tic, a ewin x'och 'ajcuentail yiln eb' 'icha preso yaj chi yuj eb'. A 'a scal smasnil tas xit' yi'cn 'ec' eb' soldado chi 'a eb', ata 'ix q'uet te pichl x'ajx 'och 'a eb' jitn'eli. X'ajx pax 'och xan̈b' eb'. X'ajx wa eb'. X'ajx pax tas tzyu'j eb'. Sucx 'och remel 'a sat 'aj lajwnac eb'. Ax smasnil eb' man̈x 'a yip sb'eyi, x'ajx q'ue eb' 'a yib'n̈ e no b'uru. Xlajw cha, x'ijx 'at eb' yuj ewinac, masnto x'at ya'cn ewin eb' 'a eb' yit chon̈b' eb' 'a Jericó, 'a 'aj caw 'ay te palma. Xlajw cha, 'ix meltzj can pax ewin 'a Samaria.

¹⁶ A 'a jun tiempoal cha, a win rey Acaz 'ix ya't schecb' 'a win Tiglat-pileser sreyl Asiria, yic tzc'ann colwal 'a 'a,

¹⁷ yujto a eb' 'aj Edom, 'ix jaw eb' wul yac' owl yet' eb' 'aj Judá jun 'ejm xo. Til wal eb' x'ijx 'at 'a 'icha presoal yuj eb'.

¹⁸ Ya' sb'a cha, ax eb' filisteo, 'ix yij 'at eb' tastc 'ay 'a jun tzo'n̈ chon̈b' 'ay 'a span̈nil yich lum witz, yet' 'a Neguev 'a yol yic Judá. 'Ix yi'n can 'ec' eb' chon̈b' Bet-semes, Ajalón, Gederot, Soco, Timna, yet' Guimzo yet' yaldeail jun jun. Xlajw cha, xcan cajn eb' filisteo chi 'a 'a.

¹⁹ 'Ix 'ijx 'ejm eb' 'aj Judá yuj Jehová, yujto a Acaz sreyl eb', a 'ix sjucb'tzan eb' 'a maysch'olnil. Caw wal tenmtac xyutj sb'a win 'a Jehová.

²⁰ Ax yic xjaw Tiglat-pileser sreyl Asiria cha, ma'ix colwj jac 'a 'a, ton̈j xwach' lajw 'el yu'uj.

²¹ Wach'xam 'ix yij to 'elt Acaz jun tzo'n̈ tas caw chan̈ stojl 'ay 'a yatut Jehová, yet' 'a sdespacho win rey cha, yet' pax 'a yatut eb' yajl yaj ta', yic tzya'n 'a sreyl eb' Asiria, palta nab'axoj, ma'ix colwj jac 'a 'a.

²² Wach'xam caw niwn yailal xjaw 'a yib'n̈ rey Acaz cha, palta an̈ja yoch smul 'a Jehová.

²³ 'Ix yac' xajmb'al 'a jun tzo'n̈ scomn diosal eb' 'aj Damasco, yujto x'ajx ganar yuj eb'. Xyaln cob' 'ixtic: A jun tzo'n̈ sdiosal eb' sirio tzcolwj 'a eb' sreyal, an̈jtona 'in, 'oj wac' in xajmb'al 'a jun tzo'n̈ sdiosal eb' cha, sec wach' 'oj colwjc pax eb' 'ayin, xchi Acaz. 'Ixtnta x'aj swach' cot 'a yib'n̈ yet' smasnil eb' yit chon̈ab'.

²⁴ Xlajw cha, syamb'tzan jun tzo'n̈ yamc'ab' tzc'anx 'a yatut Dios, 'ix sma'n pojoc, 'ix smacn can spuertail yatut Dios, 'ix ya'n b'o jun tzo'n̈ macsej 'a smasnil yisquinyoal caye 'a Jerusalén.

²⁵ An̈jtona', 'ix sb'on pax jun tzo'n̈ macsej 'a smasnil chon̈b' 'a yol yic Judá, yic tzya'n tz'a incienso 'a jun tzo'n̈ comn dios. 'Ixtnta xyutj stzuntzn cot yowl sc'ojl Jehová sDiosal yet' eb' smam yicham.

²⁶ Ax jantcto tas x'el sb'oni yet' smasnil sb'eyb'al, yictax x'el yich masnto 'a slajub', ata tz'ib'b'il can 'a ch'an̈ libro yic yab'xil eb' sreyl Judá yet' eb' sreyl Israel.

²⁷ 'Ix cham Acaz, 'ix mucx 'a chon̈b' Jerusalén, palta man̈oc 'a yet'l eb' rey. Xlajw cha, ax jun yunnal tzcuch Ezequías, a x'ochcn reyl sjeloc.