2 Cr 14 - Chuj San Sebastian Bible

'Ochnc Asa reyl 'a Judá

¹ A yic xcham Abiam, ata xmucx 'a Schon̈b' David. Ax jun yunnal tzcuch Asa, a x'ochcn reyl sjeloc. A 'a yol stiempoal cha, lajn̈e ab'il 'ay junc'ojlal 'a snacion̈.

² A tas sb'o Asa cha, caw wach', caw tojl 'a sat Jehová sDiosal.

³ Yujto 'ix yij 'el jun tzo'n̈ yet'l xajmb'al yic jun tzo'n̈ comn dios 'a yopiso, yet' smacsej eb' 'anma 'a jolmctac witz; sma'n poj jun tzo'n̈ q'uen q'uen niwn yel'chi, sma'cn poj pax jun tzo'n̈ sch'oxnb'il comn dios Aserá.

⁴ 'Ix yaln pax 'a eb' yic Judá, to tzyal sb'a eb' 'a Jehová, atn sDiosal smam yichm eb', yowlal tzyiclj eb' sley yet' schecnb'il.

⁵ An̈jtona', 'ix yi'n pax 'el smacsej eb' 'anma 'a jolmctac witz, yet' pax jun tzo'n̈ yechl 'a jun tzo'n̈ chon̈b' 'a yol yic Judá. Caw 'ay junc'ojlal 'a yol stiempoal win Asa yic xya'n reyal.

⁶ 'Ix ya'n b'o jun tzo'n̈ chon̈b' to 'aych smuroal 'a yol yic Judá, yujto 'ay junc'ojlal 'a jun tiempoal cha. Man̈x 'a 'aj 'ix 'at eb' 'a junc owal, yujto a Jehová 'ix 'a'n junc'ojlal 'a eb'.

⁷ Yuj cha, 'ix yaln 'ixtc 'a eb' 'aj Judá cha: Quib'oc chan̈ jun tzo'n̈ chon̈b' tic, tzqui b'onec pax 'och smuroal 'a spatquil, storreal yet' spuertail; a q'uen hierro tz'och yipnub'oc ya' sb'a a qui nacion̈ec tic 'ayc' 'a yol qui c'ab'ec. Yujto xca'c 'och 'a qui c'ojlec calnec qui b'a 'a Jehová qui Diosalec, yuj cha, a x'a'n junc'ojlal 'ayn̈ec yet' smasnil eb' cajn 'a qui tz'eyec, xchi. Yuj cha, caw wach' 'ix 'aj sb'o jun tzo'n̈ cha.

⁸ A Asa cha, 'ay 'oxe ciente mil soldado 'a Judá, 'ay smacl sat jul-lab' yet' eb', yet' lanza. 'Ay pax 280 mil eb' yic Benjamín. A eb' cha, 'ay pax smacl sat jul-lab' yet' eb', 'ay pax sjul-lab' eb'. Caw jeln eb' smasnil.

⁹ 'Ix cot Zera sreyl Etiopía yac' owl yet' eb'. 'Ix jaw eb' 'a chon̈b' Maresa, jun miyon̈ soldado ajun yet'oc, yet' 'oxe ciente caruaje yic owal.

¹⁰ Xlajw cha, 'ix 'elt rey Asa yic tzchan sb'a yet'oc, axta xc'och yet' eb' soldado yac' owl yet' Zera chi 'a lum pan̈n 'a'lic Sefata, 'a sla'nil Maresa cha.

¹¹ 'Ix yaln sb'a Asa 'a Jehová sDiosal, xyaln 'ixtic: Mamin Jehová, ach tic caw lajnn̈ej tzotj a colwj 'a mach tec'an yet' 'a mach may wal ste'nal. Yuj wal cha, colwjan̈ quet' ach Jehová qui Diosal on̈, yujto 'ix ca'ch wal qui c'ojl 'ayach. A yet' a poder tzon̈ jaw cac' owl yet' jun tzo'n̈ soldado tic. Mamin Jehová, ach tic qui Diosal ach on̈, ch'oxo chajtlto may junc mach tztac' ste'wtzan sb'a 'a a sat, xchi.

¹² Yuj cha, 'ix ya'n Jehová 'ajxoc ganar eb' etíope yuj Asa yet' yuj eb' yic Judá, 'ix 'at eb' 'elc 'a eb'.

¹³ Ax Asa, yet' eb' soldado 'ix 'at eb' 'a spatquil eb', masnto 'a Gerar. X'ajx ganar eb' etíope cha, man̈x 'a jac tas xcan 'a eb'. Man̈x 'ic stac' ste'wtzan sb'a eb' 'a sat Jehová yet' 'a sat eb' soldado, yujto c'uxn xyijcan 'ec' eb' soldado Asa tastc 'ay 'a eb'.

¹⁴ An̈jtona', 'ix ya'n pax eb' owl yet' jun tzo'n̈ chon̈b' 'ay 'a stz'ey Gerar cha, 'ix jaw xiwc'ojlal 'a scal eb' yuj Jehová. C'uxn 'ix yij 'at eb' yic Judá chi smasnil tastc 'ay 'a jun tzo'n̈ chon̈b' cha, yujto man̈x yalnb'ilc ricoal 'ay 'a 'a.

¹⁵ An̈jtona', 'ix 'och pax eb' 'a 'aj 'ay no cajb'il noc'. Til wal no calnelu, no cameyo 'ix yij eb'. 'Ixta to b'i'an 'ix paxt eb' 'a Jerusalén.