2 Cr 11 - Chuj San Sebastian Bible

¹ A yic 'ix jaw Roboam 'a Jerusalén, 'ix ya'n syam sb'a 180 mil soldado sic'b'il 'el 'a scal eb' yin̈tl Judá, yet' 'a eb' yin̈tl Benjamín, yic tz'at ya'nc eb' owl yet' jun tzo'n̈ xo eb' yit israelal, sec wach' tzmeltzj pax 'och eb' 'a yaln̈ schecnb'il win jun 'ejm xo.

² Palta 'ix yaln Jehová 'ixtc 'a Semaías, atn win schecab':

³ Al 'a Roboam win yunnal Salomón, sreyl Judá, yet' 'a smasnil eb' israel 'ay 'a yol yic Judá yet' 'a eb' yic Benjamín, tzal 'a eb'

⁴ to an tzwal 'ixtic: Man̈ eyac' owl yet' eb' eyit israelal, meltzjan̈c junjn ex 'a eyatut, yujto an 'ixta 'ix wutj jun tic, xchi Dios, xa chi 'a eb'. A yic 'ix yab'n eb' tas 'ix yal Jehová cha, 'ix pax eb' 'a yatut, man̈xtoc 'ix 'at eb' yac' owl yet' Jeroboam.

Tz'ijx chan̈ Roboam

^5-10 'Ix 'aj cajn Roboam 'a Jerusalén, 'ix sb'on chan̈ smuroal jun tzo'n̈ chon̈b' 'a yol yic Judá: Atn chon̈b' Belén, Etam, Tecoa, Bet-sur, Soco, Adulam, Gat, Maresa, Zif, Adoraim, Laquis, Azeca, Sora, Ajalón yet' Hebrón. A jun tzo'n̈ chon̈b' tic ata 'ay 'a yol yic Judá yet' 'a yol yic Benjamín.

¹¹ A 'a junjn chon̈b' tic, 'ix ya'cn 'och capitan̈ 'a 'a, caw niwn 'ixm trigo, aceite, yet' yal uva 'ix smolb'tzej ta'.

¹² An̈jtona', 'ix ya'n pax smacl sat jul-lab', yet' lanza 'a smasnil jun tzo'n̈ chon̈b' cha, caw 'ix b'o wal si'mb'il yu'uj. 'Ixtnta x'aj yochcn yopiso 'a yol yic Judá yet' 'a yol yic Benjamín.

Eb' ya'mal 'och sti eb' 'anma 'a Dios

¹³ A eb' ya'mal 'och sti eb' 'anma 'a Dios yet' jun tzo'n̈ xo eb' levita, 'ix cot eb' 'a smasnil lugar 'a yol yic Israel, yic tzya'n 'och sb'a eb' yet' Roboam.

¹⁴ A eb' levita 'ix yactj can eb' tas 'ay 'a 'a yet' slum eb' 'aj tzwa scajb'en noc', yic tzjaw eb' 'a jun tzo'n̈ lugar 'a yol yic Judá, yet' 'a Jerusalén, yujto a Jeroboam yet' jun tzo'n̈ xo eb' tza'nto 'ochnc reyl yu'uj, a eb' pechjnac 'el eb' 'a yopiso ya'n servil Jehová.

¹⁵ Yujto a Jeroboam cha, xya'ch yopiso jun tzo'n̈ eb' tz'och ya'malc 'och sti eb' 'anma 'a scomn diosal, yic tz'och eb' 'emmquilal 'a jun tzo'n̈ macsej 'a jolmctac witz, yet' 'a eb' demonio, yet' pax 'a jun tzo'n̈ yechl wacx b'ob'il chan̈ yu'uj.

¹⁶ Ax pax jun tzo'n̈ xo eb' caw yel 'aych wal 'a snab'en yaln sb'a 'a Jehová sDiosal smam yicham, 'ix 'och tza'n eb' yuj eb' levita, 'ix jaw eb' 'a Jerusalén yic tzya'n eb' xajmb'al 'a 'a.

¹⁷ 'Ixtnta x'aj Roboam yunnal Salomón yi'n yip 'a yopiso 'a yol yic Judá 'a 'oxe ab'il, yujto cojn 'oxe ab'il sb'eylb'ej sb'eyb'al David yet' Salomón.

Eb' yunnal Roboam

¹⁸ 'Ix nupn Roboam yet' 'ix Mahalat, yisl Jerimot win yunnal David, ax snun 'ix, atn Abihail yisl Eliab, yixchicn Isaí 'ix.

¹⁹ Eb' yunnal Roboam yet' 'ix Mahalat, 'oxwn̈ eb': atn Jeús, Semarías yet' Zaham.

²⁰ Xlajw cha, xyi'n pax win 'ix Maaca yisl Absalón. A eb' yunnal win yet' 'ix, atn Abiam, Atai, Ziza yet' Selomit.

²¹ A Roboam cha, wajxclajn̈wan̈ yistzil, 60 schab'l 'istzil, 28 yunnal, 60 pax yisil, palta yel xo tzchamc'ojlej win 'ix Maaca chi 'a yib'n̈ jun tzo'n̈ xo eb' 'ix cha.

²² A Roboam cha, snib'j xya'ch Abiam yune 'ix Maaca reyl sjeloc, yuj cha, a xya'ch yajlil 'a scal jun tzo'n̈ xo eb' yu'tac.

²³ Caw wach' 'ix yutj Roboam snab'en, yuj cha, 'ix ya'cn 'at eb' yunnal chi 'a jun tzo'n̈ chon̈b' to 'aych smuroal 'a yol yic Judá, yet' 'a yol yic Benjamín. Til wal tas tzc'uxx 'ix yac' 'a eb', til wal pax yistzil eb' saycn 'och winac.