2 Cr 27 - Chuj San Sebastian Bible

'Ochnc Jotam reyal

¹ A Jotam 25 ab'il sq'uinal, yic schan 'el yich ya'n reyal, waclajn̈e ab'il xyac' reyl 'a Jerusalén. Jerusa sb'i snun, yisl win Sadoc 'ix.

² A tas 'ix 'el sb'on Jotam, caw tojl 'a sat Jehová, 'icha sb'ojnac Ozías, atn smam, palta b'i'an, ma'ix 'och 'a yol yatut Jehová, palta ax eb' chon̈ab' caw sb'eylb'ejn̈ej eb' maysch'olnil.

³ A Jotam chi b'ojnac jun spuertail yatut Jehová 'a cha'an̈, an̈jtona', til wal tas 'ix sb'o q'ue wan 'a yib'n̈ jun muro b'ob'il 'a 'aj lan̈b'il, atn jun tzcuch Ofel.

⁴ An̈jtona', 'ix sb'o chan̈ jun tzo'n̈ chon̈b' 'a lum jolmctac witz 'a yol yic Judá, jun tzo'n̈ cuartel yet' jun tzo'n̈ torre 'a calte'.

⁵ 'Ix 'och 'a owl yet' sreyl eb' amonita. A x'a'n ganar 'a yib'n̈ eb'. A 'a jun ab'il cha, 'ix yac' eb' amonita q'uen tojlb'al 'a 'a: 'Ix yac' eb' 75 quintal q'uen plata, yet' 37 mil quintal 'ixm trigo, 'ixta pax 'ixm cebada xyac' eb'. 'Ixta xyutj eb' ya'n 'a jun 'oxe ab'il.

⁶ Yuj cha, caw te'n x'aj Jotam 'a sreyal, yujto caw tojl xyutj sb'eyb'al 'a yojltac Jehová.

⁷ Ax jantcto tas 'ix 'el sb'on Jotam, yet' smasnil owl 'ix yac'a, yet' sb'eyb'al, ata tz'ib'b'il can 'a ch'an̈ libro yic yab'xil eb' sreyl Israel, yet' yic eb' sreyl Judá.

⁸ A Jotam cha, 25 ab'il sq'uinal yic schan 'el yich ya'n reyal, waclan̈e ab'il xyac' reyl 'a Jerusalén.

⁹ A yic 'ix chami, ata xmucx 'aj mucn eb' smam yichm 'a Schon̈b' David. Xlajw cha, ax jun yunnal tzcuch Acaz a x'ochcn reyl sjeloc.