2 Cr 24 - Chuj San Sebastian Bible

'Ochnc Joás reyal

¹ A Joás cha, uque ab'il sq'uinal yic schan 'el yich ya'n reyal; chawinc ab'il xyac' reyl 'a Jerusalén. Sibia sb'i snun, 'aj Beerseba 'ix.

² A smasnil tas sb'o Joás, caw tojl 'a sat Jehová ya' sb'a pitznto win Joiada cha.

³ A win sayjnac chawn̈ yistzil Joás cha, 'ay yunnal, 'ay pax yisl x'alj yet' eb' 'ix.

⁴ 'Ix 'ec' jun tiempoal, ax x'aji snan chan̈ Joás to tznipx yatut Jehová.

⁵ Yuj cha, xya'n syam sb'a eb' ya'mal 'och sti eb' 'anma 'a Dios yet' jun tzo'n̈ xo eb' levita cha. Xyaln 'a eb' 'ixtic: 'Ixquec 'a smasnil chon̈b' 'a yol yic Judá, yic tz'at 'eyi'nc chan̈ q'uen tumn tzyac' eb' quit israelal 'a junjn ab'il, sec wach' to tznipx yatut qui Diosalec. Caw tze c'ol eyip, xchi 'a eb'. Palta ax eb' levita ma'ix sc'ol eb' yip.

⁶ Yuj cha, xya'n win rey 'awtxoc cot Joiada sat ya'mal 'och sti eb' 'anma 'a Dios, xyaln 'a 'ixtic: —¿Tas yuj matz a'ch 'a a c'ojl eptzan eb' levita yic tz'at yi'noc eb' q'uen ofrenda 'a yol yic Judá yet' 'a Jerusalén tic? A Moisés win schecb' Jehová, a aljnac cani to a smasnil eb' quit israelal to yowlal tzyac' eb' q'uen tumn yuj sb'omb'il mantiado yic strato Dios, xchi win rey.

⁷ Yujto a 'ix Atalía cha, caw tu snab'en 'ix yet' eb' 'ochnc tza'n yu'uj, yuj cha, xjuw can 'el yatut Dios yuj eb'. A jun tzo'n̈ yamc'ab' to niwn yel'ch 'a yatut Dios cha, sc'anjnac eb' yic tz'och eb' 'emmquilal 'a jun comn dios tzcuch Baal.

⁸ Yuj jun cha, xya'n win rey Joás b'o jun caxa, axta xyac' win c'ojxoc 'ejm 'a sti 'el spuertail yamq'uil yatut Jehová.

⁹ 'Ix ya'n alxc 'a smasnil yol yic Judá yet' 'a smasnil yol yic Jerusalén, to tz'ijx cot q'uen ofrenda 'a Jehová, 'icha yutjnac yaln can Moisés, win schecb' Dios 'a eb' israel 'a lum cusltac lu'um.

¹⁰ Ax smasnil eb' yajl yaji, yet' smasnil eb' chon̈ab', caw 'ix tzalj eb' yi'n cot yofrenda. 'Ix ya'n 'ejm eb' 'a yojl jun caxa cha, masnto xb'ut'j 'el yuj eb'.

¹¹ Ax yic xyiln eb' levita to caw niwn xo q'uen tumin, yuj cha, xyi'n 'at eb' jun caxa chi 'a win rey yic tzyilni, xc'och jun yajtz'ib' win rey yet' jun win sic'b'il 'el yuj win sat ya'mal 'och sti eb' 'anma 'a Dios. Xlajw cha, 'ix secn 'elt eb' q'uen tumn chi 'a yol jun caxa cha, 'ix 'at ya'ncan eb' a yet'l jun 'ejm xo. 'Ixta 'ix yutj eb' 'a junjn 'ejem. Caw niwn q'uen tumn syam sb'a.

¹² Ax win rey yet' Joiada cha, 'ix yac' eb' q'uen tumn chi 'a eb' 'aych 'a yib'n̈ yiln munljel tzb'o 'a yatut Jehová. Tzsayn pax eb' mach tzma'w poj q'ue'en, eb' josmte', eb' b'om hierro yet' bronce, sec to tzwach' tz'aj sb'o'i.

¹³ Yuj cha, a eb' 'aych 'a yib'n̈ yiln munljel cha, a eb' xjucb'tzan eb' tznipn yatut Jehová cha. 'Ix sb'o eb' 'icha yaj 'a yaln̈taxi, caw wal wach' x'ajcn yuj eb'.

¹⁴ A yic xlajw sb'o yuj eb', 'ix yi'n 'at eb' q'uen tumn xya'cn sobra, xya'n eb' q'uen 'a win rey yet' 'a Joiada. Ax yet' q'uen xyac' eb' b'o jun tzo'n̈ syamc'ab'il, atn jun tzo'n̈ tz'och yopiso yic tz'och 'emmquilal 'a Jehová, jun tzo'n̈ tz'och yopiso 'a 'aj tz'a xajmb'al to tz'a smasnil, jun tzo'n̈ niwc cuchara, yet' jun tzo'n̈ xo yamc'ab' to oro yet' plata. A yic pitznto Joiada, caw tzya'n̈j eb' xajmb'al to tz'a 'a yatut Jehová.

