2 Co 12 - Chuj San Sebastian Bible

A tas sch'oxjnac Dios 'a Pablo*r* 'a 'icha waychil

¹ Nab'a tzwixtj in b'a waln in b'a wach'il. Yel xo wach' tzwalb't 'ayx yuj jun tzo'n̈ 'icha waychil wiljnac, yet' jun tzo'n̈ xo tas ch'oxb'il 'ayn yuj Cajlilec.

² 'Ay jun winc wojtac, 'aych sc'ojl 'a Cristo. Schan̈lajn̈il ab'il xo yijx q'ue 'a satchan̈ 'aj 'ayc' Dios. Man̈ wojcoc, toto xit'nc yet' sniwnal, mto ma'ay, cojn Dios 'ojtnac.

³ Wach'xam xit'nc 'ec' sniwnal, wach'xam ma'ay, man̈ wojcoc, cojn Dios 'ojtnac. Palta an̈j jun tic wojtac,

⁴ to 'ijxnac 'at 'a jun lugar paraíso sb'i. Ata yab'jnac jun tzo'n̈ paxti may mach 'ojtnac, caw matz chax xon yal junc 'anma'.

⁵ A jun winc cha, an̈j 'oj stac' in b'an̈ni, palta an xo tic, ma'oj in b'an̈ in b'a. 'Ay jun tzo'n̈ tas 'aych 'a wib'an̈, a tzch'oxni, to may wel'chi. An̈j chi 'oj wala', yic tzcob' in b'an̈nc in b'a jab'oc.

⁶ Q'uinloc yelc'ojlal tzin nib'j tzin b'an̈ in b'a ticnec, toto 'ixta', matz wal 'icha junc man̈ nab'enal yaji, yujto an̈j jun tzo'n̈ tas yel, an̈j tzwala. Palta ma'oj in b'an̈ in b'a 'ixta', yujto tzin nib'ej, may junc mach tznani, to yel xo niwn wel'ch 'a yib'n̈ tas tzyila, mto tzyab' 'ayin.

⁷ A jun tzo'n̈ tas ch'oxb'il 'ayn 'a satchan̈ cha, yel xo wal niwn yel'chi. 'Ay smay in b'an̈n in b'a yu'uj. Yuj cha, 'ay jun yailal 'ajxnac 'ayn yuj win Satanás, sec tzin yixtej. A jun cha, caw lajn 'icha junc niwquil q'uix tztecx 'och 'ayin. 'Ixta 'ajnc in, sec matz in b'an̈ in b'a.

⁸ 'Ox'ejm in c'anjnac 'a Cajlilec, sec toq'ue tzyij 'el 'ayin.

⁹ Palta 'ixtc yutj yaln Cajlilec chi 'ayin: A in wach'c'ojlal, colb'iln̈ej 'ayach. Yujto a mach may spoder 'a yol yico', ata tzwach' checlj 'el in poder an tic, xchi 'ayin. Yuj cha, wach'xam may wel'ch an tic, palta caw tzin tzalji, sec tzwach' 'a'j Cristo spoder 'ayin.

¹⁰ Yuj cha, tzin tzalj ticnec, yujto may wel'chi. Wach'xam tzin b'uchxi, mto caw 'ay tas 'ay tz'och wu'uj. Toxn̈ej tz'ajx 'och yailal 'a wib'an̈, wach' cab' tzwab' syal yuj Cristo, palta caw tzin tzaljn̈ej. Yujto a yic may jac wel'chi, at wal ta caw tz'ajx in poder.

'Ochnc 'il Pablo*r* yuj eb' creyente 'a Corinto

¹¹ 'Icha to man̈ nab'enal waji, yic tzwaln 'at in b'a wach'l 'ayex, palta ax xo in eyac' pural walni. Yujto smoj ax tzin eyal wach'il. 'Ay eb' cob' tzyalch sb'a schecb'oc Cristo si'mb'il. A 'a eb' tzlaj cob' eya'ch e nab'en. Wach'xam may xon jac wel'chi, palta may wal jac yel'ch eb' 'a in sat.

