2 Cr 18 - Chuj San Sebastian Bible

Tzyal Micaías to 'oj 'ajxoc ganar Acab

¹ A Josafat cha, caw 'ix niwtj sricoal, niwn yel'ch x'aji, ax 'ix yisl win Acab, sreyl chon̈b' Israel, a x'och yalb'oc.

² Xlajwn̈ej yec' jaye ab'il, 'ix 'at 'a Samaria yic tz'at sc'umnoc Acab; ax Acab cha, til wal no calnelu yet' no wacx smil chamoc, yic tzya'n 'och sq'uin̈l Josafat yet' eb' ajun yet'oc. 'Ix yaln 'a 'a, to tz'och yet'oc yic tz'at ya'nc owl yet' Ramot 'a yol yic Galaad.

³ A yic cha, 'ix yaln Acab 'a Josafat 'ixtic: —¿Mamtzac yal a c'ojl tzach 'at wet'oc, yic tz'at wa'nc owl yet' chon̈b' Ramot 'a yol yic Galaad? xchi. 'Ix ta'w Josafat 'a 'ixtic: 'Oj in 'at yet' eb' in soldado, 'oj qui 'at et' 'a owl yet' eb' a soldado cha.

⁴ Palta c'anb'j can ab' 'a Jehová b'ab'el, xchi.

⁵ Xlajw cha, 'ix ya'n sreyl chon̈b' Israel syam sb'a chan̈e ciente eb' tzyalch sb'a schecb'oc Dios, 'ix sc'anb'n win 'a eb' 'ixtic: —¿Tzam stac' tz'at wac' owl yet' chon̈b' Ramot 'a yol yic Galaad, mto ma'ay? xchi. 'Ix ta'w eb' 'a win 'ixtic: —Tztac'a, yujto a Dios 'oj 'a'nc 'och 'a yol a c'ab', xchi cob' eb'.

⁶ Palta xyaln Josafat 'ixtc pax 'a winac: —¿Tom may junc schecb' Jehová 'ay 'a tic yic tzqui c'anb'n 'a 'a? xchi.

⁷ 'Ix ta'w sreyl chon̈b' Israel 'ixtc 'a Josafat: —'Ay jun 'a tic, tztac' sc'anb'n 'a Jehová cu'uj. Atn Micaías, yunnal Imla. Palta matz in nib'j jun winc cha, yujto mant 'a xon jun 'ejmoc wach' junc tas tzyal 'ayin, caw tun̈j tzyala, xchi. Palta 'ix yaln Josafat 'ixtc 'a 'a: —Man̈ al 'ixta', xchi.

⁸ Xlajw cha, 'ix yawtn sreyl chon̈b' Israel chi jun schecab', 'ix yaln 'a 'ixtic: —'At 'awtj cot Micaías, yunnal Imla muc'uc, xchi.

⁹ A chawn̈ eb' rey cha, 'aych spichl eb' yic reyal, wocn 'ejm junjn eb' 'a sdespacho 'a 'aj tzon̈ 'och 'a yol sti spuertail chon̈b' Samaria, lin̈n 'och smasnil eb' tzyalch sb'a schecb'oc Dios chi 'a yojltac eb'.

¹⁰ Ax Sedequías, yunnal Quenaana, 'ix sb'o jun tzo'n̈ q'uen hierro 'icha yilx no cacha, 'ix yaln 'ixtc 'a caw 'ip: 'Ixtc 'ix yutj Jehová yalni: A yet' jun tzo'n̈ cacha tic 'oj ac' owl yet' eb' sirio, masnto 'oj lajwc eb' smasnil, xchi Dios, xchi cob' Sedequías cha.

¹¹ An̈jtona', 'ixta pax yaln eb' tzyalch sb'a schecb'oc Dios chi smasnil. Tzyaln eb' 'a win rey 'ixtic: 'Ac' owl yet' chon̈b' Ramot cha, 'oj 'ajxc ganar o'oj, yujto a Jehová 'oj 'a'nc 'och jun chon̈b' chi 'a yol a c'ab', xchi cob' eb'.

