2 Co 9 - Chuj San Sebastian Bible

A jun ofrenda tzq'ue wa'an

¹ Ax jun eyofrenda 'oj eyac' 'a eb' quit creyenteal, man̈x yowlalc tzat walb't 'ayx yu'uj.

² Yujto wojc xoni, to caw tze nib'j colwjc e b'a 'a eb'. Wan ex waln wach'l 'a eb' 'aj Macedonia tic. Tzwal 'ixtc 'a eb' eyu'uj: A eb' 'a yol yic Acaya, yab'lil xo sc'ojl eb' yi'n chan̈ yofrenda, xin chi. Ax eb' 'aj Macedonia tic, yic 'ix yab'n eb', to yelc'ojlal tzeyac' eyico', yuj cha, til wal eb' x'el 'a sc'ojl ya'n yic jun xo.

³ Palta 'oj in checb't eb' cu'tac tic 'ayex, sec 'oj 'el'choc jun tzo'n̈ tas xwal eyu'uj, yic ex waln wach'il. 'Oj in checb't eb', sec wach' lista xo yaj eyofrenda, 'icha xwal eyuj tic.

⁴ Toto 'ay eb' 'aj Macedonia tic tz'at wet'oc, toto ax tzyiln eb', man̈ listaoc yaj eyofrenda cha, ax yel qui q'uixwel on̈. Yujto tox ex ca'ch yipc qui c'ojl on̈. May tas tzwala, toto 'oj 'el e q'uixwel jun xo.

⁵ Yuj cha, xin nani, to yowlal tzin tew 'och 'a eb' cu'tac tic, sec 'oj b'ab'l c'och eb' 'ayex. 'Oj 'at colwjc eb' eyet' eyi'n chan̈ eyofrenda, 'icha yaj eya'n can e ti'. Toto 'ixta', lista 'oj eyutc eyofrenda cha, ax eya'n yuj swach'l e nab'en, sec ma'oj 'at ex cac' pural on̈.

⁶ Tze na cot junx 'oj walb't tic. A eb' jab' wal tzyawej, jab' wal tzjach' eb'. Ax eb' niwn tzyawej, niwn tzjach' eb'.

⁷ Junjn on̈ec, yowlal tzca'c 'icha tzqui nac yet' qui nab'en. Man̈ cusc'ojlaloc tzcutj ca'ni. Man̈ yujoc tzqui na'a, to tzon̈ 'ajx pural tzca'ni, yujto a Dios, tzchamc'ojlan eb' tzalji tzya'n yico'.

⁸ A Dios, tztac' ya'n smasnil tas 'ayx yuj swach'c'ojlal, tzya'n jantcn̈ej tas 'ay tz'och eyuj 'a smasnil tiempo. Caw tzyac' sobra 'ayex, yuj cha, til wal tas wach' 'aj tzex colwji.

⁹ Yujto 'ixtc tzyal 'a Ch'an̈ U'un̈: Tzyac' eb' siylab' 'a eb' meb'a', ax swach' nab'enal eb' cha, 'oj naxoc cot 'a smasnil tiempo, xchi.

¹⁰ A Dios tz'a'n jantcn̈ej 'in̈t tz'awxi, tzya'n pax jantcn̈ej tas tzc'uxxi. A 'oj 'a'nc jun tzo'n̈ tas 'ayex yic 'oj eya'nc eyofrendaoc. 'Icha to 'oj eyawc cani. Ax jun spac 'oj e cha yuj e wach' nab'enal cha, caw 'oj q'uib' yu'uj, ax e jach'ni.

¹¹ Yuj cha, til wal swach'l 'oj e cha', sec 'oj stac' e wach' 'a'n nan̈loc xo. Cujec, 'ay eb' quit creyenteal 'oj yac' yuj diosal 'a Dios, yic 'oj schanc eb' eyofrenda cha.

¹² Yujto a jun colwal chi 'oj 'ajxoc 'a eb', man̈ cojnoc yopiso yic tzcolwj 'a eb' yuj tas 'ay tz'och yu'uj. Yopiso pax yic tzya'n eb' niwn yuj diosal 'a Dios yu'uj.

¹³ 'Oj yal eb' wach' paxti 'a Dios, yujto a jun eyofrenda chi 'oj ch'oxnoc, to wan eyiclni tas tzyal wach' 'ab'x yic Cristo. An̈jtona', 'oj yal pax eb' wach' paxti 'a 'a, yuj jun niwn colwal chi 'oj eyac' 'a eb'. Yujto a jun cha, 'oj colwjoc 'a eb' quit creyenteal smasnil.

¹⁴ Ax eb' 'oj chanoc cha, 'oj leslwoc eb' eyu'uj. Caw 'oj ex schamc'ojloc eb', yujto til wal swach'c'ojlal Dios 'oj sch'ox 'a eb' eyu'uj.

¹⁵ Calc yuj diosal 'a Dios, yujto a jun siyjnac cot 'ayn̈ec, man̈x 'a yalnb'il jantc swach'il.