2 Co 11 - Chuj San Sebastian Bible

A Pablo yet' eb' tzcob' yalch sb'a*r* schecb'oc Cristo

¹ Octom wal 'oj eyac' techjoc jun tzon̈ 'oj walb't 'ayx tic. 'Icha to man̈ nab'enal waj jab'oc tzwaln 'ati, palta caw tzeyac' techjoc.

² Caw wal tzex in ya'ilej, 'icha wal tzyutj Dios ex sya'ilni. Yujto tox xwac' in trato yet' Cristo, chajtlto 'oj ex wac' 'a yol sc'ab'. 'Icha junc cob's 'ix mant 'a jac smul, tz'ajx 'och 'a yol sc'ab' yichmil, comnoc 'ixta 'ex, yic 'oj ex wa'nc 'och 'a yol sc'ab' Cristo.

³ Palta tzin xiwi, toq'ue 'icha 'ajnc 'ix Eva yixtx paxti yuj sjelnal jun ya'jnac 'och sb'a chanil, toq'ue 'ixta tzex 'aj eyixtx paxti jun xo. Lemb'il yuj cha, ax eyi'n 'el e nab'en 'a Cristo. Lemb'il man̈x tojloc 'oj eyutc e b'a 'icha tznib'ej.

⁴ Yujto 'ay eb' tz'ec' alnc 'el junx chuc cuynb'ilal 'ayex. 'Icha to chuc junc xo Jesús tz'ec' yal-l eb' yab'xil, man̈oc jun tz'ec' cal-l on̈, man̈oc chi tz'ec' yal-l eb', palta wan cob' e chanc eyab' 'a eb'. Wan e chan junc xo espíritu 'a eb', palta man̈ 'icha'oc jun chab'ilx eyu'uj. Wan eya'n pax 'och e c'ojl 'a jun 'ab'x yic colnb'il cob'i', palta man̈oc jun eyab'jnac 'ayn̈ on̈.

⁵ A wal eb' cha, caw schecb' Cristo eb' si'mb'il cob' yala', palta tzin na'a, may wal jac yel'ch eb' 'a in sat.

⁶ Wach'xam man̈ jelnoc tzwutj in paxtini, palta a wal tas wojtac, caw 'ay yel'chi. Jantcn̈ej jun tzo'n̈ tas 'ec' in b'ojnac 'a e cal, a ch'oxjnac 'ayex, to 'ay tas wojtac.

⁷ A yic 'ec' walnc 'el wach' 'ab'x yic colnb'il 'a e cal ta', may xon jac tas in c'anjnac 'ayex. 'Ixta wutjnac wi'n 'ejm in b'a, sec caw niwn eyel'chi. Palta, ¿Tom maysch'olnil wutjnac in b'a 'ixta'?

⁸ 'Icha wal to 'ochnc in 'elc'l 'a jun tzo'n̈ xo iglesia eyu'uj, yujto a 'a eb' in chajnac in gasto, yic ex wa'n servil.

⁹ A yic wec' 'ayex, 'ay 'aj 'ay tas 'ay tz'och wu'uj, palta may junc ex 'aj in c'anjnac jab'oc. A eb' cu'tac 'aj Macedonia tic xit' 'a'nc jab' tas 'ay 'ochnc wuj ta'. May junc ex 'aj in c'anjnac jac in gasto, an̈jtona', 'ixta 'oj wutcn̈ej pax in b'a ticnec.

¹⁰ Wach'xam tzwij chan̈ in b'a waln jun tzo'n̈ tic, palta may junc ex 'a lugar Acaya chi tztac' in stenn 'och wa'an. Caw yel tzwala, yujto a Cristo 'aych wet'oc.

¹¹ ¿Tas yuj tzwalb't jun tzo'n̈ tic 'ayx tze na'a? ¿Yuj am may in chamc'ojlal 'ayx ta tze na'a? A Dios 'ojtnac, jantc wal in chamc'ojlal 'ayex.

¹² Palta an̈j 'ijnocn̈ej 'oj wutc in b'a, 'ichan̈ej 'ec' wutjnac in b'a xon 'a e cal. Sec wach' a eb' tzsayc' tas tzyutj sb'an̈n sb'a, 'oj can eb' 'a yaln̈ wu'uj, yujto tzcob' yal eb', to lajn yopiso eb' quet' on̈.

¹³ A eb' cha, ton̈j tzcob' yalch sb'a eb' schecb'oc Cristo. Caw 'ixtm 'anma eb' yet' spaxti cha, mun tzcob' ya'ch sb'a eb' schecb'oc Cristo.

¹⁴ Palta a jun tzb'o eb' cha, matz sat qui c'ojl yuj eb', yujto 'ixta pax win Satanás, tzcob' ya'ch sb'a win swach' ángeloc Dios.

¹⁵ Yuj cha, matz sat qui c'ojol, toto a eb' tz'a'n servil winac, tzcob' yalch sb'a eb' wach'il. Palta a eb' cha, 'oj scha eb' spac, a tzyala tastc tzb'o junjn eb'.

A tas 'ajnc Pablo yab'n syail

¹⁶ Tic tzwalb't 'ayx jun 'ejm xo, may cab' ex tze na'a, to man̈ nab'enal waji. Palta toto tze na 'ixta', 'a'c wal-l 'icha junc mach man̈ nab'enal yaj cha, sec 'oj stac' in b'an̈n in b'a jab'oc, 'icha jun tzo'n̈ eb' tzb'an̈ sb'a cha.