¹² Ax win checb' x'at 'awtnoc cot Micaías cha, 'ix yaln 'a Micaías chi 'ixtic: —Smasnil eb' tzyalch sb'a schecb'oc Dios, caw wach' xyutj eb' yaln 'a win rey. Yuj cha, tzin tew 'ayach, 'icha wal xyutj junc eb' chi yalni, 'ixta 'oj otc alni, caw wach' tzotj wal alni, xchi 'a 'a.

¹³ 'Ix ta'w Micaías 'ixtic: —Tzwac' in ti 'a Jehová, a wal tas 'oj yal in Diosal 'ayin, a 'oj wala', xchi 'a 'a.

¹⁴ Yajn̈ej 'ix c'och Micaías 'a yojltac win rey, 'ix sc'anb'n win 'a 'ixtic: —¿Tzam stac' tz'at wac' owl yet' chon̈b' Ramot 'a yol yic Galaad, mto ma'ay? xchi 'a 'a. 'Ix stz'acn Micaías yal 'a 'ixtic: —'Ac' owl yet'oc, toxn to 'oj 'ajxc ganar o'oj, yujto 'oj 'ajxc 'och 'a yol a c'ab' yuj Dios, xchi.

¹⁵ Palta 'ix yaln win rey chi 'ixtc 'a 'a: —Jay 'ejm to 'oj wal 'ayach, yic tza'n a ti 'ayn 'a sb'i Jehová, yic tzaln 'ayn 'a yel, xchi 'a 'a.

¹⁶ Xlajw cha, 'ix yaln Micaías 'a win 'ixtic: 'Ix wil smasnil eb' soldado israel, sactzicnac yajcn 'at eb' 'a jolmctac witz 'icha no calnelu may yilmal. Yuj cha, 'ix yaln Jehová 'ixtc 'ayin: A jun tzo'n̈ 'anma tic, man̈x 'a yajl eb', junjn mach meltzj cab' 'a junc'ojlal 'a yatut, xchi 'ayin, xchi Micaías.

¹⁷ 'Ix yaln sreyl chon̈b' Israel 'a Josafat 'ixtic: —'Iltnab'n tzwala, 'in tox 'ix wal 'ayach, to a jun winc tic may 'aj tzyal junc tas wach' 'ayin, palta cojn tu tzyala, xchi.

¹⁸ Xlajw cha, xyaln pax Micaías 'ixtic: —'Ab' wal tas tzyac' Jehová wal 'ayach: 'Ix wila to wocn 'ejm Jehová 'a sdespacho, ax smasnil eb' ángel 'ay 'a satcha'an̈, lin̈n 'och eb' 'a swach' c'ab' yet' 'a surito.

¹⁹ 'Ix sc'anb'n Jehová 'ixtic: ¿Mach 'oj 'at jucb'tzanc Acab sreyl chon̈b' Israel, yic tz'at ya'nc owl yet' chon̈b' Ramot 'a yol yic Galaad, sec tzlajw can 'el ta'? xchi. Chuc xyutj yaln jun tzo'n̈ eb', chuc pax tzyutj jun tzo'n̈ xo eb' yalni.

²⁰ Palta 'ay jun espíritu xc'och 'a yojltac Jehová, 'ix yaln 'ixtc 'a 'a, to a 'oj 'at jucb'tzanoc. 'Ix sc'anb'n Jehová 'a 'a, tas 'oj yutoc.

²¹ 'Ix yaln jun espíritu chi 'ixtic: A smasnil eb' tzyalch sb'a a checb'oc, 'oj wac' yal eb' 'es 'a win rey, xchi. 'Ix yaln Jehová 'a 'ixtic: Caw 'oj stac' oj 'ixta', 'ixc 'an, 'at b'o 'icha 'ix otj aln cha, xchi 'a 'a.

²² A ticnec, ojc xo to a Jehová 'ix chan cot jun espíritu 'a'm 'es 'a eb' tzyalch sb'a schecb'oc Dios tic, 'ixtnta 'oj 'aj scotcn chaml 'a eb'an̈, 'icha tas nab'ilx yuj Jehová, xchi Micaías cha.