¹⁵ Palta a Joiada cha, caw x'och 'ichm wincal, 130 ab'il sq'uinal yic xchami.

¹⁶ Ata xmucx 'aj mucn eb' rey 'a Schon̈b' David, yujto wach' tas 'ix sb'o'o, yuj swach'loc eb' yit israelal. Wach' xyutj ya'w servil 'a Dios, yet' 'a yatut Dios cha.

A smul win Joás

¹⁷ A yic tox 'ix cham Joiada cha, xjaw eb' yajl yaj 'a Judá, 'ix 'em n̈ojn eb' 'a yojltac win rey yic tzmontn eb' winac, schan win yab' 'a eb'.

¹⁸ 'Ixta xyutj eb' yactn can yatut Jehová sDiosal yet' smam yicham. 'Ix ya'n 'och sb'a eb' 'emmquilal 'a jun tzo'n̈ sch'oxnb'il comn dios Aserá, yet' 'a jun tzo'n̈ yechl b'ob'il yuj 'anma'. Yuj cha, xcot yowl sc'ojl Dios 'a yib'n̈ Judá yet' a Jerusalén yuj smul eb' cha.

¹⁹ 'Ix schecn cot Jehová schecb' 'a eb', sec tzya'x 'och eb' sc'ojl 'a 'a, palta man̈xtoc xchaj eb' yab' 'a eb' schecb' Dios cha.

²⁰ Xlajw cha, 'ix 'och Yespíritu Dios 'a Zacarías, yunnal Joiada. 'Ix q'ue lin̈n 'a yib'n̈ jun lugar chan̈ yaj cha'an̈. Xyaln 'a eb' chon̈b' 'ixtic: A Dios a tzaln 'ixtic: ¿Tas yuj matz eyiclj in checnb'il an Jehová in? ¿Tas yuj tze say cot yailal 'a eyib'an̈? In eyactj can an Jehová in tic, yuj cha, 'oj ex wactc can pax jun xo, xchi Dios, xchi Zacarías 'a eb'.

²¹ Palta smol alj eb', yic tz'och eb' 'ajc'ojlal 'a 'a. 'Ix ya'n win rey julxoc cham yet' q'uen q'uen 'a yamq'uil yatut Jehová.

²² A rey Joás man̈xtoc 'ix sna cot schamc'ojlal Joiada sch'oxjnac 'a 'a, atn smam Zacarías. A yico' to 'ix yac' milxoc cham Zacarías cha. A yic jab'xoj scham winac, xyaln can 'ixtic: A cab' Jehová tz'iln jun tic, a cab' 'oj 'a'nc yowlal, xchi.

²³ A 'a yic x'elx yich junx ab'il, 'ix cot eb' soldado sirio yac' owl yet' Joás. 'Ix jaw eb' 'a Judá yet' 'a Jerusalén. 'Ix smiln cham eb' smasnil eb' yajl yaj yet' Joás 'a jun nacion̈ cha. 'Ix yi'n 'elt eb' smasnil tas 'ay 'a 'a, 'ix ya'n 'at 'a win sreyl Damasco.

²⁴ Jaywn̈ej eb' soldado sirio 'ix jaw yac' owl yet' eb' 'aj Judá, palta a Jehová 'ix 'a'n 'och eb' soldado to niwn sb'isl chi 'a yol sc'ab' eb', yujto 'ix yactj can eb' Jehová, atn sDiosal eb' yet' smam yicham. 'Ixtnta x'aj Joás yab'n syal yuj tas tu x'el sb'oni.

²⁵ A yic x'el paxt eb' sirio chi ta', jab'xoj ma'ix chamcn yuj eb', xya'cn 'och eb' syailal si'mb'il. Ax eb' 'aych yajlil yet'oc, 'ix smol alj eb' tas tzyutj eb' swach' miln chamoc, yic tzya'n can pax eb' spac schamlil win yunnal Joiada, win ya'mal 'och sti eb' 'a Dios. Yuj cha, axta swach' milj cham eb' 'a sat sch'at. Xlajw cha, 'ix mucx 'a Schon̈b' David, palta man̈oc 'a 'aj tzmucx eb' rey.

²⁶ A eb' xwach' miln cham Joás cha, atn Zabad yune 'ix Simat 'ix amonita, yet' Jozaba yune 'ix Simrit 'ix moabita.

²⁷ Ax yuj jantcto yab'xil Joás, yet' yuj eb' yunnal, yet' pax yuj jun tzo'n̈ paxti yaljnac eb' schecb' Dios 'a 'a, yet' pax yic xnipx yatut Jehová, ata tz'ib'b'il can 'a ch'an̈ libro yic yab'xil eb' rey. Xlajw cha, ax jun yunnal tzcuch Amasías, a x'ochcn reyl sjeloc.