A Ch'an̈ Schab'l Libro Samuel 9 - Chuj San Sebastian Bible

A swach'c'ojlal David 'a Mefi-boset

¹ 'Ix yaln David 'ixtic: ¿'Ayt am junc yin̈tl Saúl xcani, 'a 'aj wach' tzin colwj yuj in chamc'ojlal 'a Jonatán? xchi.

² 'Ay jun win schecb' eb' yunnal Saúl chi checl yaji, Siba sb'i winac, 'ix 'at cot winac, yic tzjaw win 'a yojltac David. Ax yic xjaw winac, 'ix sc'anb'n win rey chi 'a win 'ixtic: —¿Ach am tic Siba a b'i? xchi. —N', an ton mamin rey, xchi winac.

³ 'Ix yaln David 'a win 'ixtic: —¿Man̈x am wal junc yin̈tl win Saúl xcani, 'a 'aj wach' tzin ch'ox in wach'c'ojlal, 'icha wutjnac wa'n in ti 'a sat Dios? xchi. —'Ayt can jun win yunnal Jonatán may yip yoc schab'il, xchi Siba.

⁴ Sc'anb'n win rey chi 'ixtc 'a 'a: —¿'Ajtil 'ayc' winac? xchi. —Ata 'ay win 'a yatut win Maquir, win yunnal Amiel 'a chon̈b' Lodebar, xchi.

⁵ Yuj cha, 'ix 'at ya'nc rey David cot win Mefi-boset chi 'a yatut win Maquir cha.

⁶ A yic 'ix jaw win Mefi-boset yunnal can win Jonatán, yixchicn can Saúl 'a yojltac David, 'ix 'em n̈ojnjoc 'a yojltac win rey cha, yic tzch'oxn 'el syiclumal. 'Ix yaln David 'a win 'ixtic: —¿Ach tic Mefi-boset a b'i? xchi. —An ton 'ixta in b'i mamin rey, xchi winac.

⁷ 'Ix yaln David 'a win 'ixtic: —Man̈ ach xiwoc, yujto wach' 'oj 'ach wutoc, yuj in chamc'ojlal 'a Jonatán win a mam. 'Oj wac' meltzjoc smasnil lum slum a mam 'ichm Saúl 'ayach, ax a wa wet' 'a in mexa 'a junjn 'ejem, xchi.

⁸ 'Ix 'emx n̈ojn win Mefi-boset cha, 'ix yaln win 'ixtic: —¿Tas wal yuj tz'o'ch a c'ojl 'ayn mamin rey? An a checb' in tic, lajn xoj wal wilx 'icha junc no chamnc tz'i', xchi.

⁹ 'Ix yawtn cot win rey chi win Siba schecb' can win Saúl, 'ix yaln 'ixtc 'a winac: —A smasnil tas 'ay 'a win a patron̈ yet' eb' yunnal, 'ix wa'x can 'a win yixchicn win tic.

¹⁰ Ach xo tic, yet' smasnil eb' onnal yet' smasnil eb' a checab', 'oj e munlj 'a sat lum slum win cha, ax sb'al lum 'oj yac'a, 'oj e mol 'a yol sc'un̈ail, sec 'ay tas 'oj sc'ux eb' yunnal win yixchicn win a patron̈. Ax Mefi-boset tic 'oj wa 'a junjn 'ejm wet' 'a in mexa, xchi David. A win Siba cha, 'ay olajn̈wan̈ yunnal, junc'lwan̈ schecab'.

¹¹ 'Ix ta'w Siba chi 'a win rey 'ixtic: —Mamin rey, a smasnil tas tzal 'ayin 'oj in b'o 'icha tas tzal cha, xchi winac. Ax win Mefi-boset, 'a junjn c'u tzwa win yet' David 'a smexa, 'icha wal 'unnab'il x'aj win 'a win rey cha.

¹² 'Ay jun yunnal Mefi-boset yune to, Micaía sb'i. Ax smasnil eb' cajn 'a yatut win Siba, 'ix 'a'w servil eb' 'a win Mefi-boset cha.

¹³ Palta a 'a Jerusalén ata cajn Mefi-boset, atn win may yip yoc, yujto ata tzwa yet' win rey.