2 Cr 2 - Chuj San Sebastian Bible

Strato Salomón yet' Hiram

¹ 'Ix snalb'ej Salomón sb'on sdespacho yet' yatut Jehová.

² Yuj jun tzo'n̈ cha, 'ix ya'n win si'xoc 'el 70 mil eb' cuchm 'icatz, 80 mil eb' ma'm poj q'uen 'a jolmctac witz, yet' 3,600 eb' tz'iln munljel cha.

³ Xlajw cha, 'ix yaln 'at win 'a Hiram sreyl Tiro 'ixtic: ¿Tzac' am te c'ute 'ayin, 'icha otjnac a'n te 'a in mam, atn David, yic sb'on chan̈ yatut 'aj 'ix 'aj cajan?

⁴ A ticnec, to 'oj wac' b'o chan̈ yatut Jehová qui Diosal on̈. 'Oj wa'cn yico'oc, sec ata tz'ajx tz'a perjuma su'q'ui sjab' 'a yojltac, tz'em tzoln 'ixm pan 'a yojltac, tz'ajx tz'a xajmb'al to tz'a smasnil 'a sq'uin̈b'ial yet' 'a yemc'ual, 'a sc'ul 'iljelal, 'a yic tzpac' 'uj, yet' jun tzo'n̈ xo q'uin̈ tznax yic tz'ijx chan̈ sb'i Jehová qui Diosal on̈. 'Ixta tzyal checnb'il 'ac'b'il 'ayn̈ an̈ israel on̈ tic 'a smasnil tiempo.

⁵ A jun n̈a 'oj in b'o cha, caw niwquil 'oj 'ajoc, yujto a qui Diosal on̈, yel xo niwquil yel'ch 'a yib'n̈ smasnil jun tzo'n̈ comn dios.

⁶ Palta b'i'an, ¿tom 'ay junc mach 'oj stac' sb'on chan̈ jun n̈a cha? 'Intax satcha'an̈ caw niwquil, palta matz yab' 'aj tz'aj Dios 'a 'a. ¿Tas wel'ch an tic, yuj cha, an tzin b'o chan̈ jun n̈a cha, wach'xam cojn wal junc lugar 'aj tz'ajx tz'a incienso 'a yojltac?

⁷ Ax ticnec, chec cot junc winc tztac' sb'on 'och yechl tzann̈j tas, jeln cab' smunlj 'a q'uen oro, plata, bronce, mto hierro, yet' 'a te ch'al púrpura, te chac, te q'uic'mucnac yilxi. A 'oj colwjoc yet' eb' to cuywjum 'a jun tzo'n̈ cha, atn eb' 'ay 'a Judá yet' 'a Jerusalén tic. A eb' cuywjum cha, sic'b'il can 'och eb' yuj in mam.

⁸ An̈jtona', tza'n cot pax te te 'ay 'a Líbano 'ayin, atn te c'ute', te q'uisis, yet' te sándalo, yujto wojtac to caw jeln eb' a checb' 'a ch'acjte 'a lum Líbano. A eb' in checb' tic 'oj colwjc eb' yet' eb' ec cha.

⁹ Caw niwn te te chi 'oj c'anxoc, yujto a jun n̈a 'oj wac' b'o cha, caw niwquil 'oj 'ajoc, satjub'tac yilx pax 'oj 'ajoc.

¹⁰ 'Oj wa't tas 'oj sc'ux eb' a munljum cha. 'Oj wa't 60 mil quintal 'ixm trigo, an̈jtona', 'ixta pax 'ixm cebada, 110 mil galón yal uva, an̈jtona', 'ixta pax aceite, xchi Salomón.

¹¹ Xlajw cha, 'ix ya'n cot win Hiram sreyl Tiro jun ch'an̈ carta 'a Salomón, tzyaln 'a 'ixtic: Ach rey Salomón, a Jehová ach 'a'n 'och reyl 'a yib'n̈ chon̈b' Israel, yujto caw 'ay schamc'ojlal 'a schon̈ab'.

¹² Yuj cha, alx cab' wach' paxti 'a Jehová e Diosal, jun b'ojnac satcha'an̈ yet' lum lu'um, yujto ach 'ix ach si'cn 'el 'a scal eb' o'tac. Ach yunnal rey David, caw jeln ach, caw tznachj 'el o'oj, cuywnacch 'a jeln nab'enal, ach 'oj a b'o chan̈ yatut Jehová, yet' junc a despacho 'aj 'oj ac' reyal.

¹³ A ticnec, tic tzin checb't jun winc to caw jeln snab'en, caw tznachj 'el yu'uj, atn Hiram.

¹⁴ A jun winc tic, yune jun 'ix israel cotnc 'a yin̈tl Dan, ax smam 'aj chon̈b' Tiro tic. A jun tic jeln smunlj 'a q'uen oro, plata, bronce, mto hierro, yet' 'a tzann̈j q'uenal, mto 'a te te'. Jeln sjaln te ch'al púrpura, te q'uic'mucnac, te chac, mto lino. An̈jtona', caw jeln sb'on smasnil jun tzo'n̈ yechel, tztac' pax snan 'el tas tz'aj sb'o tzann̈j munljel-l tzc'anx 'a 'a. 'Oj colwjc yet' eb' a munljum to jelan, yet' eb' toxn munljnac 'a a mam, atn David to niwn yel'ch 'a in sat.

¹⁵ A ticnec ach wajlil, 'a' cot 'ixm trigo, 'ixm cebada, aceite, yet' yal uva, atn jun tzo'n̈ tzal a' cot cha.

¹⁶ Ya' sb'a cha, 'oj wal 'a eb' in munljum tic to axn tzu'l eb' te te chi 'a Líbano, jantcn̈ej te 'oj 'och yopiso o'oj. 'Oj sjal eb' te', ax ya'n 'och eb' 'a yib'n̈ a mar, masnto 'oj c'och te 'a chon̈b' Jope. Ax eb' a munljum chi 'oj 'i'nc q'ue te 'a Jerusalén, xchi Hiram sreyl Tiro 'a Salomón.

¹⁷ Xlajw cha, 'ix yi'n chan̈ Salomón sb'isl smasnil eb' chuc chon̈b'al cajn 'a chon̈b' Israel cha, chuc pax xb'isx eb' yuj smam, atn David. A sb'isl eb', 'ay 153,600 eb' 'a smasnil.

¹⁸ 'Ix pojx 'el 70 mil eb' cuchm 'icatz, 80 mil eb' ma'm poj q'uen 'a jolmctac witz, yet' 3,600 eb' 'ilm munljel, atn eb' tz'iln smunlj eb' munljum cha.