2 Co 1 - Chuj San Sebastian Bible

Tzya't Pablo scarta 'a eb' 'aj Corinto

¹ An Pablo in tic, schecb' in Jesucristo, yujto 'ixta x'el 'a sc'ojl Dios. An yet' cu'tac Timoteo, tzin tz'ib'j 'at jun in carta tic 'ayx yiglesia ex xo Dios 'a Corinto. Tzin tz'ib'n pax 'at 'ayx e masnil ex yic xo Dios 'a yol yic Acaya.

² Tzin nib'ej, a qui Mam Dios yet' Cajlil Jesucristo, tzyac' swach'c'ojlal yet' sjunc'ojlal 'ayx ta'.

A tas 'ajnc Pablo yab'n syail

³ Calc wach' paxti 'a Dios, atn 'a Smam Cajlil Jesucristo. Qui Mamc paxi, yuj cha, caw tz'o'ch sc'ojl 'ayn̈ec. Caw tzyac' sniwnal qui c'ojlec, yujto qui Diosalec.

⁴ A yic tzcab'nec syail, a tz'a'n sniwnal qui c'ojlec, sec wach' tztac' ca'nec sniwnal sc'ojl eb' tz'ab'n pax syail. 'Icha tzyutj Dios ya'n sniwnal qui c'ojlec, 'ixta tzcutjec pax ca'n sniwnal sc'ojl eb'.

⁵ A ticnec, caw niwn tzcab'c syal yet' Cristo. Palta an̈jtona', yu'uj niwn tz'aj yajx sniwnal qui c'ojlec. 'Icha tzcab'c syail, 'ixta tz'aj yajx sniwnal qui c'ojlec.

⁶ Yuj cha, a yic tzcab'n syal on̈, 'ixta tzon̈ 'aj on̈, sec wach' tztac' ca'n sniwnal e c'ojl on̈, sec 'oj e colchji. An̈jtona', a yic tzya'n Dios sniwnal qui c'ojl on̈, 'ixta tzon̈ 'aj pax on̈, sec wach' tztac' ca'n pax sniwnal e c'ojl on̈. Yuj cha, 'oj stac' e te'wtzan e b'a eya'n techjoc jun tzo'n̈ tas 'oj 'ajxc 'och 'a eyib'n̈ 'icha tz'aj yajx 'och 'a quib'n̈ on̈.

⁷ Te'n tzcutj qui b'a ca'n 'och Dios yipc qui c'ojl eyuj on̈, yujto cojc on̈, 'icha tz'aj yajx 'och yailal 'a eyib'an̈, 'ixta 'oj 'aj yajx pax sniwnal e c'ojl yuj Dios.

⁸ Ex wu'tac, ex wanab', tzqui nib'j on̈, to tzeyojquej 'eli jantc wal syal 'ec' cab'jnac 'a yol yic Asia on̈. Yujto caw niwn yailal 'ec' cab'jnac ta 'on̈, 'ijn wal ma'ix techj cuj on̈. Qui nan on̈, man̈x 'oj qui colchj 'el 'a yol sc'ab' on̈.

⁹ A wal qui nan on̈, to tzon̈ cham ta 'on̈. 'Ixta wal 'ajnc on̈ ta 'on̈, sec wach' cojxn Dios tzca'ch yipc qui c'ojl on̈, yujto a tz'a'n pitzwc pax eb' chamnac. Aln̈ on̈, man̈xtzac ca'ch yipc qui c'ojl on̈, to tztac' qui coln qui b'a on̈.

¹⁰ Jab'xoj wal man̈toc caw chamnc on̈ yuj jun niwn yailal chi 'on̈, ax Dios coljnacn̈ 'el 'a yol sc'ab' on̈. Wan on̈ scoln pax 'el ticnec on̈. 'Aych yipc qui c'ojl on̈, to an̈ja 'oj on̈ scol-l 'a jun tzo'n̈ yailal chi 'on̈.

¹¹ Caw tzex colwj quet' 'a lesl on̈. Toto niwn ex 'oj e leslwi cuj on̈, an̈jtona', niwn ex 'oj eyac' yuj diosal 'a Dios yuj swach'c'ojlal 'oj yac' 'ayn̈ on̈.

