2 Co 10 - Chuj San Sebastian Bible

A yopiso Pablo

¹ A Cristo, caw 'emmquilal yutjnac sb'a, til wal swach'l snab'en. 'Icha yutjnac sb'a cha, 'ixta tzwutj in b'a in tew 'at 'ayx an Pablo in tic. Tzalxi, to caw 'emmquil tzwutj in b'a, yic 'ayn 'ec' eyet'oc, palta ax ab' yic 'ayn 'ec' 'a najat, caw ab' ow in.

² Palta tzin tew 'at 'ayex, sec wach' a yic 'oj in c'och 'ayex, man̈ yowlalc ow 'oj wutc in b'a. Yujto 'ayx wan eyaln cuj on̈, to ton̈j tzqui b'eylb'ej 'icha sb'eyb'al junc comn 'anma 'on̈. Palta an tic, caw ma'oj in xiw in ten in b'a yet' eb' tzaln cha.

³ Yel toni, 'anman̈n̈ej on̈. Palta man̈ lajnoc tzcutj ca'n quip 'icha eb' comn 'anma 'on̈.

⁴ Man̈oc jun tzo'n̈ tas yic yolyib'n̈q'uinl tic tzqui yamc'ab'j on̈, yic tzca'n quip on̈. Palta an̈j jun tzo'n̈ 'aj 'aych spoder Dios tzqui yamc'ab'j on̈, sec wach' a jun tzo'n̈ 'ay cob' yip, tzcan 'a yaln̈ cuj on̈.

⁵ A jun tzo'n̈ comn jelnal, caw tzcan 'a yaln̈ cuj on̈. 'Ay pax jun b'an̈jb'ail. Yu'uj, 'ay eb' matz 'ojcan 'el Dios, palta tzann̈j junc b'an̈jb'al cha, tzcan 'a yaln̈ cuj on̈. Ax jun tzo'n̈ comn nab'en, c'uxn tzca'ch 'a yol sc'ab' Cristo on̈, sec yiclum tzyutj sb'a eb' 'ay yic jun tzo'n̈ nab'en cha.

⁶ Ax 'a yic 'oj e wach' yiclnoc, an̈ xo tic on̈, lista xo caj on̈ yic tzca'n cuenta eb' man̈ yiclumoc tzyutj sb'a 'a e cal cha.

⁷ Ax xo, cojxn tas tzeyil yet' e sat tztac' snachj 'el eyu'uj. Toto 'ayx tze na'a, to cojn ex caw yic ex Cristo, nachj cab' 'el eyu'uj, to an̈jtona', yic on̈ pax Cristo on̈.

⁸ Wach'xam caw tzin 'ec' 'a yib'n̈ waln yuj copiso on̈, palta ma'oj in q'uixw yu'uj. Yujto a Cajlilec a 'a'jnac copiso tic on̈, yic tzca'n 'och e te'nal on̈, man̈ yujoc ex ca'n juwc 'el on̈, ya'n copiso tic on̈.

⁹ 'Ixtc tzwutj waln 'at 'ayex, sec ma'oj e na', chajtlto ton̈j tzin nib'j tzex xiw yuj jun tzo'n̈ in carta tzwa't 'ayex.

¹⁰ Yujto 'ayx ab' tzeyal wuj 'ixtic: A jun tzo'n̈ scarta, caw ow ton yalni, caw 'ay yip. Palta ax winac, toxn may jac yip win tzquila. A yic tzpaxtini, may jac yel'ch tzcab'i, xe chi ab'i'.

¹¹ Palta ax tzeyal 'ixta', nachj cab' 'el jun tic eyu'uj. 'Icha tzwutj waln 'at 'ayx tic, yic 'ayn 'ec' 'a najt tic, 'ixta 'oj wutc in b'a ex wa'n cuenta, yic 'oj in c'och ta'.

¹² An̈ tic on̈, matz qui te'wtzej qui b'a qui nan on̈, to lajn on̈ 'icha jun tzo'n̈ xo eb' mun tzyal wach'l sb'a. Matz qui lajb'tzej qui b'a yet' eb' on̈. A eb' cha, man̈ nab'enal yaj eb', yujto junjn eb', mun a snab'en eb' tzcob' sc'anlb'oc yic tzb'eyc'ojlan sb'a eb'. An̈jtona', tzcob' slajb'tzanc eb' snab'en yet' jun tzo'n̈ xo eb'.

¹³ An̈ tic on̈, matz quij chan̈ qui b'a yuj jun tzo'n̈ tas may caln quic 'a on̈. A Dios ch'oxjnac 'ayn̈ on̈, 'ajtc 'a lugaril 'aj tzon̈ 'ec' munljoc 'a on̈. A chajnacn̈ 'at 'ayx 'a Corinto chi 'on̈.

¹⁴ Yuj cha, matz on̈ c'axw 'ec' 'a junc xo lugar on̈. Q'uinloc ma'on̈ xit' 'ayx 'a jun 'el on̈. Toto 'ixta', may caln quic qui munlj 'a e cal ticnec on̈. Palta an̈ b'ab'l c'ochnc on̈ 'ayx yet' yab'xil Cristo on̈.

¹⁵ May 'aj tzquij chan̈ qui b'a 'a spatc smunljel junc xo mach on̈. Matz cal quico'oc on̈. Palta tzca'ch junx tic yipc qui c'ojl on̈, a yic 'oj e wach' 'a'c 'och e c'ojl 'a Dios. Ata 'oj stac' qui wach' munlj 'a e cal on̈. Palta ma'oj qui c'axw 'ec' 'a junc xo lugar on̈.

¹⁶ 'Oj lajwc cha, ax 'at calcn 'el wach' 'ab'x 'a spatquil 'at e chon̈b' chi 'on̈. Palta ma'oj qui' chan̈ qui b'a on̈, yuj smunljel jun tzo'n̈ xo eb' 'e'nc xo ta'.

¹⁷ Toto 'ay mach tznib'j sb'an̈ sb'a, caw man̈ wach'oc. Cojxn Cajlilec smoj qui b'an̈ni.

¹⁸ 'Ay eb' mun tzyal wach'l sb'a, palta may yel'ch tas tzyal eb' cha, cojn eb' tzyal Cajlilec wach'il, an̈j eb' wach'.