2 Cr 26 - Chuj San Sebastian Bible

'Ochnc Ozías reyal

¹ Yuj cha, ax smasnil eb' 'aj Judá, 'ix ya'ch eb' win Ozías reyl sjelc Amasías, atn smam. Waclajn̈e ab'il sq'uinl Ozías cha.

² A yic tox 'ix cham smam cha, xyi'n pax 'ec' chon̈b' Elat jun 'ejm xo, 'ix 'ochx can yico'oc Judá, 'ix sb'on pax cha'an̈.

³ A Ozías cha, waclajn̈e ab'il sq'uinal yic schan 'el yich ya'n reyal, 52 ab'il 'ix yac' reyl 'a Jerusalén. Jecolías sb'i snun, 'aj Jerusalén 'ix.

⁴ A smasnil tas 'ix 'el sb'on Ozías cha, caw wal tojl 'a sat Jehová, 'icha sb'ojnac Amasías, atn smam.

⁵ Xyal sb'a 'a Dios, a yic pitznto win Zacarías, atn win xcuyn 'a yic Dios, caw niwn yel'ch Dios 'a sat. Ya' sb'a tzyac' servil Jehová, 'ix 'ijx q'ue'ch yu'uj.

⁶ 'Ix 'at Ozías yac' owl yet' eb' filisteo, 'ix sma'n 'ejm lan̈chjoc smuroal chon̈b' Gat, Jabnia yet' Asdod. 'Ix sb'on chan̈ jun tzo'n̈ schon̈b' 'a yol smacb'en eb' 'aj Asdod cha, atn 'a scal eb' filisteo.

⁷ A Dios 'ix colwj yet'oc, yic 'ix ya'n owl yet' eb' filisteo yet' eb' árabe cajn 'a Gur-baal, yet' eb' amonita.

⁸ 'Ix yac' eb' amonita q'uen tojlb'al 'a Ozías. 'Ix c'och to yab'xil win 'a smon̈jon Egipto, yujto caw niwn tz'aj yijx chan̈ sb'inab'ilal.

⁹ An̈jtona', 'ix sb'on pax jun tzo'n̈ cuartel 'a yib'n̈ smuroal Jerusalén, 'a yib'n̈ spuertail 'a schiquin, yet' 'a yib'n̈ puerta tzcuch pan̈an, yet' 'a yib'n̈ jun tzo'n̈ xo schiquin. Caw wach' 'ix yutj sb'on cha'an̈.

¹⁰ Sb'on pax jun tzo'n̈ cuartel chi 'a lum cusltac lu'um. Caw niwn jun tzo'n̈ c'ob'a sjoyo, yujto caw niwn scajb'en noc' 'ay 'a lum pan̈n 'a'lic, yet' pax 'a yich eb' lum witz. An̈jtona', caw 'ay eb' smunljum tzmunlj 'a 'awj uva, yet' 'a jun tzo'n̈ xo 'awb'ente 'ay 'a lum jolm witz. Caw wal pitz'n 'och 'a sc'ojl smunlji.

¹¹ An̈jtona', caw wach' yaj junjn macn̈ eb' soldado yu'uj. A slistail eb', a Jehiel a 'et'jnac yet' win Maasías. Ax mach tzjucb'tzan eb', atn Hananías, a 'aych yajlil 'a eb' soldado win rey.

¹² A eb' yajl yaj 'a yib'n̈ eb' soldado, 'a tzyal yin̈til, 'ay 2,600 eb' 'a smasnil.

¹³ 'Ay pax junx 307,500 soldado, caw lista yaj s'at 'a owal. Caw wal jeln eb', caw 'ay yip eb', yic tzcolwj eb' yet' win rey yic tzya'n win owl yet' eb' 'ajc'ojol.

¹⁴ 'Ix yac' Ozías chi b'o jun tzo'n̈ syamc'ab' 'eb' soldado: atn smacl sat jul-lab', lanza, q'uen pichl tzya'ch eb' 'a sn̈i sc'ojol, q'uen xumpilin, jul-lab', yet' pax mejech.

