2 Co 8 - Chuj San Sebastian Bible

A tas tzcutj ca'nec cofrenda

¹ A ticnec, ex wu'tac, ex wanab', tzqui nib'j tzcalb't 'ayx on̈, chajtl 'ix 'aj scheclj 'el swach'c'ojlal Dios 'a eb' creyente 'a junjn iglesia 'a yol yic Macedonia tic.

² Wach'xam caw x'ajx prowal eb' yuj screyenteal, palta caw tzaljn̈ej eb'. Wach'xam caw meb'a eb' si'mb'il, palta 'ela eb', 'icha to caw rico eb' tzquila.

³ Tzwac' testigoal in b'a yuj eb', chajtlto yelc'ojlal xyac' eb' smasnil tas stac' yu'uj, caw yelc'ojlal xyac' eb' jun tzo'n̈ xo.

⁴ Caw xtew 'och eb' 'ayn̈ on̈, sec tzqui chaj yac' eb' scolwal on̈, yujto tznib'j eb' tzcolwj 'at 'a eb' yit creyenteal.

⁵ Xqui na on̈, jantc tzyac' eb', palta yel xo wal niwn xyac' eb', yujto b'ab'l xyac' sb'a eb' 'a Cajlil. Xlajw cha, xya'n pax sb'a eb' 'ayn̈ on̈, 'icha tznib'j Dios.

⁶ Yuj cha, on̈ tew 'och 'a Tito on̈, sec tz'atx 'ayex. Ax 'at swach' chanc eyofrenda 'oj eyac' yuj e wach'c'ojlal, yujto a x'i'n 'el yich yic tzeya'ni.

⁷ Til wal wach'l tze b'o'o, caw tzeya'ch 'a e c'ojol, caw cuywjum ex, jeln ex xo, yelc'ojlal tzeyutj e b'on junc tas, tzon̈ e chamc'ojlan pax on̈. Yuj cha, comnoc tze ch'ox pax e wach'l eya'n eyofrenda.

⁸ A jun tzwalb't 'ayx tic, man̈ caw checnb'iloc, ton̈j tzin nib'j tzeyab'i, chajtl tzyutj jun tzo'n̈ xo eb' ya'n scolwal 'a tic, sec tzcheclj 'eli, toto yel 'ay e chamc'ojlal ta'.

⁹ Yujto cojquec, a Cajlil Jesucristo, caw niwn swach'c'ojlal. Til wal sricoal 'a satcha'an̈, palta wul ya'jnac 'och sb'a meb'a'il, yuj schamc'ojlal 'ayn̈ec, 'ixta yutjnac sb'a, sec wach' yuj smeb'a'il cha, ax cochc ricoal 'a sat Dios.

¹⁰ Tzwaln 'at 'ayex, yuj tas tzin na yuj jun eyofrenda cha, sec 'oj wach' nachjc 'el eyu'uj. A 'a junb'i, e chajnac 'el yich eya'n eyofrenda, yujto caw x'el 'a e c'ojl eya'ni.

¹¹ A ticnec, tzin nib'j an̈j 'ijnoc tzeyac'a, sec tz'acn 'oj laj eyac'a', 'icha eyutjnac e chan 'el yich eya'n 'a smasnil e c'ojol, 'ixta tzeyutj eya'n pax ticnec. A tzyala, tastc 'ay 'ayex.

¹² Toto tz'el 'a qui c'ojlec ca'n cofrenda, caw tzalj Dios yet'oc, a tzyala tas 'ay 'ayn̈ec. Matz c'ana, toto may tas 'ay 'ayn̈ec.

¹³ Man̈toc tzin nib'j tzex 'och meb'a'il, yic tzlajw 'elt tas 'ay 'ayex, yuj e colwj 'a jun tzo'n̈ xo.

¹⁴ Palta tzin nib'j lajn tzon̈ 'ajc qui masnil. A ticnec, a tas tzyac' sobra 'ayex, tztac' eya'n stz'acb'oc tas 'ayt tz'och yuj eb' cha. Ax 'a jun 'ejm xo, ax cab' eb' tz'a'n stz'acb' tas 'ay tz'och pax eyu'uj. Toto 'ixta', lajn 'oj cajc qui masnil.

¹⁵ Yujto tzyal 'ixtc 'a Ch'an̈ U'un̈: A eb' niwn tas 'ay 'a 'a, ma'ix yac' sobra yic eb'. Ax eb' jab' wal yico', may tas xyac' palta 'a eb', xchi.

A Tito yet' eb' 'atnc yet'oc

¹⁶ Tzwac' yuj diosal 'a Dios, yujto a tz'a'n jawc 'a sc'ojl Tito, yic tzex sya'ilni, 'icha tzwutj ex wiln an tic.

¹⁷ A yic in tew 'och 'a 'a, yic tz'at ex yilnoc, caw 'ix sta'wj muc'uc. Yet' smasnil sc'ojol, tznib'j 'at ex yila', yuj cha, 'oj 'atoc.

¹⁸ 'Ay junx cu'taquec 'oj qui checb't yet' on̈. A jun tic, caw tzyal eb' creyente wach'l 'a junjn iglesia, yujto caw wach' smunlj 'a wach' 'ab'x yic colnb'il.

¹⁹ An̈jtona', atn jun cu'tac tic sic'b'il 'el yuj eb' creyente 'a junjn iglesia, yic tz'ec' schanc jun colwal chi quet' on̈. Wan qui b'on jun tic on̈, sec 'oj checljoc 'el swach'l Cajlilec, ax scheclj pax 'el swach'l e nab'en.

²⁰ Tzqui nib'j on̈, may mach tz'a'n 'och junc tas 'a quib'n̈ on̈, chajtl tz'ec' cutc qui chan jun ofrenda tic on̈.

²¹ Yuj cha, caw wach' tzcutj qui b'on jun tzo'n̈ tic on̈. Man̈ocn̈ej 'a sat Cajlilec wach' tzcutj qui b'a on̈. An̈jtona wach' tzcutj qui b'a 'a sat eb' quit 'anma'il.

²² 'Ay pax junx cu'taquec 'oj qui checb't yet' eb' tic on̈. A jun tic, til wal 'ejm 'ix ch'ox sb'a, to yelc'ojlal tzmunlj 'a Cajlilec. Al ticnec, yel xo wal tznib'j tzmunlji, yujto caw tzex ya'ch yipc sc'ojol.

²³ Toto 'ay mach 'oj c'anb'noc 'ayex, tas yaj Tito tic, toto xchi eb', tzeyal 'ixtc 'a eb': Yitb'eym sb'a yet' Pablo, to 'ayl munljoc 'a qui calc tic, xe chi. Toto 'ay mach 'oj c'anb'noc pax 'ayex, tas yaj eb' ajun yet' Tito tic, toto xchi eb', tzeyal 'ixtc 'a eb': A eb' tic, checb'il cot eb' yuj eb' creyente 'a jun tzon̈ xo iglesia, caw tzcheclj 'el swach'l Cristo yuj sb'eyb'al eb', xe chi 'a eb'.

²⁴ A yic 'oj c'och eb' 'ayx ta', caw tze ch'ox e chamc'ojlal 'a eb'. Toto 'ixta tzeyutj e b'a, 'oj e ch'ox 'a eb' creyente 'a junjn iglesia, to yel xcal on̈, yic ex caln wach'l on̈.