2 Cr 10 - Chuj San Sebastian Bible

Spojjnac sb'a chon̈b' Israel

¹ 'Ix 'at Roboam 'a chon̈b' Siquem, yujto ata syam sb'a smasnil eb' yit israelal yic tzya'n 'och eb' win reyal.

² 'Ix c'och yab'xil jun tic 'a Jeroboam yunnal Nabat, yuj cha 'ix paxt 'a Egipto, yujto ata c'ochnc cani yic s'at 'elc 'a rey Salomón.

³ 'Ix 'at 'awtxoc cot Jeroboam chi yuj eb' yit israelal, ax yic xjawi, 'ix 'at yet' eb' yic tzpaxtin yet' Roboam. 'Ix yaln eb' 'a 'ixtic:

⁴ —Yel xo ya on̈ 'ec' 'a munljel yuj a mam, ax ticnec 'ij 'el jac munljel 'al 'aych 'a quib'n̈ yuj on̈, toto 'ixta', 'oj ach cac' servil, xchi eb'.

⁵ Xlajw cha, xyaln Roboam 'a eb' 'ixtic: —At chab'j tzwul in e yilxi, xchi 'a eb'. Ax eb' chon̈b' cha, 'ix pax eb'.

⁶ Xlajw cha, 'ix sc'anb'n Roboam snab'en 'a eb' yichm wincal chon̈ab', atn eb' munljnac yet' Salomón, atn smam, 'ix yaln 'a eb' 'ixtic: —¿Tas wal junc nab'en tzeyac' 'ayn ax tic, tas 'oj wutc ta'wc in b'a 'a eb' 'anma tic? xchi.

⁷ 'Ix yaln eb' 'a 'ixtic: —Toto wach' 'oj otc a b'a 'a eb' chon̈b' tic, ax a yiclni a b'on 'icha tznib'j eb', toto wach' pax 'oj otc aln 'a eb', to 'ixta', 'oj ach yac' servil eb' 'a smasnil tiempo, xchi eb' 'a 'a.

⁸ Palta ma'ix chaj yab' snab'en eb' 'ichmtac winc cha, ax 'a eb' quelmtac winc 'ix sc'anb'j snab'en, eb' to junn̈j q'uib'nc chan̈ yet'oc, atn eb' 'aych 'a'j servil 'a 'a.

⁹ 'Ix sc'anb'n 'a eb' 'ixtic: —¿Tas junc nab'en tzeyac' 'ayn ax tic, tas 'oj wutc ta'wc in b'a 'a eb' chon̈b' cha? Yujto tznib'j eb', to tzwij 'emt jac yoc munljel 'aycn 'och 'a yib'n̈ eb' yuj in mam, xchi.

¹⁰ Xlajw cha, xta'w jun tzo'n̈ quelmtac winc cha, 'ix yaln eb' 'a 'ixtic: —A jun tzo'n̈ 'anma 'ix aln 'aych cha, chajtlto tzej 'emt yoc jun munljel 'aycn 'och 'a yib'n̈ eb' yuj a mam cha, 'ixtc tzotj aln 'a eb': Toto ya munljel 'aj 'ayx can 'och yuj in mam, an xo pax tic, yel xo pax caw ya munljel 'aj 'oj ex wa'chi.

¹¹ Toto a 'in mam cha, 'al 'ix yutj eyicatz, an xo pax tic, yel xo wal 'al 'oj wutc eyictz cha. Toto cojn tz'um sc'anjnac in mam yic ex sma'ni, palta an xo pax tic, a no tz'um 'aych q'uen 'a sn̈i', a 'oj wa'lb'oc 'ayex, xa chi 'a eb', xchi eb' quelmtac cha.

¹² Ax 'a schab'jil cha, 'ix jaw Jeroboam yet' smasnil eb' chon̈b' 'a rey Roboam, 'icha yutjnac yaln 'a eb'.

¹³ Palta ax win rey cha, caw tu 'ix yutj spacn 'a eb', ma'ix syiclj snab'en eb' yichm wincal chon̈b' cha.

¹⁴ A tas 'ix yal eb' quelmtac winc cha, a 'ix yal 'a eb' chon̈b' cha, 'ix yaln 'ixtc 'a eb': Toto a 'in mam cha, 'al 'ix yutj eyicatz, an xo tic, 'ec'b'al yal-l 'oj wutc eyictz cha. Toto cojn tz'um sc'anjnac in mam yic ex sma'ni, an xo pax tic, a no tz'um 'aych q'uen 'a sn̈i', a 'oj wa'lb'oc 'ayex, xchi.

^15-19 A yic xyab'n eb' 'anma', to a win rey Roboam cha, ma'ix schaj win yab' tas 'ix yal eb', yuj cha, xyaln eb' 'ixtic: ¡May calnec quic 'a eb' yin̈tl David, win yunnal Isaí! ¡Chuc yin̈tl eb', chuc pax quin̈tlec! ¡Pax coyc 'a catut junjn on̈ec! ¡Stan̈wc cab' sb'a win yin̈tl David tic! xchi eb'. A win Adoram 'ay yopiso yi'n b'ey eb' 'anma 'a munljel to 'ac'b'il pural sb'o'i. Ax rey Roboam 'ix schecn 'at win paxtinc yet' eb' israel cha. Palta 'ix 'elt somnjoc smasnil eb' sjulq'uenoc winac, masnto xchami. Ax win rey Roboam cha, yajn̈ej x'och 'a yol scaruaje, 'ix 'at 'eloc, axta xc'och 'a Jerusalén. Xlajw cha, ax junjn macn̈il eb' israel 'ay 'a stojlal norte, 'ix pax eb' 'a yatut. Cojxn 'a eb' 'anma cajn 'a yol jun tzo'n̈ chon̈b' 'a yol yic Judá, ata 'ix yac' Roboam reyal. 'Ixta xyutj eb' israel yi'n can 'el sb'a 'a yaln̈ schecnb'il eb' yin̈tl David. 'Ixtnta 'ix 'aji yujto a Jehová 'ix 'a'n b'o 'icha tas yaljnac win Ahías 'aj Silo 'a yib'n̈ Jeroboam yunnal Nabat.