¹⁵ An̈jtona', 'ix sayn win eb' winc to tztac' sb'on niwc máquina yic owl 'a Jerusalén, yic tzc'an 'a jun tzo'n̈ cuartel 'ay 'a yib'n̈ muro 'aj tztan̈wx chon̈ab', sec ata tzjulwji, tzjuln 'elt niwc q'ue'en. Caw 'ix 'el speclal 'a najat, yujto a Dios 'ix colwj yet' 'a tas to satjub'tac yilxi, caw stac' yuj si'mb'il.

¹⁶ A yic xyi'n wal yip 'a yopiso, 'ix yi'n chan̈ sb'a yet' snab'en, 'ixta x'aj yi'n cot 'a yib'an̈, tenmtac xyutj sb'a 'a Jehová sDiosal. X'och 'a yol yatut Jehová yic tzya'n tz'a incienso 'a jun yet'l 'aj tz'a incienso cha.

¹⁷ Palta tza'n yochch Azarías ya'mal 'och sti eb' 'anma 'a Dios, yet' junx 80 ya'mal 'och sti eb' 'anma 'a Dios chi yet'oc, caw matz xiw eb'.

¹⁸ A eb' cha, xc'och eb' 'a yojltac win rey cha, xyaln eb' 'a win 'ixtic: Ach rey Ozías man̈oc ach 'ay opiso a'n tz'a incienso 'a Jehová, palta an̈ ya'maln̈ 'och sti eb' 'anma 'a Dios on̈, atn an̈ yin̈tl on̈ Aarón tic, an̈ sic'b'iln̈ 'och ca'n tz'a xajmb'al on̈. 'Eln̈ 'a scajnub' Jehová tic, yujto caw x'och 'a tenmtacl 'a 'a. Man̈x 'oj ach yi' cha'an̈, xchi eb' 'a 'a.

¹⁹ A Ozías cha, lin̈n 'och 'a stz'ey jun yet'l xajmb'al 'aj tz'a incienso cha. T'un̈b'il jun tz'ab'c'ac' yic incienso yu'uj, yic tzya'n tz'a incienso ta'. Caw wal xcot yowl 'a eb' ya'mal 'och sti eb' 'anma 'a Dios. Ya' sb'a wan sten sb'a yet' eb', 'ix 'elt lepra 'a snan̈l sat.

²⁰ A yic xyiln Azarías cha, yet' smasnil eb' ya'mal 'och sti eb' 'anma', chajtlto x'elt jun lepra chi 'a snan̈l sat win rey cha, yajn̈ej 'ix yi'n 'elt eb' muc'uc. 'Ixta pax win rey cha, caw wal snib'j win yajn̈ej x'elt 'a jun lugar cha, yujto tox xjaw yailal 'a yib'n̈ yuj Jehová.

²¹ 'Aychn̈ej jun lepra chi 'a win rey Ozías masnto yic' xchami, yuj cha, sch'ocjxoj xcan 'a jun n̈a. Man̈xtoc 'ix chax 'och 'a yol yatut Jehová. Ax Jotam, atn yunnal, a 'ix can 'a yib'n̈ yiln despacho, a x'a'n yajlil 'a yib'n̈ eb' 'anma 'a snacion̈.

²² Ax jantcto yab'xil tas 'ix 'el sb'on Ozías, yictax x'el yich, masnto 'a slajub', 'ix stz'ib'j can Isaías, atn schecb' Dios yunnal Amós.

²³ A yic 'ix cham Ozías cha, ata xmucx 'aj mucn eb' smam yichm 'a scampusan eb' rey, palta man̈oc 'a yet'l eb' rey cha, yujto 'aych lepra 'a 'a. Xlajw cha, ax Jotam chi x'ochcn reyl sjeloc.