2 Co 5 - Chuj San Sebastian Bible

¹ A qui niwnalec tic, lajn 'icha junc pat yajn̈ej tzlan̈chji. Palta cojquec, a yic 'oj lajwc 'ec' jun qui niwnalec tic, 'ay junx 'oj yac' Dios 'ayn̈ec 'a satcha'an̈. A jun cha, may b'a'n̈ 'oj lajwoc. Lajn 'icha junc n̈a caw wach' tz'aj sb'o'i, yujto man̈oc junc 'anma b'ojnac.

² Yel toni, a yic 'ayn̈ect 'ec' 'a jun qui niwnal tic, tzon̈ c'acwec, yujto tzqui nib'jec tz'ajx junx yic satchan̈ chi 'ayn̈ec.

³ 'Oj 'ajxc 'och jun chi 'ayn̈ec 'icha junc pichul, sec man̈xtoc jitn on̈c 'eli.

⁴ A yic 'ayn̈ect 'ec' yet' jun qui niwnalec tic, tzon̈ c'acwec cab'n syail. Man̈toc ton̈j tzqui nib'jec tz'ijx 'ec' jun qui niwnalec tic. Palta tzqui nib'jec to tz'ajx junx qui niwnalec, sec 'oj satl jun yic chaml yaj tic, yic 'oj qui chac qui q'uinl 'a jun 'ejmn̈ej.

⁵ Yujn̈ej wal ton jun tic, on̈ sb'onec can Dios. Ya'n pax Yespíritu 'ayn̈ec, sec cojquec, to caw yel 'oj qui chac jun tzo'n̈ tic 'a 'a.

⁶ Yuj cha, smasnil tiempo, tzca'c 'och Dios yipc qui c'ojol. Cojquec, ya' sb'a 'ayn̈ect 'ec' 'a jun qui niwnalec tic, mant toc 'ayn̈ec 'ec' 'a jun catut 'aj 'ayc' Cajlilec.

⁷ A yic tzon̈ 'e'c 'a yolyib'n̈q'uinl tic, cojxn Dios tzca'c 'och 'a qui c'ojol. Man̈oc 'a jun tzo'n̈ tas tzquilc yet' qui sat 'aj tzca'c 'och qui c'ojol.

⁸ Yuj cha, caw 'aych Dios yipc qui c'ojlec. Caw tzqui nib'j tzcactjec can qui niwnalec tic, sec 'oj stac' qui c'ochc 'a junx catut 'aj 'ayc' Cajlilec cha.

⁹ Yuj cha, smasnil tiempo wach'n̈j cab' tzcutjec qui b'a, sec 'oj tzaljoc Cajlilec chi quet'ec, wach'xam 'ayn̈ect 'ec' 'a qui niwnal tic, wach'xam ma'ay, ax sjawi.

¹⁰ Yujto yowlal 'oj qui c'ochc 'a yojltac sdespacho Cristo, sec junjn on̈ec, 'oj qui chac spac tastc tzqui b'o'o, yic 'ayn̈ect 'ec' 'a jun qui niwnalec tic. A tzyala, toto wach' tzqui b'o'o, mto maysch'olnil.

A yab'xil junc'ojlal

¹¹ An̈ xo tic on̈, a 'a Cajlilec 'aj 'ayx qui xiwc'ojlal on̈. Yuj cha, caw tzcac' quip ca'n snab'enoc eb' 'anma 'on̈. A Dios, yojc xo, tas yaj qui nab'en on̈. Ax xo, tzin nib'ej, tzeyojquej pax 'el tas yaj qui nab'en on̈.

¹² Man̈ ton̈joc tzcalb't qui b'a wach'l 'ayx jun 'ejm xo on̈. Palta tzqui nib'j 'oj stac' e tzalj quet' on̈, sec 'oj stac' e pacn 'a jun tzo'n̈ eb' ton̈j tzb'an̈ sb'a yuj jun tzo'n̈ tas tzquilc yet' qui sat 'a eb'. Ax tas 'ay 'a snab'en eb', matz na xon eb', toto wach', mto ma'ay.

¹³ An̈ xo tic on̈, wach'xam to tzcot 'a qui jolm tz'aj yilx on̈, palta yuj ca'n servil Dios, 'ixta tzon̈ 'aj on̈. Wach'xam wach' qui c'ojl on̈, yuj ex ca'n servil, 'ixta tzon̈ 'aj on̈.

¹⁴ A schamc'ojlal Cristo tz'a'n yajlil 'ayn̈ on̈. Yujto cojc on̈, 'ay jun xcham qui jelc qui masnil. Yuj cha, qui masnil 'icha to chamnc on̈c yet'oc.

¹⁵ Atn Cristo xcham qui jelc qui masnil, sec wach' an̈ec 'ayx qui q'uinl yu'uj, man̈xtzac qui b'eylb'ejc 'icha tzqui nib'j junjn on̈c 'a yol quico'. Palta tzqui b'eylb'ejc 'icha tznib'j jun xcham qui jelquec, xpitzw paxi.

¹⁶ Yuj cha, an̈ xo tic on̈, man̈xtzac qui b'eyc'ojlej junc mach, yuj tas yilx on̈. A 'a yic yalan̈, wach'xam qui b'eyc'ojlejnac Cristo, yuj tas yilx on̈, palta man̈xtzac qui na yuj 'ixta ticnec on̈.

¹⁷ A mach junxn̈ej tz'aj yet' Cristo, caw tzjelmj snab'en, 'icha to tzcaw 'a'tb'i. A jun tzo'n̈ yichm b'eyb'al, tzlajw can 'eq'ui. C'uxn tzlaj wach' b'ocn smasnil.

¹⁸ Smasnil jun tzo'n̈ xwal tic, a Dios tzb'on 'ayn̈ec. Yuj Cristo ya'jnac Dios niwnc'ojlal 'ayn̈ec, sec junc'ojlal xoj tzon̈ can yet'oc. A 'a'jnac copiso caln 'el on̈, chajtl tz'aj eb' 'anma yoch 'a junc'ojlal yet'oc.

¹⁹ A jun tic, tzyal 'el'chi to a Dios 'aych 'a Cristo yic swulq'ui, sec junc'ojlal tz'aj eb' 'anma yet' smasnil. An̈ec tzon̈ canc 'a junc'ojlal yet'oc, man̈x 'oj ya'ch qui mul 'a quib'n̈ec. A 'a'jnac 'och jun 'ab'x tic 'a yol qui c'ab' on̈, sec tz'ec' cal-l on̈, chajtl tz'aj eb' 'anma yoch 'a junc'ojlal yet'oc.

²⁰ Yuj cha, schecb' Cristo caj on̈. 'Icha to caw a Dios wan stew 'at 'ayx cuj on̈. Yuj cha, caw sjel Cristo tzon̈ 'aj qui tew 'at 'ayx on̈, sec tzex can 'a junc'ojlal yet' Dios.

²¹ A Cristo, may xon jac maysch'olnil sb'o'o. Palta ya'jnac 'och Dios smasnil qui mulc 'a yib'an̈, sec junxn̈ej tzon̈ 'ajc yet'oc. Yujn̈ej wal cha, tzyaln Dios to wach'n̈ec 'a sat ticnec, 'icha tznib'ej.