2 Cr 1 - Chuj San Sebastian Bible

Tzc'an Salomón sjelnal 'a Dios

¹ A Salomón yunnal David, 'ix yij yip 'a sreyal, yujto a Jehová sDiosal a 'aych yet'oc, yel xo 'ix 'ijx chan̈ yopiso.

² Xlajw cha, 'ix yawtn Salomón smasnil eb' yit israelal: atn eb' syajlil eb' soldado, eb' juez, smasnil eb' yichm wincal chon̈ab', yet' eb' yajl yaj 'a scal eb' yican, atn eb' niwn yel'ch yopiso 'a chon̈b' Israel.

³ 'Ix 'at Salomón yet' smasnil eb' syam sb'a chi 'a sjolm lum witz Gabaón, yujto ata 'aycn scajnub' Dios 'aj tzqui chaj qui b'a yet'oc, atn jun sb'ojnac can Moisés, win schecb' Jehová 'a cusltac lu'um.

⁴ Palta a David yijnacx cot te scaxail strato Dios 'a Quiriat-jearim, 'ix ya'n can 'och 'a jun Mantiado b'ob'il yuj 'a Jerusalén.

⁵ A pax jun yet'l xajmb'al to nab'a bronce ya'jnac b'o Bezaleel yunnal Uri, yixchicn Hur, ata 'aycn 'a Gabaón, 'a yojltac scajnub' Jehová. 'Ix 'at Salomón yet' smasnil eb' chon̈b' ta', yic tz'at sc'anb'noc sb'a eb' 'a Dios.

⁶ 'Ix q'ue'ch Salomón chi 'a yojltac Jehová 'a 'aj 'ayc' jun yet'l xajmb'al cha, atn 'a yojltac jun Mantiado 'aj tzqui chaj qui b'a yet' Dios; 'ix ya'n 'ajxoc tz'a jun mil no xajmb'al 'a yib'n̈ jun yet'l xajmb'al cha.

⁷ A 'a yic jun 'ac'wl cha, 'ix sch'ox sb'a Dios 'a Salomón, 'ix yaln 'a 'ixtic: C'an 'ayin tas tza nib'ej, ax wa'n 'ayach, xchi.

⁸ 'Ix yaln Salomón 'a Dios 'ixtic: Ach tic Mamin, yel xo xa chamc'ojlej David, atn in mam, an xo in a'cn 'och reyl sjeloc.

⁹ A ticnec ach Jehová in Diosal, 'el'ch cab' tas 'ix al 'a in mam, yujto ach in a'ch reyl 'a yib'n̈ jun chon̈b' to lajn sb'isl 'icha spococal lum lu'um.

¹⁰ Yuj cha, a ticnec 'ac' in jelnal, 'ac' nachjoc 'el wu'uj sec wach' 'oj stac' in jucb'tzan jun chon̈b' tic. May junc mach tztac' ya'n yajlil 'a yib'n̈ jun a niwquil chon̈b' tic 'a yol yico', xchi.

¹¹ 'Ix ta'w Dios 'a Salomón 'ixtic: Yujto man̈oc a ricoal, man̈oc sniwquil-l el'chi, man̈oc schaml eb' 'ajc'ojol, man̈oc pax a q'uinl 'ix a c'ana, palta a sjelnal a nab'en, sec 'oj stac' a'n reyl 'a yib'n̈ in chon̈b' 'aj ach wa'cn 'och reyl tic,

¹² yuj cha, tic 'oj wac' a jelnal. 'Oj wac' pax a ricoal, yet' sniwquil-l el'chi. May junc xo rey lajn 'icha ach tic 'a yic yaln̈taxi. An̈jtona', man̈x 'a pax junc xo lajn 'icha ach tic, 'a yic b'aq'uin̈, xchi Dios.

¹³ Xlajw cha, 'ix meltzj pax 'emt Salomón 'a Gabaón, 'a yojltac Mantiado cha, 'ix jaw 'a Jerusalén. Xlajw xoj cha, 'ix 'och reyl 'a yib'n̈ chon̈b' Israel.

Ya'jnac Salomón syam sb'a*r* no chej yet' jun tzo'n̈ caruaje

¹⁴ 'Ix ya'n Salomón syam sb'a 1,400 caruaje yic owal, yet' lajchwe mil no chej. 'Ayc' jun tzo'n̈ chi 'a jun tzo'n̈ chon̈b' to yic xon yaji, 'ay pax jun tzo'n̈ chi 'ayc' yet' win 'a Jerusalén.

¹⁵ Man̈ jantcoc q'uen plata, q'uen oro xyac' win syam sb'a 'a Jerusalén, 'icha xoj q'uen comn q'ue'en. A te c'ute', toxn̈ej jun'ec' te 'icha yaj te calte'al higo 'a span̈nil yich lum witz.

¹⁶ A e no schej winac, ata 'ix manx cot e no 'a Egipto yet' 'a Cilicia; a eb' schon̈wjum win rey chi tzmann cot e no ta'.

¹⁷ A stojl junjn caruaje cotnc 'a Egipto cha, waque ciente plata stojol, ax stojl junjn no chej, nan̈l schab'l ciente. Ax smasnil eb' sreyl eb' hitita, yet' eb' sirio, a eb' tzmann jun tzo'n̈ chi 'a eb' chon̈wjum cha.