2 Cr 22 - Chuj San Sebastian Bible

'Ochnc Ocozías reyal

¹ A smasnil eb' cajn 'a Jerusalén, 'ix ya'ch eb' Ocozías win slajb' 'unnal Joram reyl sjelc smam cha. 'Ixta 'ix 'aji, yujto a eb' árabe ya'jnacx eb' owl yet' eb' 'aj Judá, smiljnac cham eb' jun tzo'n̈ eb' sb'ab'l 'unnal rey Joram cha.

² A yic schan 'el Ocozías yich ya'n reyal, 22 ab'il sq'uinal, jun ab'il xyac' reyl 'a Jerusalén. Atalía sb'i snun, yican Omri 'ix.

^3-4 An̈jtona Ocozías cha, caw sb'eylb'ej pax sb'eyb'al Acab yet' eb' yin̈til, yujto a snun xcuyn 'a tu nab'enal, yujto 'ayt yuj sb'a yet' Acab cha. Yuj cha, caw tu x'el sb'on 'a sat Jehová, 'icha sb'eyb'al eb' yin̈tl Acab. Yujto a yic tox 'ix cham smam, ax eb' yican chi x'a'n sc'ojloc, yic tzjun 'el snab'en.

⁵ 'Ix sb'eylb'ej snab'en eb' cha, 'ix mol 'at 'a owl yet' Joram yunnal Acab, sreyl chon̈b' Israel. 'Ix ya'n eb' owl yet' Hazael sreyl Siria 'a chon̈b' Ramot 'a yol yic Galaad. Ax Joram cha, 'ix lajw yuj eb' 'aj Siria cha.

⁶ Yuj cha, 'ix meltzji yic tzwul yan̈tnoc sb'a 'a Jezreel. Yujto ya'ay Joram, yuj cha, 'ix 'at Ocozías sreyl Judá 'at yil 'a Jezreel cha.

A Jehú 'ix miln cham Ocozías

⁷ Palta tox 'ix sna Dios, to a yic 'oj 'at Ocozías 'at yil Joram, ax schami. At wal sc'och cha, 'ix 'elt yet' Joram, yic tzwul schanoc eb' Jehú, yunnal Nimsi. Palta tox 'ix si'l Jehová Jehú, yic tzsatn 'el smasnil eb' yin̈tl Acab.

⁸ A yic wan smiln cham Jehú eb' yin̈tl Acab, 'ix 'ilchj eb' yajl yaj 'a Judá, yet' eb' yunnal eb' yican Ocozías, atn eb' ajun yet'oc, 'ix smiln pax cham Jehú eb'.

⁹ 'Ix ya'n sayxc 'ec' Ocozías, yujto 'ix sc'ub'j 'el sb'a 'a Samaria, ax x'aji 'ix yamchj yuj eb'. Xyi'n 'at eb' 'a Jehú, axta xmilx chamoc. Palta xmucx yuj eb', yujto sna eb' to yin̈tl Josafat winac, win x'a'n servil Jehová 'a smasnil sc'ojol. Ax 'a scal eb' yin̈tl Ocozías, man̈x 'a junc eb' ste'wtzej sb'a yochcn reyal.

'Ochnc 'ix Atalía sreinailc Judá

¹⁰ A yic xyab'n 'ix Atalía snun Ocozías, chajtlto tox 'ix cham win yune 'ix cha, yuj cha, smiln cham 'ix smasnil eb' yin̈tl sreyl Judá cha.

¹¹ Palta ax 'ix Joseba yisl rey Joram, xyi'n 'el 'ix Joás 'a scal jun tzo'n̈ xo eb' yunnal Ocozías, atn eb' wan laj smilx cham cha, sc'ub'n 'el 'ix win 'a jun cuarto 'a yatut Dios yet' 'ix tzq'uib'tzan winac. 'Ixtnta xyutj 'ix Joseba sc'ub'n 'el winac. Yuj cha, ma'ix chami. A 'ix Joseba cha, yisl rey Joram 'ix, yanb' Ocozías, yistzil Joiada ya'mal 'och sti eb' 'anma 'a Dios.

¹² A 'a yatut Jehová c'ub'b'il 'el win 'unn chi yet' 'ix q'uib'tzan win 'a waque ab'il. Ya' sb'a cha, wan ya'n 'ix Atalía reinail 'a jun nacion̈ cha.