Man̈x 'ic 'e'x Pablo 'a Corinto

¹² Caw tzon̈ tzalj on̈, yujto cojc yet' qui pixn on̈, caw tojl tzcutj qui b'eyb'al 'a smasnil 'anma 'on̈, yet' pax 'ayex. May spaltail qui b'eyb'al on̈, yujto tzyac' Dios spoder 'ayn̈ yuj swach'c'ojlal on̈. Man̈ yujoc qui jelnal on̈, wach' qui b'eyb'al on̈.

¹³ A yic tzqui tz'ib'n 'at jun tzo'n̈ qui carta 'ayx on̈, cojxn jun tzo'n̈ tas tztac' snachj 'el eyu'uj, an̈j tzqui tz'ib'j 'at 'ayx on̈. Tzax nachj 'el jac eyu'uj, tas caj on̈.

¹⁴ Yuj cha, tzwa'ch yipc in c'ojol, to 'oj wach' nachjc 'el eyu'uj, chajtlto a yic 'oj jawc Cajlil Jesús, 'oj stac' e tzalj cuj on̈, 'icha tzon̈ 'aj qui tzalj eyuj on̈.

¹⁵ 'Ixta wutjnac wa'n 'och yipc in c'ojol. Yuj cha, in nani, to tzex 'ec' in b'ab'l 'iloc, sec wach' cha'ejm tzin 'ec' 'ayx muc'uc, ax e wach' chan swach'c'ojlal Dios.

¹⁶ Nab'il xo wu'uj, to tz'ec' ex wila', 'ixta to b'i'an, tzin jaw 'a Macedonia tic. Ax yic tzin meltzj pax 'a tic, tzex 'ec' wilnc pax jun 'ejm xo in nani. Toto 'ixta', tztac' tzex colwj 'ayin, yic tzin 'atx 'a Judea.

¹⁷ A yic in nan jun tzo'n̈ tic, ¿tom ton̈j in b'al najnac tze na'a? ¿Tom tze na'a, to ton̈j tzin na jun tzo'n̈ tic 'icha tzna junc comn 'anma'? ¿Tom tze na'a, to inye, xin chi, tzwaln paxi to ma'ay, xin chi?

¹⁸ Tzyil Dios, may jun 'ejmoc tzcal 'ixtc 'ayx on̈: Inye ¿tom xqui chi 'on̈? Tzcaln pax on̈, to ma'ay.

¹⁹ A Cristo Jesús, yel Yunnal Dios, a yab'xil 'ec' waljnac 'a e cal. 'Ec' yaln pax Silvano yet' Timoteo. A Cristo, may jun 'ejmoc yaljnac 'ixtic: Inye, ¿tom xchi? Tzyaln paxi to ma'ay. Yujto cojn wal a tas yel, a yaljnac.

²⁰ A tz'a'n 'el'choc jantcn̈ej tas tzyal Dios, yic tzya'n sti'. Yuj cha, a yic tzcaln wach' paxti 'a Dios, b'o cab' 'ixta', xqui chi, yujto cojtac, to 'oj 'el'choc yuj Cristo Jesús.

²¹ A Dios tz'a'n ste'nal e nab'en quet' on̈, yujto 'ayn̈ecx 'och 'a yol sc'ab' Cristo. A Dios on̈ si'nec 'och yico'oc.

²² A 'a'jnacx 'och jun seyo 'ayn̈ec, atn Yespíritu ya'jnac 'a qui pixn junjn on̈ec. A Yespíritu tic tzch'oxn 'ayn̈ec, to caw yel 'oj qui chac jantcn̈ej jun tzo'n̈ tas 'aj ya'jnac sti 'ayn̈ec.

²³ Palta tzin nib'j ma'ix 'och e cusc'ojlal wu'uj, yuj cha, mant 'ic in 'e'x 'ayx 'a Corinto cha. Caw yel tzwala, tzyil Dios, yujto caw yojc tas 'ayc' 'a in nab'en.

²⁴ Matz qui nib'j tzex cac' mandar on̈, yic tzcaln 'ayx on̈ tas tzeyutj eya'n 'och e c'ojl 'a Dios. Yujto te'n xon tzeyutj e b'a eya'n 'och e c'ojl 'a 'a. Palta tzqui nib'j tzon̈ colwj ca'n e nab'enoc on̈, sec 'oj wach' jawc e tzaljc'ojlal ta'.