¹⁷ A jun tzo'n̈ 'oj walb't 'ayx tic, man̈oc Cajlilec tz'a'n walb'ti. 'Icha to man̈ nab'enal waji, tzwaln 'ati, yujto ton̈j tzin b'an̈ in b'a walni.

¹⁸ Til wal eb' tzb'an̈ sb'a yuj tas yaj 'a yolyib'n̈q'uinl tic, yuj cha, 'oj in b'an̈ in b'a jac yet' eb'.

¹⁹ Ax tic, caw jeln ex. Palta 'in caw tzeyac' techjoc 'a eb' man̈ nab'enal tzyutj sb'a 'ayex, 'in tzex tzalj yet' eb'.

²⁰ 'Ay eb' tzex 'a'n pural, yic tzeya'n servil eb'. Ax jantcn̈ej tas 'ay 'ayex, c'uxn tztoc'c' eb'. Caw tzya'ch sb'a eb' yajlil 'ayex, tzyi'n chan̈ sb'a eb', 'ay 'aj tzpawch eb' scab' 'a e sat, palta ax xo, 'in tzeyac' techjoc 'a eb'.

²¹ Tzin q'uixw waln 'at 'ayex, to ma'ix qui te'wtzej qui b'a on̈, yic tzqui b'on 'icha tzyutj sb'a eb' chi 'ayex. Palta 'icha eb' cha, tzte'wtzej sb'a eb' yalni, 'ixta tzwutj in te'wtzan in b'a waln jun xo. Wan waln ton 'icha junc man̈ nab'enal yaji.

²² Hebreo ton eb', palta hebreo in jun xo. Israel ton eb', palta israel in jun xo. Yin̈tl ton Abraham eb', palta yin̈tl in pax Abraham yet' eb'.

²³ Toto ya'mal servil Cristo eb', an xo tic, yel xo wal tzwac' servil 'a yib'n̈ eb'. A yic tzwaln 'at jun tzo'n̈ tic 'ayex, tzwal ton 'icha junc man̈ nab'enal yaji. Yel xo wal niwn in munlj 'a yib'n̈ eb' cha. Caw niwn 'ejm in ma'x 'a yib'n̈ eb', niwn 'ejm in 'och 'a preso, an̈jtona', niwn 'ejm in cob' 'ajxc 'och 'a yol sc'ab' chamel.

²⁴ O'ejm sma'jnacn eb' wit israelal, 39 tz'um wijnac yuj eb' 'a junjn 'ejem.

²⁵ 'Ox'ejm mac'b'iln yet' jixc'ab'te', jun 'ejm cob' julxnacn cham pax yet' q'uen q'ue'en. 'Ox'ejm pilch'jnac te barco 'a walan̈, in can 'a snan̈l a'. A jun 'ejem, jun c'u, jun 'ac'wl cannc in 'a snan̈l a'.

²⁶ Til wal 'ajtc b'eync in 'eq'ui. 'Ay 'aj 'ay smay yuj a niwc a', yet' pax yuj eb' 'elc'um. 'Ay 'aj 'ay smay yuj eb' wit chon̈ab', yet' pax yuj eb' man̈ wit chon̈b'oc. 'Ay 'aj 'ay smay 'a jun tzo'n̈ chon̈ab', yet' 'a b'esan, yet' pax 'a yib'n̈ a mar. 'Ay pax 'aj 'ay smay 'a scal eb' tzcob' yalch sb'a cu'tacoquec.

²⁷ 'Ay 'aj caw 'elnc wip in munlji, caw wab'jnac syail. Niwn 'ejm ma'in way xon jab'oc. 'Ay 'aj caw 'ochnc in wejel, yet' in tacn̈ti'al. Til wal 'ejm 'ochnc in pax 'a c'ajb'c'ojlal. 'Ay 'aj caw wab'jnac syal yuj si'ic, 'ay 'aj caw man̈x 'a in pichul.

²⁸ Man̈ cojnoc jun tzo'n̈ yailal tic tzwab'i, yujto junjn c'u, caw tzwab' syal in nan eb' creyente 'a junjn iglesia.

²⁹ Toto 'ay eb' mant 'a ste'nal, caw tzin 'och 'il yuj eb', 'icha to may in te'nal yet' eb'. Toto 'ay eb' tz'ajx juwc 'el snab'en, caw tzwab' syal si'mb'il yuj eb'.

³⁰ Toto tzin b'an̈ in b'a, 'oj in b'an̈ ton in b'a yuj jun tzo'n̈ wan waln 'at 'ayx tic, yujto a jun tzo'n̈ tic tzch'oxni, to may jac wel'chi.

³¹ A Dios, atn Smam Cajlil Jesús, smasnil tiempo smoj tzalx wach' paxti 'a 'a. A 'ojtnac, chajtlto caw yel tzwala.

³² A yic wec' 'a chon̈b' Damasco, ata 'ayc' win gobernador munljnac 'a win rey Aretas. A win cha, ya'jnac tan̈wxoc junjn spuertail sti jun chon̈b' cha, sec tzin yamchj yuj win snani.

³³ Palta a 'a yol jun xu'uc, ata 'emnc in, wajx 'el 'a swentnual smuroal jun chon̈b' cha, wem'ch 'a lu'um. 'Ixta 'ajnc in colchj 'el 'a yol sc'ab' winac.