2 Cr 13 - Chuj San Sebastian Bible

'Ochnc Abiam sreyloc Judá

¹ A yic swajxclajn̈il xo ab'il yoch Jeroboam reyal, schan 'el Abiam yich ya'n reyl 'a Judá.

² 'Oxe ab'il 'ix yac' reyl 'a Jerusalén. Micaías sb'i snun, yisl Uriel 'aj Gabaa. 'Ix 'och Abiam 'a owl yet' Jeroboam cha.

³ A Abiam 'ay chan̈e ciente mil soldado ajun yet'oc, to caw wal tec'an, sic'b'il 'el yu'uj. 'Ixta pax Jeroboam, ajun wajxque ciente mil soldado yet'oc, to caw 'ay yip, tec'an, sic'b'il pax 'el yu'uj.

⁴ Xlajw cha, 'ix 'at Abiam yet' eb' soldado 'a lum witz Semaraim, 'ay 'a jolmctac witz 'a yol yic Efraín, 'ix yaln 'ixtic: ¡Ach Jeroboam yet' e masnil ex wit israelal, 'ab'c tas 'oj wala'!

⁵ ¿Tom man̈ eyojcoc to a Jehová qui Diosalec an̈ israel on̈c tic, xya'ch yopiso David yet' eb' yin̈tl b'aq'uin̈, yic tzya'n reyl 'a quib'n̈ec an̈ israel on̈c tic 'a smasnil tiempo, jun trato to matz tac' sjelxi?

⁶ Palta ax Jeroboam yunnal Nabat, schecb' Salomón atn yunnal David, 'ix 'och 'ajc'ojlal 'a syajlil.

⁷ 'Ix ya'ch sb'a jun tzo'n̈ winc 'isj yet'oc, tu snab'en eb'. 'Ix yac' eb' owl yet' Roboam, yunnal Salomón, yujto a Roboam cha, to quelm 'unn to, mant 'a wal snab'en. Yuj cha, mantzac stac' ste'wtzan sb'a 'a sat eb'.

⁸ A ticnec, a 'e nani to 'oj stac' eya'n owl quet' an̈ yin̈tl on̈ David tic on̈, 'ac'b'il jun 'opiso chi yuj Jehová 'a yol qui c'ab' on̈, yujto ax tic caw niwn e b'eyi, eyet' pax jun tzo'n̈ yechl wacx to nab'a oro b'ob'il yuj Jeroboam yic tz'och e diosaloc.

⁹ 'In xe pechl pax eb' ya'mal 'och sti eb' 'anma 'a Jehová, atn eb' yin̈tl can Aarón yet' eb' levita, 'in xe si'cn pax 'och eb' tz'och ya'malc 'och e ti 'a jun tzo'n̈ e comn diosal 'a yol eyico', 'icha tzb'eylb'ej jun tzo'n̈ xo nacion̈. Tzann̈j mach tzjaw yet' junc quelm wacax, yet' ucwn̈oc no mam calnelu, a xe ya'cn 'och ya'malc 'och e ti 'a jun tzo'n̈ e diosal cha, palta a jun tzo'n̈ cha, man̈ diosoc eb'.

¹⁰ Palta an̈ xo tic on̈, a Jehová qui Diosal on̈, may xon 'aj 'ix cactj can on̈. A jun tzo'n̈ eb' ya'mal 'och qui ti tz'a'n servil Jehová, atn eb' yin̈tl Aarón. Ax eb' tzcolwj yet' eb', atn eb' levita.

¹¹ Atn eb' tic tz'a'n 'och sc'a'l xajmb'al to tz'a smasnil, yet' incienso yic tz'ajx 'a Jehová 'a junjn sq'uin̈b'ial yet' 'a junjn yemc'ual; tzya'n pax 'ejm eb' 'ixm pan caw wach' 'a sat mexa, jun to cojn Dios 'ay yico'. Ax 'a junjn yemc'ual tzya'n pax 'och eb' sc'a'l cantil 'a yet'l to nab'a oro. An̈ tic on̈, tzqui yiclj schecnb'il Jehová qui Diosal on̈, palta ax xo tic, xeyactj cani.

¹² A Dios 'ayc' quet' on̈, a b'ab'l cuj on̈, ax eb' ya'mal 'och qui ti 'a Dios on̈, caw lista xo yaj eb' yutz'n strompeta yic tz'och owl eyet' ax tic. Ex wit chon̈ab', man̈ eyac' owl yet' Jehová, atn qui Diosalec yet' eb' qui mam quichmec, yujto ma'oj eyac' xon ganar, xchi Abiam 'a eb'.

¹³ Palta ax Jeroboam tox 'ix yal 'a nan̈l eb' soldado chajtlto a 'a spatquil eb' soldado yic Judá ata tzjaw eb', ax nan̈l xo eb' soldado Jeroboam cha, 'ix can eb' 'a yojltac eb' yic Judá cha.

¹⁴ A yic 'ix 'at q'ueln eb' yic Judá 'a spatquil, ax xyiln eb' to wan sjaw eb' soldado 'a spatquil eb' yet' pax 'a sat eb', yuj cha, 'ix tew eb' 'a Jehová, ax eb' ya'mal 'och sti eb' 'a Dios, 'ix yutz'n eb' strompeta.

¹⁵ Ax yic x'el yaw eb' yic Judá chi ya'n owal, ax Dios 'ix 'a'n 'ajxc ganar Jeroboam chi yet' smasnil eb' yit israelal, 'ix 'ejm eb' yuj Abiam sreyl Judá.

¹⁶ 'Ixtnta 'ix 'aj eb' israel chi s'at 'elc 'a sat eb' yic Judá, yujto a Dios x'a'n 'och eb' 'a yol sc'ab' eb'.

¹⁷ A Abiam yet' eb' soldado, caw niwn 'anma 'ix smil cham eb', o'e ciente mil eb' israel xcham yuj eb', atn eb' to sic'b'il 'eli.

¹⁸ Yuj cha, caw 'emmquilal xoj xyutj sb'a eb' israel 'a yic jun tiempoal cha. A eb' yic Judá caw xyac' ganar eb' 'a yib'n̈ eb' cha, yujto xya'ch eb' sc'ojl wal 'a Jehová, atn sDiosal eb' yet' eb' smam yicham.

¹⁹ 'Ix 'at Abiam 'a spatquil Jeroboam, 'ix yi'n can 'ec' jun tzo'n̈ chon̈ab', atn Bet-el, Jesana, yet' Efraín yet' yaldeail jun tzo'n̈ chon̈b' tic.

²⁰ A Jeroboam cha, man̈xtoc stac' yu'uj, ya' sb'a pitzn Abiam. A Jehová 'ix 'i'n 'ec' sq'uinl Jeroboam cha, 'ix chami.

²¹ Palta ax Abiam cha, caw xyij yip 'a yopiso. 'Ay chan̈lajn̈wan̈ yistzil, chab'schawinc yunnal, waclajn̈wan̈ pax yisil.

²² Ax jancto yab'xil Abiam cha, yet' tas 'ix 'el sb'oni, ata tz'ib'b'il can 'a ch'an̈ libro yic yab'xil Judá yuj Iddo win schecb' Dios.