¹² A yic wec' 'a e cal, caw te'n wutjnac in b'a in munlj ta'. In b'ojnac jun tzo'n̈ milagro yet' jun tzo'n̈ xo tastc tzch'oxn 'el spoder Dios, caw satnc e c'ojl eyiln jun tzo'n̈ in b'ojnac cha. Yuj jun tzo'n̈ cha, tzcheclj 'eli, to yel schecb' in Cristo.

¹³ 'Icha wal swach'l tz'ec' wutj in b'a 'a eb' creyente 'a junjn iglesia, 'ixta 'ec' wutjnac in b'a 'ayex. Cojxn to ma'ix wa'ch in b'a eya'n in gasto. Palta caw tzin eyac' niwnc'ojlal yuj jun in mul tic 'ochnc 'ayex.

¹⁴ A ticnec, lista xo waj in 'at 'ayx 'a yox'ejmal tic, palta ma'oj wa'ch in b'a eya'n tas 'ayin. Yujto matz in nib'j tastc 'ay 'ayex, cojn ex tzex in nib'ej. A eb' mamb'il, smoj tzmol eb' stumin, tzya'n eb' 'a yunnal, man̈oc eb' 'unnab'il tzmol stumin, tzya'n eb' 'a smam.

¹⁵ An tic, caw tzin nib'j tzin lajl tastc 'ay 'ayin, sec 'oj wach' b'o e nab'en. Wach'xam 'oj lajwc in niwnal tic yuj 'ex wa'n servil, palta 'oj in tzaljn̈ej, wach'xam jab'xoj e chamc'ojlal 'ayin, palta yel xo wal tzex in chamc'ojlej.

¹⁶ 'Ay jun tzo'n̈ eb', wach'xam yojc eb' to may 'aj xwa'ch in b'a 'a scuenta eb', palta tzyal eb', to caw jeln wutjnac in b'a wa'n ganar ex wixtn paxti'.

¹⁷ ¿Tom ex wixtj paxti yet' junc eb' in checjnac 'at 'ayex?

¹⁸ 'In tewnacn 'och 'a Tito, yic 'at ex yilnoc, in checjnac 'at jun cu'tac yet'oc. ¿Tom 'ixtxnacx paxti yuj Tito chi jun? Caw lajnn̈ej 'ec' cutjnac qui b'eyb'al 'a e cal on̈, lajnn̈ej 'ec' cutjnac pax qui nab'en on̈.

¹⁹ Tecn tze na'a, to ton̈j tzqui col qui b'a 'a eyojltac on̈. Palta man̈ 'ichcta tzcutj qui b'a on̈, yujto a 'a sat Dios, wan caln 'at jun tzo'n̈ tic 'ayx on̈ 'icha tznib'j Cristo, sec 'oj laj 'och e te'nal.

²⁰ Tzin xiwi, yujto a yic 'oj 'at ex wila', toq'ue man̈ ex 'ichcta 'icha tzin nib'ej. An xo tic, toq'ue man̈ in 'ichcta 'icha tze nib'ej. Caw tzin xiw in 'at 'ayex, toq'ue 'ay owl 'a e cal, chichnc'ojlal, yet' c'a'lc'ojlal. Toq'ue 'ayx wan laj eyi'n chan̈ e b'a, toq'ue 'ayx tzex laj b'uchwj 'a e patc junjn ex, 'ayx alm ex peclal. Toq'ue 'ayx tzlaj e b'an̈ e b'a, 'ayx pax wan laj e somchj 'eli.

²¹ Tzin xiw in 'at 'ayx jun 'ejm xo, toq'ue a qui Diosal 'oj 'a'nc in q'uixwloc eyu'uj. Toq'ue caw 'oj woc' eyu'uj, yujto 'a yictax yalan̈, caw niwn ex tze b'o maysch'olnil. Caw matz eyactj can e b'on jun tzo'n̈ maysch'olnil yet' e niwnal, atn 'ajmulal yet' jun tzo'n̈ xo tas caw q'uixweltac.