2 Cr 19 - Chuj San Sebastian Bible

Stennb'ilal Josafat yuj Jehú

¹ A Josafat sreyl Judá 'ix meltzj 'a junc'ojlal 'a yatut 'a Jerusalén.

² Ax jun schecb' Dios Jehú sb'i, yunnal Hanani, 'ix 'elta yic tzwul schanc rey Josafat. 'Ix yaln 'a 'ixtic: ¿Tas yuj ach colwj yet' jun win tu snab'en cha, caw 'ix a chamc'ojlej jun 'ajc'ojl yajch 'a Jehová? Yuj wal cha, 'ix cot yowl sc'ojl Jehová 'a eb'an̈.

³ Palta b'i'an, 'ayt wal jun tzo'n̈ xo tas wach' to yoch a wach'loc, yujto 'ix ej 'el jun tzo'n̈ sch'oxnb'il comn dios Aserá 'a yol a nacion̈ tic, 'ix a'ch wal 'a a c'ojl a'n servil Dios, xchi Jehú 'a 'a.

'Ochnc eb' juez yuj Josafat

⁴ A Josafat cajn 'a Jerusalén, palta 'ay jun sb'eyb'al to tzxit'c 'at yil eb' schon̈ab'. Tzchaj 'at 'a Beerseba masnto 'a lum jolm witz 'a yol yic Efraín, yic tz'ijx meltzjc eb' 'a Jehová yu'uj, atn sDiosal eb' yet' smam yicham.

⁵ 'Ix ya'ch eb' juez 'a smasnil chon̈b' to 'aych smuroal 'a yol yic Judá.

⁶ 'Ix yaln 'a eb' juez chi 'ixtic: Tzcham wal eyiln tas 'oj e b'o', man̈oc snib'b'en eb' 'anma 'oj e b'o', palta to a snib'b'en Jehová. A 'oj 'och eyet'oc yic 'oj e b'onc yaj jun mach.

⁷ Yuj cha, caw niwn cab' yel'ch Jehová 'a e sat, tzcham eyiln tas 'oj e b'o', yujto a Jehová qui Diosalec, ma'oj techjc yu'uj, yic 'oj yilnc 'och tas man̈ stojlalc 'oj e b'o', yet' pax yic to 'ay sjelpal 'anma 'a e sat, yic tze chan tumn 'a c'ultaquil, xchi 'a eb'.

⁸ An̈jtona', 'ix si'n 'elt Josafat jaywn̈ eb' levita, yet' jaywn̈ eb' ya'mal 'och sti eb' 'anma 'a Dios, yet' pax jaywn̈ eb' yajl yaj 'a yib'n̈ junjn macn̈ eb' cajn 'a Jerusalén yic tz'och eb' juezal, yic tzb'onyaj eb' yowl eb' 'anma cha.

⁹ 'Ix yaln can jun tzo'n̈ checnb'il 'a eb' 'ixtic: Ax tic yowlal 'oj eyil eyopiso tic, niwn cab' yel'ch Jehová 'a e sat 'a caw yel. Smasnil e c'ojol tzeya'n servil.

¹⁰ Tzann̈j owlal 'oj jawc 'ayx yuj eb' eyit chon̈b' tic, mto yuj eb' cajn 'a jun tzo'n̈ xo chon̈ab', tze b'oyaj eb', atn yuj junc paxti', mto yuj milj cham 'anma', mto yuj junc xo tzann̈j tas tz'el sb'on eb', to man̈ 'ixta'oc yaln ley mto checnb'il. Caw wach' tzeyutj eyaln 'a eb'. 'Ixta wal tzeyutej, sec wach' matz 'och smul eb' 'a Jehová, sec wach' matz cot yowl sc'ojl 'a eyib'an̈, yet' 'a yib'n̈ eb'. Caw wach' tzeyutj e b'a, sec wach' ma'oj 'och e mul.

¹¹ A Amarías sat ya'mal 'och sti eb' 'anma 'a Dios, cojn 'oj stac' yaln tas 'oj b'o 'a yic Jehová, ax Zebadías, yunnal Ismael, a yajl 'oj 'aj 'a yib'n̈ eb' yin̈tl Judá, yet' 'a smasnil smunljel win rey. An̈jtona', 'oj colwjoc eb' levita eyet'oc. ¡Te'n tzeyutj e b'a, 'a'c eyip 'a eyopiso! A mach wach'n̈j tas 'oj sb'o', 'aychn̈ej cab' Jehová yet'oc, xchi.