²³ Xlajw cha, 'ix snitzn cot sb'a Sedequías, yunnal Quenaana 'a stz'ey Micaías, spawn 'och sc'ab' 'a sat Micaías cha, 'ix yaln 'ixtic: —¿Tas x'aj yel Yespíritu Jehová 'ayin, yic tz'at paxtinc 'ayach? xchi.

²⁴ 'Ix ta'w Micaías 'a 'ixtic: —'Oj a na cot jun tic 'a yic jun c'ul cha, atn 'a yic 'oj cob' a c'ub'nc 'el a b'a 'a yojl jun tzo'n̈ cuarto caw c'ultac yaj 'a yoltc n̈a, xchi.

²⁵ Xlajw cha, xyaln sreyl chon̈b' Israel 'ixtic: —Yamc Micaías tic, tzeyi'n 'at 'a Amón sgobernadoral chon̈b' cha, yet' 'a Joás, atn wunnal.

²⁶ Tzeyaln 'a eb', to an tzwala to tz'och 'a preso, jab' wal tas tze yac' sc'uxu', yet' tas tzyuq'uej, masnto yic 'oj in meltzj 'a junc'ojlal, xchi.

²⁷ 'Ix yaln to Micaías jab'x 'ixtic: Toto 'oj a meltzj 'a junc'ojlal, man̈oc Jehová tzpaxtin 'el 'ayn tzyal cha, xchi 'a 'a. 'Ix yaln paxi: 'Ab'c tas 'ix wal e masnil ex chon̈ab', xchi.

A schaml win Acab

²⁸ Xlajw cha, x'at sreyl chon̈b' Israel yet' Josafat sreyl Judá, yic tz'at ya'nc eb' owl yet' chon̈b' Ramot.

²⁹ 'Ix yaln sreyl chon̈b' Israel 'ixtc 'a Josafat: —A yic 'oj woch 'a owl cha, 'oj in jel-l in pichl yic in reyl tic, palta ach xo tic, 'aych cab' a pichl yic a reyl tic, xchi. Xlajw cha, 'ix sjeln 'el sreyl chon̈b' Israel spichul, 'ixta to b'i'an x'och eb' 'a owal.

³⁰ Palta tox 'ix yal sreyl Siria 'a eb' capitan̈ 'a jun tzo'n̈ caruaje yic owal, to matz yac' eb' owl yet' junc xo mach, to cojn yet' sreyl Israel tzyac' eb' owal.

³¹ Ax eb' scapitan̈il jun tzo'n̈ caruaje cha, a yic xyiln eb' Josafat, a snan eb' to a sreyl Israel, yuj cha, 'ix yoyn 'och sb'a eb' 'a spatquil, yic tzya'n eb' owl yet' snani. Yuj cha, caw 'ix 'el yaw Josafat sc'ann colwal, 'ix colwj Jehová yet'oc. A Dios chi 'ix 'i'n 'el eb' capitan̈ chi 'a 'a.

³² A yic 'ix yiln eb' to man̈oc sreyl Israel cha, yuj cha, 'ix yactn eb' ya'n owl yet'oc.

³³ Palta 'ay jun soldado ton̈j 'ix scomn julj 'at sjul-lab', ax 'a win sreyl Israel 'ix 'och tz'apnjoc, a wal 'a 'aj tzchaj sb'a sq'uen pichl yic owl 'aych 'a 'a, ata x'och tz'apnjoc. Yuj cha, 'ix yaln 'a jun mach tz'i'n b'ey scaruaje 'ixtic: —'Ij meltzjoc in caruaje tic, tzin 'e'n 'el 'a scal owl tic, yujto caw niwquil in 'aj in lajwi, xchi 'a 'a.

³⁴ Caw wal niwquil jun owl 'ix 'och 'a jun c'u cha, xcob'to ste'wtzej sb'a sreyl Israel ya'n owl yet' eb' sirio 'a yol scaruaje, masnto yic x'em c'u. Ax wal yic 'ix 'em pilnjoc c'u, 'ix chami.